Minilyon ang Magatambong—Magatambong Ka Bala?

▪SA DIIN? Sa “Himayaa ang Dios” Distrito nga Kombension nga hiwaton sa ginatos ka lokasyon sa bug-os nga kalibutan. Ang tatlo-ka-adlaw nga programa ginhanda sang mga Saksi ni Jehova agod buligan ang tanan nga nagahigugma sa Dios nga magkabuhi sa paagi nga nagadala sing kadungganan nga nagakabagay para sa ila Manunuga.

Ang una nga adlaw sang kombension magahatag sing igtalupangod sa tema nga “Takus ka, Jehova, . . . sa Pagbaton Sang Himaya.” (Bugna 4:​11) “Ang mga Tinuga Nagapahayag Sang Himaya Sang Dios” amo ang tig-ulo sang isa ka pamulongpulong nga magapahangop sa aton kon paano ang mga kinaiya ni Jehova “maathag nga makita,” ukon “mahantop paagi sa mga butang nga ginhimo.” (Roma 1:​20) Ang makapalig-on nga keynote address, “Ang Mahimayaon nga Matagnaon nga mga Palanan-awon Nagapapagsik sa Aton!,” magapalig-on sa tanan nga dumdumon gid pirme ang importante nga mga hitabo nga gintagna sa Pulong sang Dios para sa aton adlaw. “Ang Tagna ni Amos​—Ang Mensahe Sini sa Aton Adlaw” amo ang tig-ulo sang tatlo-sing-bahin nga simposium nga magapadaku sang modernong-adlaw nga aplikasyon sang mga paandam sini nga manalagna sang una. “ ‘Ang Maayo nga Duta’​—Laragway Sang Paraiso” labi nga magapahangop sa aton sang duta nga ginhatag ni Jehova sa iya dumaan nga katawhan.

Ang ikaduha nga adlaw sang kombension may tema nga “Ipahayag ang Iya Himaya sa Tunga Sang mga Pungsod,” pasad sa Salmo 96:3. Isa sa mga talalupangdon nga bahin amo ang isa ka simposium nga natig-uluhan “Ipabanaag Kaangay Sang Salaming ang Himaya ni Jehova.” Ibalay sining tatlo-sing-bahin nga presentasyon kon paano kita mangin labi pa ka epektibo sa pagtuman sang aton ministeryo. Ang pamulongpulong nga “Gindumtan nga Wala Sing Kabangdanan” pagasundan sang diskurso sa dedikasyon kag bawtismo​—isa ka bahin sa tanan nga mga kombension sang mga Saksi ni Jehova. Sa hapon ang pamulongpulong nga “Mag-andam sa ‘Tingog sang mga Estranghero’ ” magahatag sing sibu sa tion nga laygay nahanungod sa “butig nga mga manunudlo” nga nagatinguha nga limbungan ang katawhan sang Dios paagi sa “pahituhito nga mga pulong.” (2 Pedro 2:​1, 3) “Ang Aton nga mga Kabataan​—Isa ka Hamili nga Palanublion” magatakop sang programa sa amo nga adlaw. Isa gid ini ka makalilipay nga okasyon para sa mga ginikanan kag sa mga kabataan.

Ang hingapusan nga adlaw sang kombension magapaathag sang tema nga “Himua ang Tanan nga Butang sa Kahimayaan Sang Dios.” (1 Corinto 10:31) Ang pamulongpulong nga natig-uluhan “Kon Paano Ginadayaw Sang mga Pamatan-on si Jehova” may isa ka serye sang mga interbyu. Ang sesyon sa aga magalakip man sa 45-minutos nga drama nga natig-uluhan “Pagpanaksi nga May Kaisog Walay Sapayan Sang Pagpamatok.” Bangod yara pirme ang relihion sa balita, sabton sang diskurso publiko ang pamangkot nga, “Sin-o sa Karon ang Nagahimaya sa Dios?” Ang kombension matapos sa isa ka makapalig-on nga pamulongpulong nga “ ‘Padayon Kamo nga Magpamunga Sing Madamo’ sa Kahimayaan ni Jehova.”

Pila lamang ini sa mga halimbawa sang makapahulag nga mga presentasyon nga mabatian sa “Himayaa ang Dios” Distrito nga Kombension sang mga Saksi ni Jehova. Pat-od nga luyag mo gid tambungan ang tatlo ka adlaw. Para sa lokasyon sang kombension nga malapit sa inyo, kontaka ang Kingdom Hall sang mga Saksi ni Jehova sa inyo duog ukon sulati ang mga manugbalhag sini nga magasin.