Ang Aton Planeta​—​Ano ang Palaabuton Sini?

“Samtang ang mga tawo sa sulod sang linibo ka tuig nahadlok sa kinaugali nga mga kalamidad subong sang baha kag tigpalamangag, nagaatubang sila karon sa mas makatalagam nga mga hitabo: mga buhat sang mga tawo nga ginatunaan sang mga kalamidad,” report sang Globe and Mail nga pamantalaan sa Canada. Ang United Nations Environment Programme (UNEP) nagbalhag sing isa ka komprehensibo nga report nga nagapangabay sa mga tawo nga untatan ang mga buhat nga makahalalit sa palibot samtang may tion pa. Ang ehekutibo nga direktor sang UNEP nga si Klaus Toepfer, nagsiling: “May tuman na kita nga ihibalo karon agod mahibaluan kon ano ang mangin epekto sang aton mga ginahimo ukon wala ginahimo sa palibot kag sa mga pumuluyo sining tumalagsahon nga asul nga planeta sa 2032.”

May pila na ka pag-uswag sa pagtatap sa palibot sugod sang gintukod ang UNEP sang 1972. Subong sang ginreport sa The Toronto Star, “nag-uswag ang kalidad sang hangin kag tubig sang mga suba sa Europa kag Aminhan nga Amerika, kag ang pagdumili sa mga ginabuga nga mga kemikal nakabulig sa posible nga pagkay-o sang halit sa ozone layer.” Subong man, ang mga programa sa pagtatap sang kagulangan, subong sang ginahimo sa Canada, Finland, Norway kag Estados Unidos, “nagapat-od nga mabuhinan ang epekto sang sobra nga pagpulod sa mga kahoy.” Walay sapayan sini, ang report sang UNEP nagasiling nga kon indi mapunggan ang pag-uswag sang ekonomiya kag madamo nga bahin sang duta ang himuon nga mga siudad, may makahalalit ini nga epekto sa ilahas nga kabuhi kag sa biodiversity. Ang Globe nagsiling: “Mga katunga sang mga suba sa bug-os nga kalibutan ang tuman kahigko ukon nagakahubsan sing tubig. Otsenta ka pungsod nga may 40 por siento sang populasyon sang kalibutan ang may grabe nga kakulang sa tubig.

Si Toepfer nagapati nga “ang positibo nga resulta matigayon paagi sa determinado nga aksion.” Nagdugang pa sia: “Kinahanglan naton ang isa ka espesipiko nga plano . . . espesipiko nga mga proyekto . . . kag labaw sa tanan isa ka maathag nga opisyal nga proklamasyon.” Apang may malauman bala kita kon ang mga lider sang kalibutan indi maghulag para sa kaayuhan sang planeta?

Makasalig ka nga may isa nga naghatag sing “isa ka maathag nga opisyal nga proklamasyon” kag magahimo sing “determinado nga aksion”​​—⁠⁠si Jehova nga Dios. Sa katunayan, ginpahayag niya sing maathag nga magapasilabot sia “sa paglaglag sang mga nagalaglag sang duta.” (Bugna 11:18) Dugang pa, ginapasalig kita sang Dios nga ang sistema sang ekolohiya sang duta ipasag-uli. Ang desyerto magapamulak. (Isaias 35:1) Mangin bugana ang pagkaon. Mangin wala sing polusyon ang mga suba. (Salmo 72:16; 98:8) Ang Dios nagagarantiya nga pakamaayuhon ang tanan nga tinuga sang duta.​​​—⁠⁠Salmo 96:​11, 12.

[Picture Credit Line sa pahina 31]

NASA photo