Isa ka Benepisyo sa Komunidad

SUNO SA MANUNULAT SANG MAGMATA! SA ESPANYA

SINIGLO na nga ang mga siudad sa Espanya nagadonar sing lote para sa mga duog sang pagsimba. Nagapati ang mga panguluhan sang siudad nga ang relihion makabulig sa ila mga komunidad. Bangod ang Katolisismo amo anay ang relihion sang Estado, kustombre na nga ang propiedad sang munisipyo gindonar halos sa Simbahan Katoliko lamang. Apang nagbag-o na ang panahon.

Sang 1980, ang isa ka kasuguan sa Espanya nga nagagarantiya sing kahilwayan sa relihion nagsiling nga “wala sing isa ka partikular nga relihion ang mangin Opisyal nga relihion sang Estado.” Nagpahulag ini sa pila ka opisyal sang siudad nga kilalahon sing dayag ang hilikuton sang mga Saksi ni Jehova. Bilang tanda sini nga pagkilala, nagdonar sila sing lote para patindugan sing mga Kingdom Hall.

Ang nagkalainlain nga mga administrasyon sang mga siudad nagsiling nga ining mga donasyon nagakabagay bangod sang “hilikuton nga pagpanudlo [sang mga Saksi],” subong man sang “ginabulig sini sa publiko kag sa katilingban.” Ginsambit sang iban ang “talalupangdon nga presensia sang mga Saksi ni Jehova sa siudad” kag “ang indi negosyo nga sahi sang ila hilikuton.”

Madamo nga mga Kingdom Hall ang ginpatindog sa sulod lamang sang 48 ka oras paagi sa pinasahi nga mga pamaagi sa pagpatindog sang mga Saksi nga boluntaryo. Ang meyor sang La Línea, sa nabagatnan-nakatundan nga Espanya, nagkomento: “Dayaw gid ako sa pagkamabuligon sang mga boluntaryo, kag para sa akon, bagay gid sila nga sakdagon naton. Kinahanglan gid naton ini nga sahi sang espiritu sa sining nabahinbahin nga kalibutan karon.” Gintawag niya ang bag-o nga Kingdom Hall subong “isa ka monumento sang pagbinuligay.”

Nakita man sang mga kaingod ining espiritu sang pagbinuligay. Sang gintukod ang isa ka bilding para sa duha ka Kingdom Hall sa siudad sang Vitoria, sa naaminhan nga Espanya, si Marian, nga nagapuyo sa kaingod, nagsiling: “Kon ipakita sang tanan ini nga sahi sang gugma, wala kuntani kita sing mga problema nga ginaantos naton karon.” Pagkatapos makita ang pagtukod, isa ka lokal nga arkitekto ang nagtuaw: “Luyag ko mangin isa sang mga Saksi ni Jehova agod mabatyagan ko ang inyo kalipay!”

Sa siudad sang Zaragoza, sa naaminhan-nasidlangan nga Espanya, ginhatag sing libre sang mga opisyales sa mga Saksi ang 600 metros kuadrados nga lote. Ang isa ka lokal nga pamantalaan naglaragway sang duog nga ginpatindugan subong “balay sang subay sang mga Saksi ni Jehova, diin ginatos ka magagmay nga mga subay ang nagapangabudlay sing tingob.” Mainit nga gin-abiabi sang mga kaingod ang mga trabahador. Ang isa sa ila nagsiling: “Nadula ang akon pagtuo sa Dios bangod sang mga pari, apang ginbalik ninyo ini.”

Nagapasalamat ang mga Saksi sa bulig sang mga kaingod kag lokal nga mga awtoridad sa pagtukod sang ila mga duog sang pagsimba. Desidido sila nga gamiton ang ila mga Kingdom Hall para sa labing maayo nga hilikuton sa pagpanudlo nga posible sa komunidad​—⁠ini amo ang pagbantala kag pagtudlo sang Pulong sang Dios.

[Retrato sa pahina 31]

La Línea, Cádiz, Espanya