Mga Yabi sa Isa ka Madinalag-on nga Pag-asawahay

“Ang hustuhan lang nga pagpanunto: amo ini ang yabi sa isa ka madinalag-on nga romantiko nga kaangtanan,” siling sang La Presse. Ang pamantalaan sang Canada nagareport tuhoy sa isa ka pagtuon nga naghimo sa pagbinutig nga isa ka maayo nga kinaiya. Ginbalhag ang pagtuon sa Journal of Social and Personal Relationships. Si Propesor Tim Cole, sang De Paul University, Chicago, E.⁠U.⁠A., nagsiling: “Paagi sa hustuhan lang nga pagpanunto [ukon pagbinutig], maproteksionan naton ang [isa ka romantiko nga] kaangtanan.”

Apang, ang pagpanunto yabi gid bala sa isa ka madinalag-on nga pag-asawahay? Ang Biblia nagapalig-on sa mga Cristiano: “Karon nga gindula na ninyo ang kabutigan, maghambal sing kamatuoran ang tagsatagsa sa inyo sa iya isigkatawo.” (Efeso 4:25) Epektibo bala ini nga laygay? Sang ang isa ka abogado sa diborsio ginpamangkot, Ano ang pinakadaku gid nga rason kon ngaa nagabulagay ang mga mag-asawa? sia nagsabat: “Ang kapaslawan sa paghambalanay sing tampad, pagpabutyag sang ila ginabatyag kag ginahunahuna, kag pagtamod sa kada isa subong ila pinakamahirop nga abyan.”

Ano, nian, ang sekreto sang isa ka malipayon nga pag-asawahay? Ang kapitulo 3 sang libro nga Ang Sekreto Sang Kalipay sa Pamilya ginatig-uluhan “Ang Duha ka Yabi sa Nagadugay nga Pag-asawahay.” Ginabinagbinag sini ang duha ka importante nga butang nga nagapaposible sa malipayon nga pag-updanay sang mag-asawa, nga nagabukas sang ganhaan padulong sa kalipay. Mahimo ka makapangabay sing kopya sini nga libro paagi sa pagsulat sa kaupod nga kupon kag ipadala sa direksion nga ginpakita sa kupon ukon sa nagakaigo nga direksion sa pahina 5 sini nga magasin.

□ Luyag ko mabaton ang isa ka kopya sang libro nga Ang Sekreto Sang Kalipay sa Pamilya.

□ Palihug pakig-anguti ako tuhoy sa isa ka wala sing bayad nga pagtuon sa Biblia.