Isa ka Timbang nga Pagtamod sa Moda

ANG Biblia nagasiling nga ang Dios ‘naghimo sang tanan nga butang nga matahom sa tion sini.’ (Manugwali 3:11) Makita naton ang katahom bisan diin sa kalibutan sa palibot naton. Makita man naton ini sa mga tawo.

Tulumuron sang manugdesinyo sang moda nga patahumon kita paagi sa mga panapton nga aton ginasuksok. Apang subong sang ginpakita sa nagligad nga artikulo, ginbag-o man sang industriya sang moda ang kahulugan sang katahom. Ang propesor sa sikolohiya nga si Ruth Striegel-Moore nagsiling: “Naanad na gid kita nga makakita sing tuman kaniwang nga mga babayi, kag ginahunahuna naton nga amo ini ang matahom.”

Maathag nga indi maalamon nga tugutan naton nga ipiton kita nga magpahisuno sa konsepto karon sang kalibutan sa katahom. Sa iya libro nga Always in Style, ginpatalupangod ni Doris Pooser nga “indi kinahanglan nga bag-uhon ukon ihinago sang babayi karon ang iya lawas kon may bag-o nga ‘estilo’ nga magatuhaw.” Sa pagkamatuod, ngaa abi tugutan naton ang media nga ipatuman ang kaugalingon  nga estilo sini? “Daw ano kahapos nga mangin kontento kon ano gid kita, sa baylo nga magtinguha sing mabinalak-on nga bag-uhon ang aton dagway,” siling ni Pooser.

Wala Nagalubad nga Katahom

Ang kompiansa sa kaugalingon kag kaayawan sa kabuhi wala lamang nasandig sa pisikal nga katahom. “Ang matuod nga kalipay nagagikan sa sulod,” sulat ni Judy Sargent, nga nagbalatian anay sang anorexia. “Wala ini nasandig sa kabug-aton sang isa.” Mas madalom pa ang ginasiling sang Biblia tuhoy sa sini. “Ang imo katahom,” sulat ni apostol Pedro, “dapat amo ang imo matuod nga pagkatawo, ang wala nagalubad nga katahom sang malulo kag malinong nga espiritu, nga amo ang may daku nga balor sa panulok sang Dios.”​—⁠1 Pedro 3:​4, Today’s English Version.

Ang wala nagalubad nga katahom nga ginapatuhuyan ni Pedro nagalabaw sa pisikal nga kaanyag bangod sang pagkapermanente sini kag sang balor sini sa mga mata sang Dios. Sang madamong siglo na nga nagligad ang isa ka maalam nga hari nagsiling: “Ang kaalikaya mahimo nga malimbungon, kag ang katahom mahimo nga wala sing pulos; apang ang babayi nga nagakahadlok kay Jehova amo ang isa nga nagaagom sing kadayawan para sa iya kaugalingon.”​—⁠Hulubaton 31:30.

Bisan pa ang pisikal nga katahom mahimo nga mas makagalanyat sa karon, madamo gihapon ang nagatahod sa tawo nga nagapadayag sing Cristianong mga kinaiya. Ginlaygayan ni apostol Pablo  ang mga Cristiano: “Magsul-ob kamo sing bag-o nga personalidad, . . . sing mapinalanggaon nga gugma nga may kaawa, kaayo, nagapaubos nga panghunahuna, kalulo, kag pagkamainantuson.”​—⁠Colosas 3:​10, 12.

Ang moda suno sa kinaugali gid sini umalagi lamang. Bisan pa maayo ini, masuksok naton ang pinakabag-o nga estilo sa malip-ot lamang nga tion. Apang ang bisan ano nga maayo nga impresyon sa aton maguba gilayon kon ang aton dagway wala ginaupdan sang maayo nga personalidad. Dumduma nga ang “mga bunga sang espiritu”​—⁠nga nagalakip sang mga kinaiya nga gugma, kalipay, paghidait, pagkamapinasensiahon, pagkaayo, kag pagpugong sa kaugalingon​—⁠wala gid nagalipas.​—⁠Galacia 5:​22, 23; 1 Timoteo 2:​9, 10.

Matuod, nagakaigo nga hatagan naton sing igtalupangod ang aton panapton. Ginabaton ni Aline nga taga-Pransia, nga isa ka hangkat ang mangin timbang sa sini. “Subong isa ka tin-edyer,” siling niya, “interesado gid ako sa mga panapton. Luyag ko magsunod sa pinakabag-o nga moda bangod nagahatag ini sa akon sing kompiansa. Kag kon makabakal ako sing mga panapton nga may tatak sang bantog nga manugdesinyo, mas labi nga maayo.

“Apang sang nagdaku na ako,” siling pa ni Aline, “dapat ko sakdagon ang akon kaugalingon sa pinansial, kag madamo man nga tion ang ginahinguyang ko sa Cristianong ministeryo. Narealisar ko nga kon luyag ko magkabuhi suno sa masarangan ko, indi na ako dapat magpaulipon sa moda. Nagbakal ako sing mga panapton sa tion nga ginabaratilyo ini ukon sa barato nga mga balaligyaan. Nasapwan ko nga makabayo gihapon ako sing maayo​—⁠apang sing mas barato. Ang sekreto amo ang pagtuon sa pagbakal sing mga panapton nga angay sa imo, praktikal, bagay sa iban mo nga mga panapton, kag wala nagalipas gilayon. Sa baylo nga magpadikta sa moda kon ano ang dapat ko baklon, ginapili ko karon ang estilo nga angay sa akon. Wala ko ginasiling nga indi na importante sa akon ang panapton. Apang ang akon balor wala lamang nasandig sa akon dagway.”

Sa katilingban diin ang pisikal nga dagway ginakabig nga mas importante sangsa mga kinaiya, dapat dumdumon sang mga Cristiano ang pahanumdom sang Biblia: “Ang tanan nga mahatag sang kalibutan, ang tanan nga nagapaayaw sa gana ukon makabilihag sa mga mata, ang tanan nga ganyat sang kabuhi sini, wala maghalin sa Amay kundi naghalin sa wala-dios nga kalibutan. Kag ini nga kalibutan nagataliwan upod ang tanan nga pangganyat sini, apang sia nga nagahimo sang kabubut-on sang Dios magapabilin tubtob san-o.”​​—⁠1 Juan 2:​16, 17, The New English Bible.

[Retrato sa pahina 9]

Ang matuod nga katahom nagahalin sa nasulod nga pagkatawo, indi sa kon ano ang imo ginasuksok

[Retrato sa pahina 10]

Pilia ang mga panapton nga praktikal kag bagay sa iban mo nga mga panapton