Pamangkot sang mga Pamatan-on . . .

Ngaa Ginpabay-an Kita sang Dios nga Mag-antos?

“Didto ang Dios sa langit diin maayo ang tanan, samtang yari kita diri sa duta nga nagaantos.”—Mary. *

ANG mga pamatan-on karon nabun-ag sa isa ka mapintas nga kalibutan. Daw kinaandan na lang ang mga linog kag kinaugali nga mga kalamidad nga nagpatay sa linibo ka tawo. Pirme ginabalita ang mga inaway kag mga pagsalakay sang mga terorista. Ang balatian, krimen, kag mga aksidente nagpatay sa aton mga hinigugma. Si Mary, nga ginkutlo kaina, personal nga naapektuhan sang trahedya. May paghinakit nga ginsiling niya ini sang napatay ang iya amay.

Kon personal kita nga naapektuhan sang trahedya, normal lang sa tawo nga maugot, manugon, ukon maakig pa gani. ‘Ngaa natabo ini?’ mahimo ipamangkot mo. ‘Ngaa sa akon ini pa natabo?’ ukon ‘Ngaa subong pa ini natabo?’ Dapat masabat ini nga mga pamangkot. Apang agod matigayon ang husto nga mga sabat, dapat mangita kita sa husto nga kuluhaan. Matuod, subong sang ginsiling sang pamatan-on nga si Turrell, kon kaisa ang mga tawo “nagbatyag sing tuman nga kasakit amo nga indi na nila mabinagbinag sing maayo ang kahimtangan.” Gani pakalmaha diutay ang imo ginabatyag agod makahunahuna ka—sing makatarunganon.

 Pag-atubang sa Di-maayo Apang Matuod nga mga Kahimtangan

Bisan pa makapasubo hunahunaon, ang kamatayon kag pag-antos matuod nga mga kahimtangan nga indi malikawan. Si Job nagsiling: “Ang tawo nga natawo sa babayi malip-ot sing mga adlaw, kag puno sang kagamo.”—Job 14:1.

Ang Biblia nagasaad sing bag-ong kalibutan diin ‘magapuyo ang pagkamatarong.’ (2 Pedro 3:13; Bugna 21:3, 4) Apang antes magluntad ining matahom nga kahimtangan, magaantos pa ang katawhan sing di-matupungan nga kalautan. “Hibalua ini,” siling sang Biblia, “nga sa katapusan nga mga adlaw magaabot ang makahalanguyos nga mga tion nga mabudlay pakigbagayan.”—2 Timoteo 3:1, NW.

Daw ano kadugay ining mabudlay nga mga tion? Pareho man sa sini ang ginpamangkot sang mga disipulo ni Jesus. Apang, wala sila ginhatagan ni Jesus sing espesipiko nga adlaw ukon oras kon san-o matapos ining puno sing pag-antos nga sistema sang mga butang. Sa baylo, si Jesus nagsiling: “Ang nagapadayon tubtob sa katapusan maluwas.” (Mateo 24:3, 13) Ginapalig-on kita sang mga pulong ni Jesus nga maglantaw sa palaabuton. Dapat handa kita sa pagbatas sa madamong mabudlay nga mga kahimtangan antes mag-abot ang katapusan.

Dios Bala ang Balasulon?

Gani, makatarunganon bala nga maakig sa Dios bangod ginatugutan niya ang pag-antos? Indi ina makatarunganon kon binagbinagon mo nga nangako ang Dios nga tapuson ang tanan nga pag-antos. Kag indi man makatarunganon nga hunahunaon nga ang Dios amo ang nagpahanabo sang malain nga mga butang. Madamong trahedya ang aksidente lamang. Halimbawa, ibutang ta nga natumba ang isa ka kahoy bangod sang mabaskog nga hangin kag nahalitan ang isa ka tawo. Mahimo isiling sang mga tawo nga buhat ini sang Dios. Apang indi ang Dios ang nagtumba sa sini nga kahoy. Ginabuligan kita sang Biblia nga mahangpan nga ining mga butang masubo nga resulta sang “tion kag wala ginapaabot nga hitabo.”—Manugwali 9:11, NW.

Mahimo man tunaan sang pag-antos ang sayop nga desisyon. Ibutang ta nga ang isa ka grupo sang mga pamatan-on nagpahubog kag nagmaneho ang isa sa ila. Nian, naaksidente sila. Sin-o ang balasulon? Ang Dios? Indi, gin-ani nila ang resulta sang ila sayop nga desisyon.—Galacia 6:7.

‘Apang indi bala masarangan sang Dios nga tapuson ang pag-antos karon?’ mahimo ipamangkot mo. Ginpaligban man ina sang pila ka matutom nga mga tawo sang panahon sang Biblia. Ginpamangkot ni manalagna Habacuc ang Dios: “Ngaa bala nagatulok ka sa maluibon, kag nagahipos ka kon ang malauton maghalunhon sang tawo nga matarong pa sa iya?” Apang, wala magpadasudaso sa paghinakop si Habacuc. Sia nagsiling: “Magalantaw [ako] kon ano ang ipamulong niya sa akon.” Sang ulihi, ginpasalig sia sang Dios nga sa “pinat-od nga tion,” tapuson Niya ang pag-antos. (Habacuc 1:13; 2:1-3) Gani, dapat magpailob kita, nagahulat nga tapuson sang Dios ang kalautan sa iya ginpat-od nga tion.

Indi magpadasudaso sa paghinakop nga daw luyag sang Dios nga mag-antos kita ukon ginatilawan niya kita. Matuod nga bangod sang pag-antos, mapalambo naton ang maayo nga mga kinaiya kag ang Biblia nagsiling nga ang mga pagtilaw nga ginapahanugutan sang Dios makapabakod sang aton pagtuo. (Hebreo 5:8; 1 Pedro 1:7) Sa pagkamatuod, madamong tawo nga nakaeksperiensia sing mga pagtilaw ukon trahedya ang nangin kapin ka mapailubon ukon maluluy-on. Apang indi kita dapat maghinakop nga ginpaantos sila sang Dios. Ini nga panghunahuna wala nagasapak sa gugma kag kaalam sang Dios. Ang Biblia maathag nga nagsiling: “Walay tawo nga sang ginasulay sia magsiling, ‘Ginasulay ako sang Dios’; kay ang Dios indi masulay sang malaut kag sia gid wala nagasulay sa bisan kay sin-o nga tawo.” Sa kabaliskaran, halin sa Dios “ang tagsa ka maayong hatag kag ang tagsa ka dulot nga himpit”!—Santiago 1:13, 17.

Kon Ngaa Ginatugutan sang Dios ang Kalautan

Kon amo, diin naghalin ang kalautan? Dumduma nga may mga nagapamatok sa Dios—ang nagapanguna amo ang “ginatawag nga Yawa kag Satanas, ang manugdaya sang bug-os nga kalibutan.” (Bugna 12:9) Ginbutang sang Dios ang aton unang mga ginikanan, si Adan kag si Eva, sa isa ka kalibutan nga wala sing problema. Apang, nakumbinsi ni Satanas si Eva nga mangin mas maayo ang iya kahimtangan kon indi sia magpasakop sa paggahom sang Dios. (Genesis 3:1-5) Makapasubo nga nagpati si Eva sa kabutigan ni Satanas kag ginlalis niya ang Dios. Nagrebelde man si Adan kaupod niya. Ang resulta? “Ang kamatayon naglaton sa tanan nga tawo,” siling sang Biblia.—Roma 5:12.

 Sa baylo nga tapuson dayon ini nga pagrebelde paagi sa paglaglag kay Satanas kag sa mga nagsunod sa iya, ginpaiway anay sang Dios ang tion. Ano ang mabulig sini? Ang isa amo nga mabuyagyag nga butigon si Satanas! Magadamo ang mga pamatuod nga ang pagpahilayo gikan sa Dios nagapadulong lamang sa kalaglagan. Indi bala nga amo gid sini ang natabo? “Ang bug-os nga kalibutan yara sa gahom sang malauton.” (1 Juan 5:19) Dugang pa, “ang isa ka tawo may gahom sa isa sa iya kasamaran.” (Manugwali 8:9) Ang mga panudlo sang mga relihion sang mga tawo makalilibog kag nagasumpakilay. Tuman na gid kanubo sang moral. Gintilawan na sang mga tawo ang tanan nga sahi sang gobierno. Gin-aprobahan nila ang mga tratado kag ginpatuman ang mga kasuguan, apang wala gihapon mahatag ang mga kinahanglanon sang mga tawo. Nagdugang pa gid ang pag-antos bangod sang mga inaway.

Kinahanglan na gid nga magpasilabot ang Dios kag tapuson ang kalautan! Apang mahanabo lamang ini sa gintalana nga tion sang Dios. Samtang wala pa ina, pribilehiyo naton nga sakdagon ang gobierno sang Dios paagi sa pagtuman sa iya mga kasuguan kag mga prinsipio nga yara sa Biblia. Kon may malain nga matabo, magalugpay sa aton ang masaligan nga paglaum nga kabuhi sa kalibutan nga wala na sing problema.

Wala Ka Nagaisahanon

Walay sapayan sini, kon kita mismo ang nagaantos, mahimo mamangkot kita, ‘Ngaa sa akon pa ini natabo?’ Apang, ginapahanumdom sa aton ni apostol Pablo nga wala kita nagaisahanon sa pag-antos sing kalautan. Si Pablo nagsiling nga “ang bug-os nga tinuga nagaugayong sa kasakit sing tingob tubtob karon.” (Roma 8:22) Ang paghibalo sini makabulig sa imo nga mabatas ang pag-antos. Halimbawa, masakit gid ang buot ni Nicole sang ginsalakay sang mga terorista ang siudad sang New York kag ang Washington, D.C., sang Septiembre 11, 2001. “Nakugmat gid ako kag hinadlukan,” siling niya. Apang sang nabasa niya ang mga report kon paano nalandas sang iya mga masigka-Cristiano ini nga trahedya, nagbag-o ang iya pagtamod. * “Narealisar ko nga wala gid ako nagaisahanon. Amat-amat ko nga nalandas ang akon kasakit kag kasubo.”

Sa pila ka kahimtangan, maalamon nga mangita sing isa nga masugilanon mo—ginikanan, hamtong nga abyan, ukon Cristianong gulang. Paagi sa pagpabutyag sang imo balatyagon sa isa nga imo ginasaligan, mabaton mo ang makapalig-on nga “maayong pulong.” (Hulubaton 12:25) Hinumdom sang isa ka Cristianong pamatan-on nga taga-Brazil: “Napatay ang akon amay siam ka tuig na ang nagligad, kag nahibaluan ko nga banhawon sia ni Jehova sa palaabuton. Apang nakabulig sa akon ang pagsulat ko sang akon ginabatyag. Ginsugid ko man ini sa akon Cristianong mga abyan.” May “abyan” ka bala nga imo masugiran? (Hulubaton 17:17) Batuna ang ila mahigugmaon nga bulig! Indi mahadlok nga maghibi ukon ipabutyag ang imo balatyagon. Ti, bisan si Jesus “naghibi” anay sang mapatay ang iya abyan!—Juan 11:35.

Ginapasalig kita sang Biblia nga sa palaabuton “hilwayon [kita] sa kahiulipnan sang pagkamadinulunton kag makaagom sang mahimayaon nga kahilwayan sang mga anak sang Dios.” (Roma 8:21) Antes sina, madamong maayong mga tawo ang mahimo nga mag-antos pa. Malugpayan ka sa paghibalo kon ngaa may pag-antos—kag matapos na ini sa indi madugay.

[Mga nota]

[Retrato sa pahina 30]

Makabulig kon ipabutyag mo ang imo kasubo