Pagduaw sa Jerusalem sa Quebec

MAHANDURAW lamang sang mga dumuluaw sa modernong-adlaw nga Jerusalem kon ano gid ang hitsura sini sadtong mga panahon sang Biblia. Apang, makita mo ang isa ka pinasahi nga talan-awon sining dumaan nga siudad mga 8,500 kilometros sa katundan sang Jerusalem sa isa ka diutay nga banwa nga nahamtang sa higad sang St. Lawrence River sa Canada. Didto, makita sang mga dumuluaw ang malapad nga talan-awon sang Jerusalem kag sang mga palibot sini. Apang, paano ini nangin posible? Ipaathag ini sang masunod.

Sa isa ka matipulon nga edipisyo sa banwa sang Sainte Anne de Beaupré, Quebec, nahamtang ang isa sa pinakadaku nga mga laragway sa bug-os nga kalibutan, ang Great Cyclorama of Jerusalem. Ining daku gid nga dibuho nagataas sing 14 metros kag may sirkumperensia nga 110 metros. Bisan pa indi sibu ang tanan nga mga detalye sini, ang dibuho talalupangdon gihapon para sa mga estudyante sang Biblia, bangod nagahatag ini sing daw buhi gid nga paglarawan sang pangabuhi sa Jerusalem sa panahon sang Biblia.

Kon ginalantaw ini gikan sa plataporma sa sentro sang edipisyo, makita sang mga dumuluaw ang kaumhan sa palibot sang unang-siglo nga Jerusalem. Samtang ginasundan sang ila mata ang bug-os nga 360-degree nga talan-awon, makita nila ang bantog nga siudad upod ang prominente nga mga pader, matahom nga templo, kag elegante nga mga palasyo sini. Sa unahan nga bahin sang nagalibot nga dibuho, may isa pa ka daw buhi nga talan-awon nga nagalaragway sa hingapusan nga mga tinion ni Jesus sa duta. Ining talalupangdon nga dibuho daw buhi gid lantawon amo nga mabatyagan sang mga nagalantaw nga daw kaupod sila sa talan-awon, nagalakat upod sa mga tawo sa mga dalan sang Jerusalem.

Makatilingala nga ining makakulunyag nga daw buhi gid nga laragway indi ginhimo karon lang. Sa katunayan, ginhimo ini ni Paul Philippoteaux, isa ka bantog nga pintor nga taga-Paris, halin sang 1878 tubtob 1882. Lima pa ka pintor​​—⁠duha ka taga-Estados Unidos, duha ka taga-Pransia, kag isa ka taga-Inglaterra⁠​—⁠ang nagbulig sa iya agod mahuman ang iya obra-maestra. Apang, ang orihinal nga ideya sang dibuho ginpatungod sa Aleman nga pintor nga si Bruno Piglhein, nga determinado gid sa paghimo sing paagi agod tadlungon ang pagkawalay namang-an sang mga tawo tuhoy sa adlaw-adlaw nga pagkabuhi sa panahon sang Biblia. Sang mahuman ini sa Munich, Alemanya, gin-eksibit ini sa bantog nga mga kabisera sang Europa. Sugod sang 1895 nangin permanente ini nga eksibit sa Canada.

[Picture Credit Line sa pahina 31]

All photos: Cyclorama de Jérusalem inc.