Pamangkot sang mga Pamatan-on . . .

Ano Gid Bala ang Malain sa “Phone Sex”?

“ANG phone sex,” suno sa isa ka kilala gid nga magasin sa Amerika, “amo ang nagbulos sa romantiko nga sulat subong komunikasyon sang mga mag-asawa ukon mga magnobyo nga nagahilayuay.”

Ano ang phone sex? Amo ini ang pagpakigsugilanon ukon pagpamati sa prangka katama nga mga butang tuhoy sa sekso paagi sa telepono.⁠⁠ * Ang mga nagahimo sini masami nagapautwas sang ila kailigbon paagi sa masturbasyon. Bisan pa ang nagapakigsugilanon sing binastos nga mga butang mahimo magnobyohanay ukon indi magkilal-anay, ang phone sex makatulublag nga nangin popular. Madamo pa gani ang hayag nga nagarekomendar sini.

“Amo ini ang pinakahilway sa katalagman nga pagpakigsekso nga mahimo mo,” siling sang isa ka babayi. Sa pagkamatuod, may pila nga nagaugyon sa iya. Halimbawa, sang Oktubre 2000, bangod sang pagdamo sang mga nagbalatian sing HIV, isa ka grupo sang Ruso nga mga eksperto sa kapagros ang nagpalig-on sang phone sex paagi sa pagbalhag sini sa mga pamantalaan.

Apang, ang iban nga tawo nagapasanyog sang phone sex agod lamang makaganar. Ang mga serbisyo sa phone sex​​—⁠⁠diin ang mga tawo nagabayad agod makabati sing binastos nga mga hambal​​—⁠⁠nangin negosyo nga nagakita sing bilyones-dolyares nga negosyo sa Estados Unidos lamang.

Ngaa nangin popular katama ini nga buhat? Ang libro nga The Fantasy Factory nagkomento: “May yara katalagman sa malapit nga pisikal kag emosyonal nga pagpakig-angot. May yara mga risgo nga malatnan sing balatian paagi sa sekso, risgo nga maguba ang reputasyon sang isa, risgo nga basi pakamalauton sang iban kag ang malain nga mga resulta sang ‘abnormal’ nga handum sa sekso. Ginabuhinan sang phone sex ini nga mga risgo.”

Matuod, wala nalakip sa phone sex ang pisikal nga pagpakig-angot sa iban nga  tawo. Apang buot bala sini silingon nga wala na sing malain sa sini ukon wala gid sing bisan ano nga katalagman?

Indi Bala Makahalalit ang Phone Sex?

Ang handum sa sekso mas mabaskog gid sa panahon sang pagkapamatan-on. Ginatawag sang Biblia ining tion nga pinakamabaskog ang seksuwal nga mga handum subong “kapagsik sang pagkabatan-on.” (1 Corinto 7:​36, NW) Sa sining importante nga tion sang kabuhi, dapat tun-an sang isa ka Cristianong pamatan-on “kon paano panag-iyahan ang iya kaugalingon nga suludlan sa pagkabalaan kag sa kadungganan.” (1 Tesalonica 4:​4, NW) Buot silingon, dapat mo tun-an kon paano landason kag kontrolon ang imo seksuwal nga balatyagon. Importante ini sa pagtigayon sing husto kag balanse nga pagtamod sa sekso.

Apang, ang phone sex nagatudlo sa isa nga paayawan, sa baylo nga punggan, ang iya seksuwal nga mga handum. Luwas pa sa sina, nagatuga ini sing malaw-ay kag sayop nga pagtamod sa tuhay nga sekso. Ginatudlo sang Biblia nga ang seksuwal nga paghirupay dapat para lamang sa mga mag-asawa. (Hebreo 13:⁠4) Apang ang phone sex nagapalig-on sa mga pamatan-on nga tigayunon ang seksuwal nga mga kalipayan bisan indi kasal. Ginatudlo sang Biblia nga ang matuod nga kalipay matigayon paagi sa paghatag​​—⁠⁠indi sa pagbaton. (Binuhatan 20:35) Apang ginatudluan sang phone sex ang isa nga gamiton ang iban agod mapaayawan ang makagod nga mga handum. Ginatudluan sang Biblia ang mga mag-asawa nga magpalambo sing matuod nga pagkasuod paagi sa pagpalambo sing gugma kag pagsalig sa isa kag isa. (Efeso 5:​22, 33) Apang, ang phone sex nagapalig-on sing pagkawalay balatyagon kag pagkamalikumon.

Isa ka Makahalalit nga Pagkagiyan

Ang dumaan nga Corinto kilala sadto subong siudad nga puno sing imoral nga mga bisyo. Gani, nagakaigo nga nagsulat si apostol Pablo sa mga Cristiano didto: “Nagakahadlok ako nga subong nga ang man-ug sa iya kadaya naglimbong kay Eva, ang inyo mga hunahuna patalangon gikan sa hanuot kag putli nga katutom kay Cristo.” (2 Corinto 11:⁠3) Ang phone sex isa karon ka paagi ni Satanas nga Yawa sa pagpatalang sa mga pamatan-on.

Ang pila ka pamatan-on walay kontrol nga nagiyan sa pagtawag sa mga serbisyo sa phone sex. Ang isa ka pamatan-on nga tawgon naton nga Jim nagsugid kon paano nagiyan ang pila. Nakita ni Jim ang numero sang telepono sang serbisyo sa phone sex sa isa ka billboard. Ginsaulo niya ang numero kag gintawgan ini para testingan lamang. Pirme na dayon sia nagtawag sa sini nga serbisyo. Wala magdugay, nagtangkas tubtob sa $600 ang iya balayran sa telepono!

Ang pagpukaw sa seksuwal nga mga handum samtang di-minyo pa ikaw supak sa laygay sang Pulong sang Dios. Ini nagasiling: “Patya ninyo ang dutan-on sa inyo: ang pagkamakihilawason, kahigkuan, malaut [“seksuwal,” NW] nga balatyagon.”​​—⁠⁠Colosas 3:⁠5.

Ang mga Katalagman sa Pagnobyohanay

Paano naman sa mga pamatan-on nga serioso nga mga magnobyohanay? Sa pagkamatuod, natural lamang sa nagaluyagay nga magpabutyag sang ila balatyagon sa isa kag isa. Sa panahon sang Biblia, ang isa ka mahinadlukon sa Dios nga babayi nagsiling tuhoy sa iya nobyo: “Ako iya sang akon hinigugma, kag ang iya handum nayon sa akon.” (Ambahanon ni Solomon 7:10) Samtang nagahilapit na ang adlaw sang kasal, nagakaigo lamang hambalan sang magnobyohanay ang pila ka butang tuhoy sa sekso. Apang, ang phone sex nagakaigo bala nga paagi sa pagpabutyag sing romantiko nga mga balatyagon?

Indi. Bisan ang kalaslon nga magnobyohanay obligado sa pagtuman sa laygay ni apostol Pablo: “Ang pagkamakihilawason kag ang tanan nga kahigkuan ukon paghamkon dili gid paghingadlan sa inyo, subong nga nagakaigo sa mga balaan. Magmanginwalay binastos, ukon binuang nga hinambal, ukon malaw-ay nga linahog, nga indi nagakaigo, kundi hinunuo mga pagpasalamat. Saligi ninyo ini, nga walay makihilawason ukon mahigko nga tawo, ukon mahamkunon (kon sayuron, diwatahan), nga may panublion sa ginharian ni Cristo kag sang Dios.”​​—⁠⁠Efeso 5:​3-5; Colosas 3:⁠8.

Ang pagpakigsugilanon tuhoy sa sekso sa tuyo nga pukawon ang  imoral nga mga panghunahuna ukon nagapukaw sang masturbasyon maathag nga mahigko sa mga mata ni Jehova. Kag makadul-ong pa gani ini sa mas mabug-at nga mga paglapas sa diosnon nga mga prinsipio. Halimbawa, may isa anay ka magnobyo nga malayo sa isa kag isa. Sang primero, nagasugilanunay sila pirme sa telepono agod makilala ang isa kag isa. Apang, wala magdugay, nagsugod sila sa paghinun-anon sa imoral nga mga topiko. Ang ila pagsugilanunay nangin kapin pa ka prangka. Indi kalatingalahan, nga sang natigayon nila ang kahigayunan nga mag-upuray, nahulog sila gilayon sa mahigko nga paggawi.

Sa pagkamatuod, kita nga luyag magpahamuot sa Dios magahimo gid sang aton bug-os nga masarangan agod likawan ang siod sang phone sex. Paano kita magmadinalag-on?

‘Sakita ang Imo Lawas’

Makapagiyan ang phone sex. Dapat naton ‘sakiton ang aton lawas kag daugon ini’ agod matigayon naton ang kahamuot ni Jehova. (1 Corinto 9:⁠27) Kon naga-phone sex ka karon, ngaa abi indi ka mangayo sing bulig? Mangin isa ka maayo nga panugod ang pagsugid sa imo Cristianong mga ginikanan. Huo, mahimo maakig sila sa imo. Apang sila gid ang yara sa pinakamaayo nga posisyon agod mabantayan ang imo paggawi agod indi mo na ini masulit. Ang mga gulang sa inyo kongregasyon luyag man magbulig sa imo kag mabuligan ka nila.

Kon may yara ikaw nobyo ukon nobya, mangin determinado nga magpabilin nga putli, bisan sa pagpakigsugilanon sa telepono. Ang isa ka kalaslon nga Cristianong babayi nga si Leticia nagsiling: “Ginbasa namon sang akon nobyo ang pasad sa Biblia nga mga artikulo tuhoy sa pagpabilin nga putli. Ginapasalamatan gid namon ang nabulig sini agod mahuptan namon ang matinlo nga konsiensia.” Mangin maisog sa pagbag-o sa topiko kon ang inyo pagsugilanunay indi na disente. Hinun-anuni ninyo kon paano mahuptan nga matinlo ang inyo pagsugilanunay.

Sa pila ka kadutaan, ang mga pasayod tuhoy sa phone sex ginapasalida sa telebisyon kon gab-i na katama. Ayhan mas maayo kon likawan mo magtan-aw sing TV sa amo nga oras. Sanglit ang masturbasyon nagapukaw lamang, sa baylo nga magpatay sang imoral nga mga panghunahuna, importante nga likawan mo ining di-matinlo nga buhat.⁠⁠ * Mangin madinalag-on ka sa pagsikway sa mahigko nga mga panghunahuna paagi sa pagpamensar sa matarong nga mga butang. (Filipos 4:⁠8) Makig-upod ka sa mga abyan nga putli ang panghambal, kag basaha ang Pulong sang Dios kag Cristianong mga publikasyon adlaw-adlaw agod mapabakod mo ang imo determinasyon. Sa sining paagi malikawan mo ang imoral nga mga pantasya sa pagdagta sang imo panghunahuna. Labing importante, mangayo sing bulig sa Dios paagi sa pangamuyo. Si apostol Pedro nagsulat: “Magtugyan sang inyo tanan nga paghimud-os sa iya, kay sia nagakabalaka sa inyo.”​​​—⁠⁠1 Pedro 5:​6, 7.

“Tuman gid ang pag-ipit sa mga pamatan-on sa paghimo sing di-nagakaigo nga pagpakigsekso,” siling sang isa ka Cristianong dalagita nga taga-Brazil. Apang, nahibaluan ni Jehova ang mga problema nga ginaatubang mo. Saligi nga hatagan ka niya sing bulig nga kinahanglanon mo agod makapabilin ka nga matinlo sa iya panulok.​​—⁠⁠Efeso 6:​14-​18.

[Mga nota]

[Mga retrato sa pahina 14, 15]

Nangin popular ang “phone sex” kag “cybersex”

[Retrato sa pahina 14, 15]

Dapat mag-andam ang mga magnobyohanay nga ang ila pagsugilanunay indi mangin di-matinlo

[Retrato sa pahina 16]

Ang pagbasa sing Pulong sang Dios kag sang Cristianong mga publikasyon makapabakod sang imo determinasyon nga magpabilin nga putli