Isa ka Butang nga Indi Maanod sang Bisan Ano nga Baha

SUNO SA MGA MANUNULAT SANG MAGMATA! SA ALEMANYA, AUSTRIA, MEXICO, KAG KOREA

SANG tuig 2002, natabo ang makahalalit nga mga kalamidad sa madamo nga pungsod. Nahalitan ang Europa sang sunodsunod nga mga baha. Sa iban nga bahin sang kalibutan, ang Mexico kag ang Korea nahalitan man sang mabaskog nga mga bagyo. Bisan makahalanusbo ini nga mga hitabo, nagpabakod ini sang gugma sa tunga sang matuod nga mga Cristiano.

Pagkatapos sang mga baha sa Europa sang 2002, ginpamangkot ang anay pangulo sang Katundan nga Alemanya nga si Helmut Schmidt kon ano nga sahi sang bulig ang kinahanglan sang mga biktima. Sia nagsabat: “Kinahanglan sang mga tawo ang pagkaon kag puluy-an, kinahanglan nila ang kuarta, kag kinahanglan nila ang espirituwal nga pag-atipan.” May importante nga papel ang mga Saksi ni Jehova sa pag-aman sang pisikal kag espirituwal nga bulig sa mga biktima sang bagyo. Talupangda ang pagbulig nga ila ginhimo sa Alemanya, Austria, Mexico, kag Korea.

Handa nga mga Manugbulig sa Alemanya

Sang nabalita nga may nagapadulong nga makahalalit nga baha, madamo nga mga Saksi ni Jehova sa Alemanya ang nagbulig paninguha upod sa publiko nga masagang ang tubig-baha. Siling sang 19-anyos nga si Kathleen, nga nagapuyo sa Dresden: “Indi mahimo nga magpahimunong lang ako. Sang mabatian ko nga mahimo gid anuron ang tanan nga pagkabutang sang iban nga mga tawo, nagkadto ako kag magbulig.”

Gin-umpisahan sang mga Saksi sa Alemanya nga organisahon ang ila kaugalingon agod maghatag sing maabtik kag epektibo nga bulig. Bilang mga Cristiano, nagbatyag sila sing pinasahi nga obligasyon nga buligan ang ila espirituwal nga mga utod. Apang nagpakita man sila sing gugma sa ila mga kaingod. (Marcos 12:31) Gani kapin sa 2,000 ka boluntaryo ang gingrupo sa mga walo tubtob 12 ka tawo, kag ang kada grupo ginhatagan sing espesipiko nga ulubrahon sa lugar nga apektado sang baha. Sa sanga talatapan sang mga Saksi ni Jehova sa Selters, Alemanya, 13 ka linya sang telepono ang ginreserba sa pagbaton sang linibo ka tawag gikan sa mga tawo nga nagapamangkot tuhoy sa kalamidad kag nagatanyag sang bulig.

Si Ronnie kag si Dina bug-os tion nga mga ministro sang mga Saksi ni Jehova, nga nagahinguyang  sang ila tion sa pagbulig sa mga abyan kag mga kasilingan nga makatuon sang mga kamatuoran sa Biblia. Sang nabatian nila ang tuhoy sa nagahilapit nga baha, nagkadto anay sila sa sentro sang siudad sang Dresden sa pagbulig sa masako nga pagpaninguha nga salbaron ang maragtason nga mga edipisyo sini. Sang naghubas na ang baha, nag-upod si Ronnie kag si Dina sa iban pa nga mga Saksi sa pagtinlo sang Kingdom Hall sa Freital, nga ginsulod sang mahigko nga tubig. Ginbuligan dason sang grupo ang ila mga kaingod. Nakaginhawa sing matawhay ang tag-iya sang restawran sa tabok sang Kingdom Hall sang gintinluan sang mga Saksi ang iya bodega kag nahauna nga panalgan sang sagbot kag bun-od.

Si Siegfried kag si Hannelore nagaistar sa Colmnitz, isa ka baryo nga mga 40 kilometros sa nabagatnan-sidlangan sang Dresden. Nag-awas ang tubig sang sapa nga nagaagi sa baryo, kag ginbahaan ang ila balay kag hardin. Sang naghubas na ang baha, nakibot ang mga kaingod sang makita nila ang mga 30 ka Saksi, nga mga estranghero sa lugar, nga nag-abot sa pagbulig limpio sang balay ni Siegfried kag ni Hannelore. Pagkatapos, gintinluan sang grupo ang kaiping nga mga hardin. Madamo nga pumuluyo ang namangkot kon ano ang nagtiklod sa ila nga lakbayon ang 100 kilometros agod buligan ang mga tawo nga indi nila kilala. Ang mga Saksi nian nakahatag sing espirituwal nga pagpalig-on sa mga biktima sa Colmnitz.

Ginbahaan man ang mga lugar sa palibot sang banwa sang Wittenberg. Ang mag-asawa nga Saksi nga sanday Frank kag Elfriede pila ka adlaw nga nangabudlay upod sa ila mga kaingod antes sang baha, nga nagasulod sing balas sa mga sako kag  nagatangkas sini agod pabakuron ang mga pangpang sang suba. Sang maghubas na ang tubig, ginduaw ni Frank kag ni Elfriede ang mga nabahaan, nga ginadalhan sila sing pagkaon kag paglugpay. Sugid ni Frank: “Indi makapati ang isa ka babayi nga ginkadtuan namon, nga kami, nga indi niya kilala, nagdala sa iya sing pagkaon nga wala nagapangayo sing bayad. Ginsilingan niya kami nga wala sing bisan isa halin sa iya simbahan ang nagbisita sa iya. Kag ginasukot sia kada tion sang organisasyon nga nagdala sa iya sing pagkaon. Nakibot ang mga tawo sang makita nila ang mga Saksi ni Jehova nga nagabitbit sang mainit nga pagkaon sa baylo sang pasad-Biblia nga literatura.”

Austria​​—⁠Maabtik nga Pagresponder sa Kalamidad

Nanghalit man sing daku ang baha sa kaingod nga pungsod sang Austria. Tatlo ka komite ang gintukod agod dumalahan ang hilikuton sa pagbulig. Ginhatagan prioridad ang pagkaayo sa tatlo ka Kingdom Hall nga nahalitan sing daku. Subong man, sa mga Saksi halos 100 ka panimalay ang apektado sang baha, kag 50 ka puluy-an ang nabahaan. Ang iban wala gid sing nasalbar nga pagkabutang luwas lamang sa ila ginasuksok nga bayo. Ginpahibalo sang sanga-talatapan sa Austria sa lokal nga mga kongregasyon ang sitwasyon, kag gintukod ang isa ka pundo para sa pagbulig nga hilikuton. Sang Septiembre, kapin na sa $34,000 ang nabaton nga donasyon.

Isa ka iloy ang nagsulat: “Nagakinot gid ang akon walo ka tuig nga bata nga lalaki kag nakatipon sia sing mga $14. Apang, sang mahibal-an niya nga pila sa aton mga kauturan ang nadulaan sang tanan nila nga pagkabutang, handa sia nga iamot ang tanan niya nga tinipon sa pundo para sa mga biktima sang kalamidad.”

Sa idalom sang direksion sang mga Regional Building Committee (RBC), nga sa kinaandan nagadumala sa pagpatukod sang mga Kingdom Hall sang mga Saksi ni Jehova, gin-organisar ang mga grupo agod magbulig sa pagkaayo sang mga balay nga nahalitan sing baha. “Dapat ibalhag sang mga pamantalaan ang ginahimo ninyo diri,” siling sang isa ka tumalan-aw. Nagbalhin pa gani ang pagtamod sang iban sa mga Saksi ni Jehova. “Sadto,” siling sang isa ka Saksi nga ginikanan, “wala nagapamati ang akon mga bata, nga indi mga Saksi, kon nagapaathag ako sa ila tuhoy sa akon pagtuo. Apang karon nagapamati sila sa pinakauna nga tion!”

Ginbuligan man ang madamo nga indi Saksi. Halimbawa,  natandog gid ang isa ka babayi sang ang isa ka Saksi nag-abot sa iya balay sang 7:30 sa aga kag namangkot kon kinahanglan niya ang bulig. Dapat na maghalin ang babayi, bangod ginasulod na sang tubig ang iya balay. Apang sang nagbalik sia, may nasapwan sia nga sulat sa puertahan sang iya hardin nga halin sa mga Saksi. Ini nagasiling: “Kon kinahanglan mo ang bulig, pahibalua kami dayon.” Ginbuligan sia sang mga Saksi nga tinluan ang iya balay kag pagkabutang sang mga bun-od kag sagbot.

Isa ka grupo sang 100 ka Saksi ang nagkadto sa banwa sang Au agod buligan ang lokal nga mga Saksi kag ang ila mga kaingod. Nagpamalaybalay ang mga lider sang grupo sa pagpamangkot sa mga residente kon kinahanglan nila ang bulig. Nakibot gid ang mga tawo sang makita ang mga Saksi nga may dala nga mga galamiton sa pagsag-a kag pagpaninlo, subong sang mga bomba sa tubig, mga silhig, kag mga pala. Sa sulod lang sang mga inoras, natapos ang kinaandan isa ka semana nga ulubrahon sang mga tagbalay. Ang mga tawo nagaluhaluha samtang nagatan-aw.

Ginabanta nga mga 400 ka lokal nga mga Saksi ang nakigbahin sa hilikuton nga pagbulig​​—⁠masami wala pahuway nga nagatrabaho halin sa aga tubtob sa gab-i. Para sa mga nagapanilag, isa ini ka pinasahi nga pamatuod sa gahom sang tunay nga Cristianismo.

Nanghalit si Isidore sa Mexico

Si Isidore sa ginsuguran isa ka tropikal nga bagyo sa aminhan sang Venezuela. Nag-abot si Isidore sa Yucatán Peninsula sang Mexico sang Septiembre 22, 2002, subong kategoriya 3 nga mabaskog nga bagyo. Dala ang hangin nga 190 kilometros por ora kag mabaskog nga ulan, nagtuga ini sing pinakamalubha nga halit sa kasaysayan sang Yucatán kag Campeche nga mga estado sang Mexico, kag pila man ka halit sa estado sang Quintana Roo. Sa Yucatán lamang, mga 95,000 ka puluy-an ang malubha nga nahalitan, nga nag-apektar sa mga 500,000 ka pumuluyo.

Ang hilikuton sa pagbulig sang mga Saksi ni Jehova sa Yucatán epektibo gid amo nga ang isa ka pamantalaan sa naaminhan nga Mexico nagbalhag sini nga pangulong-dinalan: “Nag-abot sa Pagbulig ang mga Saksi ni Jehova.” Abanse nga gintukod ang isa ka komite sa pagbulig antes pa mag-abot ang bagyo. Ginhimos ang emerhensia nga mga ilistaran sang ginatos ka lokal nga mga Saksi. Ang kaingod nga mga kongregasyon naghatag sing emerhensia nga mga pundo. Ginpadala ang mga panapton, bulong, kag kapin sa 22 ka tonelada nga pagkaon sa nahalitan sing bagyo, lakip na sa indi mga Saksi. Ginpadala ang lokal nga mga gulang sa pagbisita kag pagpalig-on sa mga nahalitan ni Isidore.

Sang magkanay ang tiempo, gintukod ang lokal nga mga komite agod magpangita sa mga Saksi nga wala pa mahibaluan kon diin. Nahibaluan nga  madamo ang yara sa mga kakahuyan kag iban pa nga mga lugar nga wala sing pagkaon ukon tubig sa sulod sang tubtob tatlo ka adlaw. Ginlapawan sang tubig ang mga poste sang koryente sa pila ka mga lugar! Gani, mga sakayan de motor ang gingamit sa pagpangita sa mga biktima, pagdala sing pagkaon sa ila, kag pagsaylo sa ila sa mga lugar nga luwas sa katalagman.

Ang lokal nga mga awtoridad nagpahulam sang mga bangka kag iban pa nga kagamitan sa mga Saksi, nga nagtanyag nga magdala sing bulig sa mga lugar nga wala sing mangisog magkadto. Sang primero, indi magpasugot ang isa ka opisyal sang militar nga himuon sang mga Saksi ining makatalagam nga pagpangita. Apang, sang makita niya ang ila kaisog, sia nagsiling: “Kumbinsido ako nga ma-helikopter pa kamo, kon kinahanglanon, agod sagupon ang inyo mga masigkasumilimba. Handa ang amon mga salakyan nga magdul-ong sa inyo bisan diin ninyo luyag magkadto.”

Natingala ang tag-iya sang isa ka balaligyaan kon ngaa nagapamakal sing madamo nga tubig sa botelya ang mga Saksi. Ginpaathag nila nga para ini sa ila espirituwal nga mga utod kag iban pa nga nagakinahanglan sini. Ginhatag sang tawo sa ila ang tanan niya nga tubig sa botelya​​—⁠nga libre lang. Sang sunod nga adlaw, naghatag pa gid sia sing madamo gid nga tubig. Sa isa pa ka balaligyaan, namangkot ang isa ka kustomer sa mga Saksi kon ngaa nagabakal sila sing madamo nga pagkaon. Sang nahibaluan niya nga para ini sa mga biktima sang baha, naghatag sia sing donasyon agod magbakal pa gid sing mga pagkaon.

Bisan kapin sa 3,500 ka pamilya sang mga Saksi ang nawad-an sang materyal nga mga pagkabutang subong resulta sang pagpanghalit ni Isidore, wala sing bisan isa man nga Saksi ni Jehova ang nadula ukon napatay. Sa gihapon, bangod 331 ka puluy-an sang mga Saksi ang nahalitan ukon naguba, kinahanglan ang isa ka programa sa pagkaayo kag pagtukod-liwat. Ang mga Saksi nga may eksperiensia sa konstruksion nagbisita sa tagsa ka puluy-an kag Kingdom Hall agod bantaon ang kahalitan. Sa karon, mga 258 na ka puluy-an ang ginkaayo kag 172 na ka balay ang gintukod liwat. Ginatukod man liwat ang 19 ka Kingdom Hall nga nahalitan.

Ang isa ka gulang sa kongregasyon sa estado sang Yucatán napahulag nga magsiling: “Nabasa ko sa aton mga publikasyon ang pagbulig nga mga hilikuton sa iban nga mga pungsod. Apang, lain gid gali kon maeksperiensiahan mo ini. Napalig-on ako kag subong man ang madamo nga kauturan sang makita namon kon daw ano kaabtik magbulig kag mag-ulikid sa amon ang organisasyon ni Jehova kag ang aton mahal nga mga kauturan.”

Isa ka babayi ang nagsiling: “Malipay kuntani ako kon ang akon simbahan nagbulig man kaangay ninyo nga mga Saksi.” Kag isa pa ka babayi, nga ginsagop sang mga Saksi, ang nagsiling: “Salamat sa mga Saksi ni Jehova, buhi kami karon. Ginpakita nila ang ila gugma, nga nagrisgo sang ila kabuhi agod sagupon kami sang nalapawan na sing tubig ang amon balay.”

Ang Isa ka Bagyo Nanghalit sa Korea

Sang Agosto 31 kag Septiembre 1, 2002, nanghalit sa madamo nga lugar sa Korea ang bagyo nga si Rusa. Si Song-pil Cho, isa ka gulang sa kongregasyon nagsiling: “Daw nagapaligo ka sa idalom sang gripo nga waay untat nga nagatubod. Kag sigesige gid ang pagtupa sang ulan.” Kapin sa 870 milimetros sang ulan ang nagtupa sa sulod sang wala pa ang 24 oras​​—⁠ang pinakamabunok nga pagtupa sang ulan sa sulod sang isa ka adlaw sa kasaysayan sang Korea.

Suno sa The Korea Herald, sa bug-os nga pungsod 28,100 ka balay kag 85,000 ka ektarya sang ulumhan ang nalapawan sang baha. Napilitan maghalin ang mga 70,000 ka tawo. Ginpatay sang bagyo ang 301,000 ka kasapatan, ginlugdang ang 126 ka bapor, kag gintumba ang ginatos ka poste sang koryente. Kapin sa 180 ka tawo ang ginreport nga patay ukon nadula. Upod sa ila ang duha ka Saksi ni Jehova.

Kaangay sa Europa kag Mexico, maabtik nga nagresponder ang mga Saksi ni Jehova. Ang mga Saksi sa bug-os nga Korea nagpadala sing madamo nga donasyon. Lakip sini ang mga bayo, mga habol, kag iban pa nga mga kinahanglanon. Apang, may pila ka miembro sang kongregasyon nga yara sa mga lugar nga indi makadtuan kag mapakig-angutan. Guba ang mga dalan kag mga taytay. Wala sing koryente ukon telepono. Gani gin-organisar ang mga grupo agod sudlon ang amo nga mga duog kag maghatag sing kinahanglanon nga bulig. Si Song-pil Cho, nga nagpangabudlay upod sa isa sa mga grupo, nagsiling tuhoy sa isa ka lugar nga ila nakadtuan: “Guba ang pito ka taytay kag daku nga bahin sang dalan. Sang makalab-ot kami sa banwa, makita bisan diin lang ang nahalitan kag guba nga mga balay. Terible ang baho, kag nagalapta ang patay nga mga sapat. Apang nalipay gid kami sang makita namon ang amon anom ka Cristianong  kauturan! Nadula nila ang ila tanan materyal nga mga pagkabutang, apang buhi sila tanan kag luwas sa katalagman.”

Sa pagkamatuod, preparado gid ang mga Saksi ni Jehova sa sini nga kalamidad. Sanglit kinaandan na ang pagbaha kon tingulan, gin-umpisahan sang ila RBC sa Seoul nga organisahon ang hilikuton sa pagbulig kon may maabot nga mga kalamidad. Sugod sang 1997, naghiwat ini sing tuigan nga paghanas agod nga mangin handa ang mga boluntaryo sa pagresponder kon may magtuhaw nga emerhensia.

Sang Septiembre 2, nag-abot ang mga manugpangabudlay sang RBC sa sidlangan nga siudad sang Kangnŭng kag nagpahamtang sang ila ulong-talatapan sa lokal nga Assembly Hall sang mga Saksi ni Jehova. Ang panguna nga prioridad? Hatagan sing matinlo nga tubig ang mga nakalampuwas. Kon grabe ang pagbaha, kinaandan nga mahalitan ang mga tubo sang tubig; ang tubig baha tuman gid ka higko. Nagpadala ang RBC sang mga trak nga may daku nga tangke nga puno sing tubig sa apektado nga mga lugar.

Pagkatapos sang baha, ang tanan nga butang nabulit sa madamol kag malang-og nga lutak. Apang, gin-umpisahan ang isa ka epektibo nga metodo sa pagpaninlo. Sanglit human sa semento ang halos tanan nga mga puluy-an sa lugar, matinluan ini paagi sa pagkakas sang wallpaper kag linoleum sa mga kuarto kag papuswitan ini sang mabaskog nga tubig.

Indi na puede gamiton ang kalabanan de-koryente nga mga kagamitan nga nabahaan. Apang, kon bungkagon, tinluan sing maayo, pamalahon, kag kaayuhon dayon sang sangkol nga mga elektrisyan ang kagamitan subong sang mga refrigerator kag mga boiler pila ka adlaw pagkatapos sang baha, masami nga puede pa ini magamit. Sangkol ang RBC sa paghimo sini. Ang mga boiler nga indi na kinahanglan islan gingamit agod pamalhon ang mga balay. Ini nga proseso matapos sa sulod sang duha tubtob tatlo ka semana.

Ang nabahaan nga mga panapton kag mga habol kinahanglan labhan dayon sing maayo sa sulod sang pila ka adlaw pagkatapos sang baha kay kon indi, indi na ini puede magamit. Ang mga boluntaryo halin sa lokal nga kongregasyon sang mga Saksi ni Jehova nagbulig tipon sa mga nahigkuan nga mga pagkabutang sang ila Cristianong mga utod. Mabudlay kakason ang mantsa nga nagtapik sa sini nga mga panapton​​—⁠kag kinahanglan labhan ang mga panapton sa tuman ka tugnaw nga sapa. Pagkatapos mahibaluan sang isa ka reporter ini nga pagsakripisyo, ginbalhag sa isa ka lokal nga pamantalaan ang isa ka daku nga laragway sang mga Saksi nga nagapanglaba.

Gin-anod sang makahalalit nga baha sa Europa, Aminhan nga Amerika, kag Asia ang mga balay, pagkabutang, kag madamo nga kabuhi. Bisan makahalanusbo ini, ining mga hitabo kinaandan na sa sining “katapusan nga mga adlaw” sining sistema sang mga butang, nga gintandaan sang “makahalanguyos nga mga tion nga mabudlay pakigbagayan.” (2 Timoteo 3:1) Mahimo nga ining mga trahedya isa man ka maathag nga pagpahanumdom sa sining katunayan: Ang matuod nga mga Cristiano may gugma sa tagsatagsa kag sa ila isigkatawo. Ining di-makagod nga gugma isa ka butang nga indi maanod sang bisan ano nga baha.

[Retrato sa pahina 14]

ALEMANYA—Puluy-an nga nahalitan sang bagyo

[Mga retrato sa pahina 15]

ALEMANYA—Kapin sa 2,000 ka boluntaryo ang maabtik nga naghatag sing bulig

[Mga retrato sa pahina 16]

AUSTRIA—Pagkaayo sa ila Kingdom Hall sa Ottensheim

Sa wala: Isa ka grupo sang mga boluntaryo nga nagbalik halin sa Au, diin nagbulig sila sa lokal nga mga Saksi kag sa ila mga kaingod

[Mga retrato sa pahina 17]

MEXICO—Sa tuo: Ang isa ka komite sang pagbulig nag-aman sang ilimnon nga tubig sa mga nakalampuwas sa bagyo

Sa ubos: Nagapatindog liwat sang balay

[Mga retrato sa pahina 19]

KOREA—Wala pa tuo: ginbahaan nga bahin sang siudad; nagapaninlo paagi sa pagpapuswit sang mabaskog nga tubig; nagapanglaba sa malapit nga sapa