Pamangkot sang mga Pamatan-on . . .

Paano Ako Mangin Madinalag-on nga Humalambal sa Publiko?

“Ginahunahuna ko nga natalupangdan sang mga tawo ang tanan ko nga sayop kag pagkadisangkol. Indi ako makakonsentrar sa akon ginahambal. Pamatyag ko ginakadlawan nila ako sing patago.”​—Sandy. *

ANG awditoryum sa eskwelahan puno. Nabatian mo nga ginalawag ang imo ngalan sa mikropono, kag gulpi lang nga ang tanan nagatulok sa imo. Ang pila lamang ka tikang pakadto sa mikropono daw isa ka kilometro. Nagapalamalhas ang imo mga palad, nagapalangluya ang imo mga batiis, kag daw nagmala ang imo baba. Pagkatapos, indi mo mapunggan ang daku nga tulo sing balhas sa imo guya. Makahuluya gid! Nahibaluan mo nga indi ka pag-ifiring squad, apang amo gid sini ang imo ginabatyag.

Batunon naton ini: Ang kalabanan sa aton ginakulbaan maghambal sa atubangan sang madamo. (Jeremias 1:​5, 6) Mas nahadlok pa gani ang iban nga magpamulongpulong sa publiko sangsa kamatayon! Ano man ang imo pamatyag sa sini, may maayo nga mga rason kon ngaa dapat ka mangin interesado sa pagpamulongpulong sa publiko. Tan-awon naton ang pila sini kag binagbinaga kon paano ka mangin isa ka madinalag-on nga humalambal.

Kon Ginapangabay nga Magpamulongpulong

“Ang pagpamulongpulong sa publiko isa ka kalantip nga kinahanglan sang tanan.” Amo ini ang siling sang isa ka pasayod para sa isa ka kurso sa pagpamulongpulong sa publiko. Huo, sa ulihi mahimo nga dapat ka mag-atubang sa mga tumalambong. Isa pa, ang pagpamulongpulong sa publiko ginapasanyog sa madamo nga eskwelahan. Ang isa ka lamharon nga babayi nga si Tatiana naghinumdom: “Madamo nga beses nga kinahanglan maghambal ako sa atubangan sang akon mga kaklase sa eskwelahan.” Halin sa oral nga mga report kag pagbinagbinag sa libro pakadto sa multimedia nga mga presentasyon kag mga debate, dapat pirme handa ang mga estudyante sa paghambal sa atubangan sang klase.

Kon makaobra ka na sa ulihi, mahimo ka pangabayon nga magtudlo sa isa ka grupo sang mga kaupod sa trabaho, magpresentar sing isa ka proposal ukon panugda sa kliyente, ukon magpaathag sing pinansial nga report sa komite sang ehekutibo. Sa pagkamatuod, ang kalantip sa paghambal mapuslanon sa madamo nga trabaho, pati na ang mga trabaho sa dyurnalismo, pagdumala, pagpakig-angot sa iban, kag pagbaligya.

Apang, kamusta kon magatrabaho ka subong trabahador ukon klerk sa opisina? Bueno, ang maayo nga paghambal sa tion sang interbyu mahimo nga basihan kon bala batunon ka ukon indi. Sa trabaho mismo, ang imo ikasarang sa pagpabutyag sang imo kaugalingon isa ka bentaha. Si Corrine nagtrabaho  bilang serbidora sa sulod sang tatlo ka tuig pagkatapos niya eskwela. Sia nagsiling: “Kon maayo ka maghuluhambal, ginakabig ka nga mas hamtong kag makaabaga sing dugang nga responsabilidad. Mahimo pa gani nga hatagan ka sing mas maayo nga trabaho, mas mataas nga sueldo, ukon mas daku nga pagtahod.”

Sa katapusan, ang lamharon nga mga Cristiano masunson nga nagahambal sa atubangan sang iban bilang bahin sang ila pagsimba. (Hebreo 10:23) “Importante nga mapabutyag mo ang imo kaugalingon sing maathag,” siling ni Taneisha. “May pribilehiyo kami nga ibantala ang maayong balita sang Ginharian sang Dios.” (Mateo 24:14; 28:19, 20) Sa kongregasyon kag sa ila dayag nga ministeryo, ang lamharon nga mga Cristiano “indi makahimo kundi magpamulong sang [ila] nakita kag nabatian.”—Binuhatan 4:​20; Hebreo 13:15.

Sa amo, ang pagtuon sing kalantip sa pagpakighambal makahatag sing benepisyo sa imo sa madamo nga paagi. Apang, mahimo nga ginakulbaan ka gihapon sa paghunahuna nga mag-atubang sa mga tumalambong. May mahimo ka bala agod malandas mo ang imo kulba? Huo.

Paglandas sa Imo Kahadlok

Indi kinahanglan nga mangin maalam ka ukon sampaton agod magmadinalag-on,” siling ni Dr. Morton C. Orman, isa ka eksperto sa kahuol kag propesyonal nga humalambal sa publiko. “Ang panguna nga tulumuron sang pagpamulongpulong sa publiko amo ini: hatagi ang imo mga tagpalamati sing butang nga mapuslanon.” Buot silingon, magkonsentrar sa mensahe, indi sa imo kaugalingon ukon sa imo mga ginakabalak-an. Ang pila ka tawo sang unang siglo naghunahuna nga si apostol Pablo indi talunsay nga humalambal, apang bangod mapuslanon pirme ang iya ginahambal, epektibo gihapon sia. (2 Corinto 11:6) Sing kaanggid, kon ginapresentar mo ang isa ka butang nga importante kag ginapatihan mo gid, ang imo kulba magahaganhagan.

Si Ron Sathoff, isa pa ka bantog nga humalambal kag nagahanas sa mga humalambal, nagapanugda: Indi paghunahunaa nga ang imo pamulongpulong isa ka pagpasundayag. Kabiga ini nga isa ka pagpakigsugilanon. Huo, makig-angot sa imo mga tagpalamati indi subong isa ka daku nga grupo, kundi subong mga indibiduwal, subong sa kinaandan nga paghambalanay. Ipakita ang matuod nga interes sa imo mga tagpalamati, kag makighambal sa ila paagi sa kinaandan mo nga panghambal. (Filipos 2:3, 4) Kon daw nagapakigsugilanon lang ang imo paagi, labi ka nga mangin relaks.

Ang isa pa ka kinaandan nga rason sang kakulba amo ang kahadlok nga mahuy-an ukon mulayon sang imo mga tagpalamati. Si Lenny Laskowski, isa ka propesyonal nga humalambal kag nagahanas sa mga humalambal, nagapahanumdom sa aton nga ang mga tagpalamati may huyog nga tamdon ang tagsa ka presentasyon sing positibo. “Luyag nila nga magmadinalag-on ka—indi mapaslawan,” siling ni Laskowski. Gani mangin positibo. Kon posible, tinguhai nga tamyawon ang pila sang imo tagpalamati kon mag-abot sila. Tamda sila subong mga abyan, indi mga kaaway.

 Dumduma man nga ang kakulba indi gid man malain. “Supak sa kinaandan nga pagpati,” siling sang isa ka eksperto, “ang kakulba maayo para sa imo kag sa imo presentasyon.” Ngaa? Bangod ang kakulba nagapakita sing kaugdang, nga magabulig sa imo nga indi magkompiansa sing sobra. (Hulubaton 11:2) Madamo nga atleta, musikero, kag artista ang nagabatyag nga ang diutay nga kakulba nagabulig sa ila nga mangin mas maayo, kag matuod man ini sa mga humalambal sa publiko.

Mga Panugda Para sa Kadalag-an

Paagi sa pag-aplikar sini kag sang iban pa nga mga ideya, ang pila ka lamharon nga mga Cristiano nakatigayon na sing eksperiensia kag kadalag-an sa pila ka kasangkaron subong mga humalambal sa eskwelahan, sa trabaho, kag sa ila kongregasyon. Tan-awa kon makabulig sa imo ang pila nila ka panugda.

Jade: “Ipabutyag ang materyal sa imo kaugalingon nga mga tinaga. Kumbinsiha ang imo kaugalingon tuhoy sa mga benepisyo sang imo isiling. Kon ginabatyag mo nga importante ang imo pamulongpulong, amo man sini ang batyagon sang mga tagpalamati.”

Rochelle: “Nakabulig sa akon ang pag-videotape sa akon kaugalingon. Makita mo ang imo mga kaluyahon apang mapuslanon ini. Pilia man ang topiko nga naluyagan mo. Mapabanaag ini sa imo pamulongpulong.”

Margrett: “Mas natural kag daw nagapakigsugilanon lang ang akon panghambal kon nagagamit ako sing balayan sa baylo nga isulat ang tanan nga isiling ko sing letra por letra. Dugang pa, ang pagginhawa sing madalom antes ako maghambal nagapakalma sa akon.”

Corrine: “Indi mahadlok nga maham-ut sa imo mga sayop. Ang tanan nagasayop. Himua lang ang imo bug-os nga masarangan.”

Sa pagkamatuod, kaangay sa bisan ano nga patag, subong sang isport, taliambong, ukon musika, wala sing tal-us ang eksperiensia kag pirme nga pag-ensayo. Ginarekomendar ni Tatiana nga ihanda mo ang imo pamulongpulong sing abanse agod may bastante ka nga tion sa pag-ensayo. Kag indi mag-untat. “Kon pirme ako nagahambal sa atubangan sang iban,” siling niya “nagahaganhagan ang akon kakulba.” Apang, may isa pa nga makabulig nga indi mo dapat kalimtan, ilabi na kon ginapangabay ka nga magpamulongpulong tungod sa matuod nga pagsimba.

Bulig Gikan sa Daku nga Komunikador

Subong isa ka pamatan-on, si David, ang palaabuton nga hari sang Israel, kilala na subong “sampaton sa paghambal.” (1 Samuel 16:18) Ngaa? Maathag nga sang pamatan-on pa si David, sa tion sang malawig nga inoras nga ginahinguyang niya sa wayang nga nagabantay sing mga karnero, napalambo ni David ang suod nga kaangtanan sa Daku nga Komunikador, si Jehova nga Dios, paagi sa pangamuyo. (Salmo 65:2) Gani, ini nga kaangtanan naghanda sa iya nga makahambal sing klaro, puersado, kag makabuluyok bisan sa idalom sang mabudlay nga mga kahimtangan.—1 Samuel 17:34-​37, 45-​47.

Mapat-od mo nga bilang bahin sang imo pagsimba, buligan ka man sang Dios nga makahambal sing makabuluyok, subong sang pagbulig niya kay David, nga nagahatag sa imo sing “dila sang mga ginatun-an.” (Isaias 50:4; Mateo 10:18-20) Huo, paagi sa paghimulos sa mga kahigayunan nga mapauswag ang imo kalantip sa paghambal karon, mahimo ka mangin epektibo nga humalambal sa publiko!

[Nota]

[Kahon sa pahina 24]

Ginhanas Subong mga Humalambal

Sa mga kongregasyon sang mga Saksi ni Jehova sa bug-os nga duta, may yara semanal nga programa sang pagpanudlo pasad sa Biblia nga ginatawag Teokratikong Eskwelahan Para sa Ministeryo. Ang mga estudyante nagapakigbahin sa mga paghinun-anon sa klase, nagahatag sing mga presentasyon sa kongregasyon, kag nagabaton sing personal nga bulig agod mag-uswag sila. Epektibo bala ini nga programa? Palihug basaha ang eksperiensia sang 19-anyos nga si Chris.

“Sang wala pa ako magpalista sa eskwelahan, indi gid ako mapahamtang upod sa mga tawo,” siling niya. “Wala gid ako maghunahuna nga mangin yara ako sa entablado sa atubangan sang mga tagpalamati. Apang ginpalig-on ako sang iban sa kongregasyon, nga nagsiling nga bisan mag-ang-ang pa ako sa tanan nga tion, maluyagan nila ini, bangod nahibaluan nila ang akon pagpanikasog nga himuon ini. Nian, pagkatapos sang tagsa ko ka pamulongpulong, ginahatagan nila ako sing komendasyon. Daku gid ini nga bulig.”

Sa karon, paglipas sing lima ka tuig sa eskwelahan, nagahanda si Chris sa paghatag sang iya una nga 45-minutos nga pamulongpulong. Ginahimuslan mo bala ini nga aman?

[Retrato sa pahina 22, 23]

Ang mangin epektibo nga humalambal makabulig sa imo sa tanan nga aspekto sang kabuhi