Pamangkot sang mga Pamatan-on . . .

Paano Ako Makahalin sa Landong sang Akon mga Ginikanan?

“Ang akon amay isa ka kilala nga gulang sa isa ka kongregasyon sang mga Saksi ni Jehova. Ginatahod ko sia, apang kon kaisa naugot ako nga diin man ako makadto nakilal-an ako bilang bata ni Bill.”​​—⁠Larry.⁠ *

“Bangod ang akon amay isa ka kilala nga gulang, nabatyagan ko nga mataas ang ginapaabot sang tanan sa akon, kag nabudlayan gid ako nga maggawi kon ano gid ako.”​​—⁠Alexander.

SAMTANG nagahamtong ka, natural lang nga luyag mo mangin independiente diutay​​—⁠agod makatukod ka sang imo kaugalingon nga ngalan, ukon reputasyon. Sang natawo ka ginhatagan ka sang imo mga ginikanan sing isa ka ngalan nga ila naluyagan. Karon, samtang nagasinultero ukon nagadinalaga ka, luyag mo ang kahigayunan nga makapili sang imo kaugalingon nga “ngalan”​​—⁠nga amo, ang pagtukod sang imo kaugalingon nga reputasyon.

Si Hari Solomon nagsulat: “Ang [maayo nga] ngalan pagapilion sa baylo sang madamo nga manggad; ang kahamuot maayo pa sa pilak kag bulawan.” (Hulubaton 22:1) Bisan samtang lamharon ka, ayhan luyag mo na nga magtukod sang imo kaugalingon nga reputasyon paagi sa imo mga buhat kag personalidad.

Pagkabuhi sa Ila Landong

Kaangay ni Larry kag ni Alexander, ang pila ka pamatan-on nagabatyag nga nagakabuhi sila sa landong sang ngalan ukon mga hinimuan sang ila mga ginikanan. Ayhan kilala sa komunidad ang ila mga ginikanan bangod sang ila obra ukon tinun-an. Ukon mahimo nga kilala sila sa Cristianong kongregasyon. Kon ang imo mga ginikanan bisan diin man sa sining duha ka kahimtangan, mahimo nga kon kaisa nagabatyag ka nga pirme ka ginatan-aw kag nga ang tanan mo nga ginahimo pirme ginabantayan. Ayhan naugot ka sa pag-ipit nga maggawi sa pila ka paagi bangod lamang sa kon sin-o ang imo mga ginikanan.

Halimbawa, ang amay ni Ivan nagaalagad subong gulang sa isa ka kongregasyon sang mga Saksi ni Jehova sa ila lugar. Si Ivan nagsiling: “Bangod ang akon amay kilala gid kag ginatahod, ginbatyag ko pirme nga dapat ako mangin huwaran sa eskwelahan kag sa puluy-an. Ginbatyag ko nga gingamit ako sang iban nga mga ginikanan bilang talaksan sa kon ano ang ginapaabot nila nga himuon sang ila kabataan. Bisan pa makalilipay ini, daku ini nga pag-ipit sa akon nga mangin maayo nga huwaran sa iban. Bilang resulta, kon kaisa kulang ako sing kaugdang kag napaslawan ako nga batunon ang mga diperensia sa personalidad ko.” Si Alexander nagsiling: “Ginbatyag ko nga pirme ako ginabantayan kag kon makasayop ako, may magapakalain dayon sa akon.”

 Si Larry, nga ginkutlo sa pamuno, nagtinguha nga likawan nga mangin sentro sang igtalupangod paagi sa paghinago sang iya apelyido. Sia nagsiling: “Kon may bag-o ako nga makilala sa sosyal nga mga pagtilipon, magasiling ako nga, ‘Hi, ako si Larry,’ kag magdulog dira​​—⁠nga wala ginasambit ang akon apelyido. Kon mahimo, nagapirma gani ako nga wala ginagamit ang akon apelyido. Nahadlok ako nga basi pakig-angutan ako sing lain sang mga tawo kon mahisayran nila kon sin-o ang akon amay. Luyag ko nga pakig-angutan ako sing normal sang akon mga katubotubo.”

Siempre, makatarunganon lang nga mataas ang mga ginapaabot sang iban sa imo kon ang imo amay nagaalagad bilang isa ka Cristianong gulang ukon isa ka ministeryal nga alagad. Kay man, ang mga lalaki sa sining tinangdo nga mga katungdanan dapat ‘magdumala sa maayo nga paagi sa mga kabataan kag sa ila kaugalingon nga mga panimalay.’ (1 Timoteo 3:​5, 12) Busa, halangpunon nga ang mga tawo nagapaabot nga mangin huwaran ka! Apang malain gid bala ina? Indi ini malain kon binagbinagon mo nga ang Cristianong pamatan-on nga si Timoteo, ayhan samtang tin-edyer pa, ginpili ni Pablo nga maglakbay kaupod niya kag makig-ambit sa importante nga hilikuton sa ministeryo. (1 Tesalonica 3:​1-3) Gani dapat ka magpanikasog nga mangin huwaran, gintangdo man nga gulang ang imo amay ukon indi.

Ang Pagrebelde Indi Maalamon nga Desisyon

Walay sapayan sini, ang pila ka pamatan-on nagatinguha nga makahalin sa landong sang ila mga ginikanan paagi sa pagrebelde. Si Ivan nagsiling: “May mga tion nga naugot ako nga mangin huwaran. Nagrebelde ako paagi sa pagpalaba sang akon buhok agod mahibaluan kon tubtob diin ako sabdungon sang iban.”

Si Absalom, nga isa sa mga anak nga lalaki ni Hari David, nangin rebelyuso. Ang iya amay bantog sa iya debosyon kay Jehova kag ginhigugma sang madamo sa pungsod sang Israel. Mataas ang ginpaabot kay Absalom bilang anak ni David. Apang sa baylo nga magpahisuno sa makatarunganon nga mga pagpaabot, ginpili ni Absalom nga magtukod sing isa ka ngalan para sa iya kaugalingon paagi sa pagrebelde batok sa iya amay. Sanglit si David amo ang gintangdo nga tiglawas ni Jehova, si Absalom sa pagkamatuod nagrebelde batok kay Jehova. Ang iya mga paggawi nagpakahuya sa iya pamilya kag nagpahamak mismo sa iya.​​—⁠2 Samuel 15:​1-​15; 16:20-​22; 18:​9-​15.

Ang pagrebelde mahimo may makahalalit man nga mga resulta sa imo. Talupangda kon ano ang ginasiling sa aton sang Biblia nahanungod kay Nehemias. Ang pila sang iya mga kaaway nagtinguha  nga tiplangon sia sa paggawi sing di-diosnon. Ngaa? “Agod maguba nila ang akon reputasyon kag pakahuy-an ako,” siling ni Nehemias. (Nehemias 6:​13, Today’s English Version) Ang pagrebelde makaguba sang imo reputasyon​​—⁠nga mahimo indi na malipatan sang mga tawo.

Importante man kon ano ang epekto sang rebelyuso nga paggawi sa iban. Sa di-magkubos, mangin kabangdanan ka sing di-kinahanglanon nga kalisod sang imo mga ginikanan. (Hulubaton 10:1) Ang imo mga buhat mahimo may malain man nga epekto sa iban nga mga pamatan-on. Si Ivan nagbaton: “Ang akon paggawi may malain nga epekto sa akon manghod nga lalaki. Sa isa ka hut-ong sang tion ginbiyaan niya sing bug-os ang Cristianong kongregasyon, kag ginhingamo ang tanan nga butang nga nahibal-an niya nga wala nahisuno sa mga talaksan sang Biblia. Sing mapasalamaton, nakamaradmad sia kag karon nagaalagad liwat kay Jehova kag malipayon.”

Isa ka Mas Maayo nga Dalanon

Ang utod ni Absalom sa amay nga si Solomon nagpili sing tuhay nga dalanon. Handa sia magtuon sing mapainubuson gikan sa iya amay, nga si David. (1 Hari 2:​1-4) Sa baylo nga magtinguha nga makaagom sing kadungganan kag impluwensia sa mga tawo, gintinguhaan ni Solomon ang pagtukod sing isa ka maayo nga ngalan sa Dios. Samtang ginhimo niya ini, nagdala sia sing kadungganan sa iya pamilya kag nakilala bilang isa sa pinakabantog nga mga hari sang Israel.​​—⁠1 Hari 3:​4-​14.

Ang maayo nga huwaran ni Solomon nagapadaku sing duha ka importante nga katunayan: Una, ginatukod mo ang imo kaugalingon nga identidad, indi paagi sa pagpalayo sa imo pamilya, kundi paagi sa pagtuon gikan sa positibo nga mga kinaiya sang imo pamilya. Ang balasahon nga Adolescence nagsiling: “Ang paghinupang indi dapat ang tion nga magpalayo sa mga ginikanan agod ang mga pamatan-on makatigayon sing isa ka mabakod nga identidad.” Ang imo ikasarang sa pagtukod sang imo kaugalingon nga identidad “indi ginaupangan sang pagsakdag sang mga ginikanan,” ang balasahon nagpadayon, “kundi sa baylo [ini] ginapabakod [sini].”

Sing makawiwili, si Solomon mismo naglaygay: “Magpamati ka sa imo amay nga nagpahanabo nga mapanganak ka, kag indi pagtamaya ang imo iloy bangod lamang tigulang na sia.” (Hulubaton 23:22) Maathag nga si Solomon wala nagsulat sa magamay nga kabataan bangod sa tion nga ang mga ginikanan “tigulang na,” ang anak mahimo nga hamtong na. Ang punto? Bisan pa hamtong ka na kag may kaugalingon na nga pamilya, makabenepisyo ka gihapon sa kaalam sang imo mga ginikanan. Narealisar ina mismo ni Ivan. Sia nagsiling: “Samtang nagahamtong ako, gintinguhaan ko nga ilugon ang maayo nga mga kinaiya sang akon mga ginikanan samtang ginatinguhaan ko nga likawan ang ila mga sayop.”

Ang ikaduha nga punto nga dapat binagbinagon amo nga gin-una ni Solomon, indi ang pagtukod sang iya kaugalingon nga “identidad,” kundi ang pagpahamuot kay Jehova. Matuod, mataas ang ginpaabot sa iya bilang anak ni David. Apang ang pagsalig ni Solomon kay Jehova nagbulig agod maabaga niya ang iya mga responsibilidad. Nangin amo man sini ang pagtamod ni Alexander. Sia nagsiling: “Ginabaton ko na karon ang kamatuoran nga sa masami mas kapin ang ginapaabot sa kabataan sang mga gulang. Nagdesisyon ako nga gamiton ini sa isa ka positibo nga paagi, kag nangin pangamlig ko ini. Narealisar ko nga ang pagtamod ni Jehova sa akon amo ang labing importante nga butang. Kilala niya kon sin-o gid ako kag indi lamang kon kay sin-o ako anak.”

Si Daryn, nga ang amay isa ka gradwado sang Watchtower Bible School of Gilead⁠ *​​—⁠isa ka eskwelahan nga nagahanas sa mga misyonero​​—⁠nakatuon man nga batunon nga may yara sia kilala nga mga ginikanan. Sia nagsiling: “Sang ginbawtismuhan ako, gindedikar ko ang kabuhi ko kay Jehova kag indi kay bisan sin-o pa. Paagi sa pagtuman sang akon dedikasyon sa akon bug-os nga masarangan, may nasulod ako nga kalinong sa paghibalo nga si Jehova nahamuot sa akon, bisan pa indi ko mahimo ang tanan nga ginhimo sang akon mga ginikanan.”

Si Hari Solomon nagsiling: “Paagi sa iya mga binuhatan ginapakilala sang isa ka bata ang iya kaugalingon kon bala ang iya mga hilikuton putli kag matarong.” (Hulubaton 20:11) Sa katapusan, ang mga tawo magadumdom sa imo bangod sang imo ginhambal kag ginhimo. Mangin huwaran “sa paghambal, sa paggawi, sa gugma, sa pagtuo, sa kaputli.” Kon himuon mo ina, ang mga tawo magahigugma kag magatahod sa imo kon sin-o ka!​​—⁠1 Timoteo 4:⁠12.

Apang, para sa iban nga mga pamatan-on, ang hangkat amo ang paghalin sa landong sang ila mga utod nga nangin madinalag-on gid. Ang palaabuton nga artikulo magabinagbinag kon paano mo atubangon ini nga hangkat.

[Mga nota]

[Blurb sa pahina 26]

Ang pagrebelde magapahanusbo lamang sa imo mga ginikanan kag magaguba sang imo reputasyon

[Retrato sa pahina 26]

Makabenepisyo ang iban sa imo maayo nga halimbawa