Dapat Bala Ako Magpapika?
Pamangkot sang mga Pamatan-on . . .
Dapat Bala Ako Magpapika?
“Ang iban nga mga pika matahom gid kaayo.”—Jalene. *
“Duha ka tuig ko nga ginhandum nga magpabutang sang akon nahauna nga pika.”—Michelle.
ANG mga pika makita bisan diin—ukon daw amo sini. Ginapadayaw ini sang mga rock star, bantog nga mga humalampang, mga modelo, kag mga artista. Ginailog sila sang madamo nga mga tin-edyer, sa amo ginapabugal ang ila mga pika sa ila abaga, kamot, hawak, kag bukobuko. Si Andrew nangatarungan: “Ang mga pika uso. Personal nga desisyon sang isa kon bala magapapika sia ukon indi.”
Ang World Book Encyclopedia nagasiling: “Ang pagpika amo ang paghimo sing permanente nga mga desinyo sa lawas. Ginahimo ini paagi sa pagtuslok sing magagmay nga mga buho sa panit nga gamit ang mataliwis nga kahoy, tul-an, ukon dagom nga gintusmog sa mga pigment nga may natural nga mga duag.”
Bisan pa mabudlay tipunon ang eksakto nga mga estadistika, ginabanabana sang isa ka reperensia nga 25 porsiento sang tanan nga 15- tubtob 25-anyos sa Estados Unidos ang may pika. Si Sandy nagsiling: “Popular ini.” Ngaa naganyat gid ang pila ka pamatan-on sa mga pika?
Ngaa Popular Gid?
Para sa iban, ang pika isa ka paagi sang pagpakita sing tumalagsahon nga pagkaromantiko. Si Michelle nagasaysay: “Ang bukobuko sang akon magulang may ngalan sang babayi nga gina-date niya anay.” Ang problema? “Indi na sia ang iya gina-date.” Suno sa magasin nga Teen, “ginabanabana sang mga doktor nga kapin sa 30 porsiento sang tanan nga pagpanas sa pika ang ginahimo sa mga dalagita nga luyag ipapanas ang ngalan sang ila anay nobyo.”
Ang iban nga mga pamatan-on natahuman gid sa mga pika. Ginakabig naman ini sang iban subong simbulo sang pagkaindependiente. “Ako ang may kontrol sa akon kabuhi,” siling ni Josie, nagadugang nga ang pagpapika amo “lamang ang importante nga desisyon nga akon nahimo sa kabuhi.” Ang pagpika nagapahanugot sa iban nga mga pamatan-on nga tilawan ang isa ka bag-o nga butang
—agod magbatyag nga sila ang may kontrol sa ila hitsura. Ang mga pika nangin simbulo man sang pagrebelde ukon sang indi kinaandan nga mga estilo sang pagkabuhi. Amo kon ngaa ang iban nga mga pika nagaunod sang malaw-ay nga mga tinaga kag sang mga laragway ukon makapulukaw nga mga islogan.Apang, ang kalabanan nga mga pamatan-on mahimo nagasunod lamang sa uso. Apang bangod lamang bala daw halos tanan nagapapika, dapat ka man magpapika?
Ang Dumaan nga Arte sang Pagpika
Ang pagpika indi na bag-o. Natukiban ang may pika nga mga mummy sa Egipto kag Libya nga mahimo nagkabuhi ginatos ka tuig antes sang panahon ni Cristo. Ang may pika nga mga mummy natukiban man sa Bagatnan nga Amerika. Madamo sa ginpika nga mga larawan ang direkta nga may kaangtanan sa pagsimba sa pagano nga mga diosdios. Suno sa mananalawsaw nga si Steve Gilbert, “ang pinakauna nga nakilal-an nga pika amo ang isa ka larawan nga nagarepresentar sa diosdios nga si Bes. Sa mitolohiya sang Egipto si Bes amo ang maulag nga dios sang kagansal.”
Talalupangdon nga gindumili sang Mosaikong Kasuguan ang pagpapika sang katawhan sang Dios. Ang Levitico 19:28 nagsiling: “Dili ninyo pagpilasan ang inyo unod bangod sa napatay nga kalag, kag dili kamo magbutang sing bisan ano nga pika sa inyo kaugalingon. Ako amo si Jehova.” Ang pagano nga mga sumilimba, subong sang mga Egiptohanon, nagpika sang mga ngalan ukon mga simbulo sang ila mga diosdios sa ila mga dughan ukon mga butkon. Paagi sa pagsunod sa pagdumili ni Jehova tuhoy sa pagbutang sing mga pika, ang mga Israelinhon nakilal-an nga tuhay sa iban nga mga pungsod.—Deuteronomio 14:1, 2.
Bisan pa ang mga Cristiano karon wala napaidalom sa Kasuguan ni Moises, ang pagdumili sa pagpika serioso gid. (Efeso 2:15; Colosas 2:14, 15) Kon isa ikaw ka Cristiano, pat-od nga indi mo luyag magbutang sing mga marka sa imo lawas—bisan sing temporaryo lamang—nga nagapahanumdom sa isa sa paganismo ukon sa butig nga pagsimba.—2 Corinto 6:15-18.
Mga Katalagman sa Kapagros
Dapat mo man binagbinagon ang epekto sa kapagros. Si Dr. Robert Tomsick, isa ka kabulig nga propesor sa dermatolohiya, nagkomento: “Ginatuslok mo ang panit kag ginasal-ot ang butang nga may duag. Bisan pa manabaw lamang ang pagdulot sang dagom, sa tion nga ginatuslok mo ang panit, may katalagman nga maimpeksion ikaw sa kagaw ukon mikrobyo. Sa banta ko [ang pagpapika] isa ka makatalagam gid nga butang nga himuon.” Si Dr. Tomsick nagpadayon: “Pagkatapos masal-ot ang butang nga may duag, bisan pa indi maimpeksion, yara pirme ang katalagman nga ma-dermatitis kag maalerdyi nga ginatunaan sang pagpalamula, pagbanog, pagkugan kag pagkatol sang panit.”
Walay sapayan sang katuyuan nga mangin permanente ang mga pika, lainlain nga mga pamaagi ang ginagamit agod tilawan nga panason ini: Pagpanas paagi sa laser (pagsunog sa pika), pagpanas paagi sa pag-opera (paglihap sa pika), dermabrasion (pagnusnos sing alambre nga brotsa sa panit agod kuhaon ang naibabaw nga bahin sang panit kag naidalom nga anib sang panit), salabrasion (paggamit sing gintunaw nga asin agod huluman kag sa amo palus-awon ang pika), kag scarification (pagpanas sa pika paagi sa gintimpla nga asido kag pagbilin sing pinalian sa baylo sini). Ini nga mga pamaagi mahal kag masakit. “Mas masakit magpapanas sing pika paagi sa laser sangsa magpapika,” siling sang magasin nga Teen.
Ano ang Hunahunaon sang Iban?
Dapat mo man binagbinagon kon ano ang hunahunaon sang iban kon may pika ka, kay madamo ang indi pabor sa sini. (1 Corinto 10:29-33) Bangod sa kapritso, si Li, isa ka babayi nga taga-Taiwan, nagpapika sa edad nga 16 anyos. Beinte-uno anyos na sia karon kag nagaopisina. “Nasaw-ahan ako kon ginahimutaran sang akon mga katrabaho ang akon pika,” siling ni Li. Si Theodore Dalrymple, isa ka manugpangabudlay sa kapagros sa hunahuna sa Britanya, nagsiling nga para sa madamo nga mga tawo, ang mga pika “amo sa masami ang kitaon nga tanda nga ang isa ka tawo . . . katapo sang isa ka masingki, mapintas, kontra-sosyal, kag kriminal nga grupo.”
Ang isa ka artikulo sa magasin nga American Demographics nagkomento man: “Maathag nga ginakabig nga makatalagam sang kalabanan nga mga Amerikano ang kitaon nga arte sa lawas. Kawaluan kag lima ka porsiento [sang mga pamatan-on] ang nagaugyon sa pinamulong, ‘ang mga tawo nga may kitaon nga mga pika . . . dapat makahisayod nga ini nga sahi sang pagpabutyag sang kaugalingon mahimo makaupang sa ila karera ukon personal nga mga relasyon.’ ”
Binagbinaga man kon bala ang pagpamat-od nga magpapika magapabaskog ukon magapaluya sa imo ginasiling nga isa ikaw ka Cristiano. Mahimo bala nga mangin “kabangdanan [ini] sang kasandaran” sa iban? (2 Corinto 6:3) Matuod, nagpapika ang iban nga mga pamatan-on sa indi kitaon nga bahin sang ila lawas. Bisan gani ang ila mga ginikanan mahimo wala makahibalo sining sekreto nga mga pika. Apang mag-andam ka! Ang imo sekreto mahimo mabuyagyag bangod sang isa ka emerhensia nga pagpakonsulta sa doktor ukon pagpaligo sa eskwelahan! Mas maayo nga “maggawi sing bunayag sa tanan nga butang,” sa amo ginalikawan ang binuang nga paglimbong.—Hebreo 13:18.
Kaangay sang tanan nga uso, ang mga pika mahimo maglipas. Sa pagkamatuod, may panapton bala—ayhan isa ka delargo, kamisadentro, bayo, ukon sapatos—nga paborito mo gid amo nga gusto mo ini suksukon sa bug-os mo nga kabuhi? Siempre wala! Ang mga estilo, tabas, kag duag nagalipas. Apang, indi kaangay sa panapton, ang mga pika indi madali kuhaon. Isa pa, ang “uso” sa imo sang 16 anyos ka mahimo nga lipas na kon mag-30 anyos ka na.
Ginhinulsulan sang madamo ang permanente nga mga pagbag-o nga ginhimo nila sa ila hitsura. “Nagpapika ako antes ako makatuon tuhoy kay Jehova,” panaysayon ni Amy. “Pirme ko ini ginatago. Kon makita ini sang iban sa kongregasyon, nahuya ako.” Ang mensahe? Magpamensar anay antes magpapika. Indi maghimo sing desisyon nga hinulsulan mo sa ulihi.
[Nota]
^ par. 3 Ang iban nga mga ngalan gin-islan.
[Retrato sa pahina 20]
Ang mga pika masunson ginabuylog sa rebelyuso nga mga estilo sang pagkabuhi
[Retrato sa pahina 20]
Sang ulihi, madamo ang naghinulsol nga nagpapika sila
[Retrato sa pahina 21]
Magpamensar anay antes magpapika