Ang Pagtamod sang Biblia

Malain Gid Bala ang Sobra nga Pag-inom?

ANG mainabyanon nga hubog, nga ang papel amo ang magpakadlaw, yara pirme sa mga palaguaon sa entablado kag mga sine sa sulod sang mga tinuig. Bisan pa mahimo nga nagaarte lamang ang mga artista, ginapakita sang ila mga lahog ang salalakot nga pagtamod sang madamo tuhoy sa sobra nga pag-inom, ginakabig ini nga isa ka kaluyahon, huo, apang daw indi gid man malain.

Apang ang kamatuoran indi kaladlawan. Ginakabig sang World Health Organization ang pag-abuso sa alkohol subong isa sa nagapanguna nga risgo sa kapagros sa bug-os nga kalibutan. Ginasiling nga sunod sa sigarilyo, ang pag-abuso sa alkohol ginabangdan sang mas madamo nga kamatayon kag balatian sangsa pag-abuso sa droga, kag ginahalitan sini ang ekonomiya sang Estados Unidos lamang sing kapin sa $184 ka bilyon kada tuig.

Walay sapayan sining mga katunayan, madamo ang nagapati nga indi man gid malain ang sobra nga pag-inom. Bisan pa mahimo nga ginakilala nila ang makahalalit nga mga epekto sang malawig nga pag-abuso, wala nila ginakabig nga sayop ang talagsa nga pagpatuyang. Sa pila ka bahin sang kalibutan, ginatamod sang mga pamatan-on ang pagkahubog subong isa ka daku nga pagbag-o sa ila kabuhi. Kag walay sapayan sang serioso nga mga paandam sang mga organisasyon para sa kapagros, ang patuyang nga pag-inom, subong sang sagunson nga pag-inom sing lima ukon kapin pa ka botelya sang serbesa ukon tagay sang alak, madasig nga nagalapnag sa bisan anong pangidaron. Halangpunon, nian, nga madamo nga tawo ang nagapalibog kon bala malain gid ang sobra nga pag-inom. Ano bala ang ginasiling sang Biblia?

Alak kag Maisog nga Ilimnon​​—⁠⁠Mga Dulot Gikan sa Dios

Madamong beses nga ginapatuhuyan sang Biblia ang alak kag iban pa nga maisog nga ilimnon.  Si Hari Solomon nagsulat: “Lakat ka, magkaon nga may kalipay sang imo kalan-on, kag mag-inom nga may malipayon nga tagipusuon sang imo alak; kay ang Dios nagbaton na sang imo mga binuhatan.” (Manugwali 9:7) Ginkilala sang salmista nga si Jehova nga Dios amo ang Manug-aman sing “alak nga nagapasadya sang tagipusuon sang tawo.” (Salmo 104:​14, 15) Maathag nga ang alak isa sa mga dulot nga nalakip sa mga pagpakamaayo ni Jehova sa katawhan.

Maathag nga nagaugyon si Jesus sa pag-inom sing alak. Sa katunayan, ang una niya nga milagro amo ang paghimo sa tubig nga mangin maayo sing kalidad nga alak sa isa ka punsion sa kasal. (Juan 2:​3-​10) Gingamit man niya ang alak subong isa ka nagakaigo nga simbulo sang iya dugo sang ginsugdan niya ang Panihapon sang Ginuo. (Mateo 26:27-​29) Ginsambit pa gani sa Biblia ang makabulong nga epekto sang alak, kay ginpalig-on ni apostol Pablo si Timoteo nga “maggamit sing diutay nga alak tungod sa [iya] suloksulok.”​​​—⁠⁠1 Timoteo 5:​23; Lucas 10:34.

Importante ang Paghaganhagan

Talupangda nga ginrekomendar ni Pablo ang pag-inom sing “diutay [lamang] nga alak.” Maathag nga ginapakamalaut sang Biblia ang tanan nga patuyang nga paggamit sing alkohol. Ang Judiyo nga mga saserdote puede makainom sing haganhagan kon wala sila nagaalagad. Apang, ginadilian sila sa pag-inom sing bisan ano nga alkoholiko nga ilimnon samtang nagahimo sang ila mga katungdanan subong saserdote. (Levitico 10:​8-​11) Madamo nga tuig sang ulihi, ginpaandaman ang unang-siglo nga mga Cristiano nga ang mga palahubog “indi makapanubli sang ginharian sang Dios.”​​​—⁠⁠1 Corinto 6:​9, 10.

Dugang pa, sang naghatag sing instruksion kay Timoteo, si Pablo nagsiling nga ang nagapanguna sa kongregasyon dapat “di-palahubog” ukon “di-palainom sing alak.”⁠⁠ * (1 Timoteo 3:​3, 8) Sa pagkamatuod, ginasugo sang Biblia nga dapat sikwayon sa Cristianong kongregasyon ang di-mahinulsulon nga mga palahubog. (1 Corinto 5:​11-​13) Ang Kasulatan nagakaigo nga nagsiling nga “ang alak manug-uligyat.” (Hulubaton 20:1) Ang pagpatuyang sa alkohol mahimo magpabudlay sa isa nga kontrolon ang iya kaugalingon kag maghimo sing maayo nga desisyon.

Kon Ngaa Ginapakamalaut sang Pulong sang Dios ang Sobra nga Pag-inom

Si Jehova, ‘ang Isa nga nagatudlo sa aton agod makabenepisyo kita,’ nakahibalo nga kon abusuhan naton ang bisan ano nga butang, mahalitan lamang naton ang aton kaugalingon kag ang iban. (Isaias 48:​17, 18, NW) Matuod ini kon tuhoy sa pag-inom sing alkoholiko nga mga ilimnon. Ang Pulong sang Dios nagapamangkot: “Sin-o bala ang may pagkakailo? Sin-o bala ang may kasubo? Sin-o bala ang may mga kasuayon? Sin-o bala ang may pagyamo? Sin-o bala ang may mga pilas sa walay kabangdanan? Sin-o bala ang may nagapalamula nga mga mata?” Nagasabat ini: “Ang mga nagapabilin sing madugay sa alak, ang mga nagakadto sa pagpangita sa alak nga sinimbog.”​​​—⁠⁠Hulubaton 23:​29, 30.

Bangod yara sa idalom sang impluwensia sang tuman kadamo nga alkohol, ang mga tawo nakahimo sing madamong wala ginhunahuna kag makatalagam nga mga butang: pagmaneho samtang nakainom kag ginabutang ang ila kaugalingon kag ang iban sa katalagman, sobra nga pagpakita sing balatyagon sa tiayon sang iban kag serioso nga nahalitan ang mga kaangtanan, pagwakal kag paghulag sing binuang ukon balingag pa gani. (Hulubaton 23:33) Nagakaigo nga gintawag ang pag-abuso sa alkohol subong isa sa labing makahalalit nga mga problema sang katilingban nga nagasalot sa katawhan karon. Indi katingalahan nga ang Dios nagalaygay: “Dili ka magsimpon sa mga palainom sing alak”!​​—⁠⁠Hulubaton 23:20.

Sa Galacia 5:19-21, ginlista ni Pablo ang paghuboghubog kag magansal nga kinalipay subong “mga buhat sang unod” nga batok sa mga bunga sang espiritu sang Dios. Ang pagpatuyang sa alkohol makahalit sa kaangtanan sang isa sa Dios. Maathag, nian, nga dapat likawan sang mga Cristiano ang patuyang nga pag-inom sing alkohol.

[Nota]