Ang Pagtamod sang Biblia

Kon ang Imo mga Paryente Indi Mo Karelihion

SUNO sa isa ka pagbulubanta, may kapin sa 10,000 ka relihion kag sekta sa kalibutan. Sa isa ka pungsod mga 16 porsiento sang populasyon sang mga adulto ang nag-ilis sing relihion sa pila ka tion sa ila kabuhi. Busa, indi katingalahan nga wala nagaugyunay ang mga magparyentehanay kag mga mag-abyan tuhoy sa relihioso nga mga pagtuluuhan. Kon kaisa ginaguba sini ang mga kaangtanan. Gani ang pamangkot amo, Paano tratuhon sang mga Cristiano ang ila mga paryente nga indi nila karelihion?

Isa ka Pinasahi nga Kaangtanan

Halimbawa, binagbinaga ang ginasiling sang Biblia tuhoy sa pinasahi nga kaangtanan sa ulot sang mga ginikanan kag sang ila mga kabataan. Ang sugo sa Exodo 20:12 nga “tahura ang imo amay kag ang imo iloy” wala nagatalana sing tion. Ang matuod, sa pagbinagbinag ni Jesus sa sini nga sugo, nga narekord sa Mateo 15:​4-6, maathag nga ginapatuhuyan niya ang pagtahod nga dapat ipakita sang adulto nga mga kabataan sa ila mga ginikanan.

 Nagapaandam ang tulun-an sang Hulubaton sa Biblia batok sa di-pagtahod sang isa sa iya mga ginikanan. Ang Hulubaton 23:22 nagalaygay nga ‘indi mo pagtamayon ang imo iloy bangod lamang tigulang na sia.’ Sing maathag, ang Hulubaton 19:26 nagapaandam nga ang isa nga “nagapintas sa amay kag nagalagas sa iloy isa ka anak nga nagagawi sing makahuluya kag talamayon.”

Maathag gikan sa Kasulatan nga indi naton dapat pagpatumbayaan ang aton mga ginikanan. Ang indi pagbaton sang aton mga ginikanan sa aton relihion wala nagabugto sang aton kaangtanan sa ila. Ini nga mga prinsipio sang Biblia naaplikar man sa iban nga mga paryente kag sa tiayon sang isa. Busa, ang mga Cristiano may moral kag Makasulatanhon nga obligasyon nga higugmaon ang ila mga paryente.

Importante Gid ang Pagkarasonable

Sa pagkamatuod, ang Biblia nagapaandam batok sa malain nga kaupdanan, kag ining impluwensia mahimo maghalin sa aton mga paryente. (1 Corinto 15:33) Madamong matutom nga mga alagad sang Dios sang nagligad ang nanindugan sa kon ano ang matarong bisan pa wala mag-ugyon ang ila mga ginikanan. Amo sini ang ginhimo sang mga anak ni Kore. (Numeros 16:​32, 33; 26:​10, 11) Ang matuod nga mga Cristiano indi dapat magkompromiso sang ila pagtuo agod pahamut-an ang iban, bisan pa ang ila mga paryente.​​—⁠Binuhatan 5:⁠29.

Sa pila ka kahimtangan ginapamatukan gid sang mga ginikanan ukon mga paryente ang pagtuluuhan sang isa ka Cristiano. Ang iban mahimo pa gani nga mangin mga kaaway sang matuod nga Cristianismo. Sa sini nga mga kaso ang mga Cristiano nagahimo sing makatarunganon nga mga tikang agod amligan ang ila espirituwalidad. Nagakaigo gid ang ginsiling ni Jesus: “Ang mga kaaway sang tawo amo ang mga tawo sang iya mismo panimalay. Sia nga nagahigugma sa amay ukon iloy sing labi pa sa akon indi takus sa akon; kag sia nga nagahigugma sa anak nga lalaki ukon anak nga babayi sing labi pa sa akon indi takus sa akon.”​​—⁠Mateo 10:​36, 37.

Apang, sa kalabanan nga mga hitabo, ang mga Cristiano wala ginapamatukan sang ila mga paryente. Ang ila mga paryente wala lamang nagabaton sang mga panudlo sang Biblia. Ginpalig-on sang Balaan nga Kasulatan ang mga sumulunod ni Cristo nga tratuhon ang mga di-tumuluo sing “malulo” kag “may tudok nga pagtahod.” (2 Timoteo 2:​25; 1 Pedro 3:15) Nagakaigo gid nga ang Biblia nagalaygay: “Ang ulipon sang Ginuo indi dapat makig-away, kundi dapat mangin mainayuhon sa tanan.” (2 Timoteo 2:24) Si apostol Pablo naglaygay man sa mga Cristiano nga “dili maghambal sing mahaliton kay bisan sin-o, dili mangin palaaway, mangin makatarunganon, nagapakita sing bug-os nga kalulo sa tanan nga tawo.”​​—⁠Tito 3:2.

Padayon nga Pakig-anguti ang Imo mga Paryente kag Ipabatyag ang Gugma

Sa 1 Pedro 2:​12, ang mga Cristiano ginpalig-on: “Hupti nga maayo ang inyo paggawi sa tunga sang mga pungsod [mga di-tumuluo] agod . . . himayaon nila ang Dios sa adlaw sang iya pag-usisa bangod sang inyo maayong mga buhat nga ila mismo nakita.” Sing masami, makita sang aton mga paryente nga indi naton karelihion ang mga pagbag-o sa aton kabuhi bangod sang pag-aplikar sang mga prinsipio sang Biblia. Dumduma nga madamo sang wala anay nagasapak ukon nagapamatok pa gani sa kamatuoran sang Biblia ang nagbag-o sang ila panghunahuna. Mahimo nga madamong tinuig sang suod nga pagpanilag sa maayo nga pagginawi sang isa ka tiayon ukon sang isa ka bata ang magalipas antes mangusisa ang pila ka indibiduwal kon ano ang rason sa sini nga pagginawi. Kon ang mga tawo indi magbaton sang mga kamatuoran sa Biblia, kabay nga indi kuntani ini bangod ginpatumbayaan sila sang ila paryente nga Cristiano.

Matuod, nanuhaytuhay ang mga kahimtangan, kag ang iban nga Cristianong mga Saksi nagaistar malayo sa ila mga ginikanan. Mahimo indi posible nga maduaw sila pirme subong sang ila luyag. Apang, paagi sa pagsulat, pagtelepono, ukon tayuyon nga pagkomunikar sa ila sa iban pa nga pamaagi, mapabatyag naton sa aton mga paryente ang aton pagpalangga sa ila. Madamo sang indi matuod nga mga Cristiano ang nagahigugma sang ila mga ginikanan kag iban pa nga mga paryente kag tayuyon nga nagakomunikar sa ila walay sapayan sang ila relihion. Indi bala dapat amo man sini ang himuon sang Cristianong mga Saksi?

[Retrato sa pahina 28]

Paagi sa pagpakig-angot sa imo mga paryente, mapabatyag mo sa ila ang imo pagpalangga