Ang Pagtuo sang Isa ka Pamilya sa Idalom sang Kabudlayan

SI India, nga isa ka matahom nga nuebe-anyos nga bata nga babayi nga taga-Wisconsin, E.U.A., nakaeksperiensia sing madamo nga balatian. Sa pagkamatuod, makatlo na sia naoperahan kag madamo na nga beses ginpabulong. “Sa sulod sang anom ka tuig,” siling sang iya iloy nga si Lori, “ang kabuhi ni India nasentro sa mga emergency room, pagtener sa ospital, kag pagpakonsulta.”

Nagsugod lamang ini sang si India nag-edad sing 18 ka bulan. Nagsugod sia sa pagpakita sing di-kinaandan nga mga sintomas, subong sang padayon nga paglupot, mataas nga mga hilanat, pagbutod sang tiyan, kag indi normal nga pagniwang. Nakabatyag man sia sing sakit sa iya pus-on. Kada gab-i sa sulod sang duha ka tuig, ang makaluluoy nga si India pirme lang nagabugtaw kag nagapasingit, nagauraroy, kag kon kaisa nagagurahab bangod sa sobra nga kasakit.

Samtang ginatukib sang mga doktor ang iya balatian, nagpadayon ang grabe nga pag-antos ni India. “Ang amon lapsag sa pagkamatuod, daw mapatay na sa gutom,” siling ni Lori. “Sa sulod sang kapin sa isa ka tuig,” dugang pa sang amay ni India nga si Mark, “ginatulok namon ang amon makaluluoy nga bata nga nagaas-as kag indi kami kahibalo kon paano namon sia mabuligan. Nadumduman ko pa ang isa ka gab-i nga wala na gid sing paglaum nga gin-istoryahan na namon ni Lori ang tuhoy sa lubong ni India, nga sadto nga tion daw indi na gid malikawan.”

Sang ulihi, natukiban nga si India may yara gali ulcerative colitis​—isa ka sahi sang balatian nga nagaatake sa lining sang daku nga tinai. May yara man sia primary sclerosing cholangitis, nga nagaapektar sang bile ducts sa atay. Ining mga balatian sarang mabulong. Apang, nagakinahanglan sing operasyon, kag para sa ulcerative colitis, kinahanglan tomaran sing bulong. Ining mga kahimtangan nagakinahanglan sing padayon nga pagbantay kag pagtatap pagkatapos sang operasyon.

Kapin sa pito ka tuig na ang nagligad sugod sang una nga pagmasakit ni India. Bangod sa pagtatap sang masaligan nga mga doktor, nagapaayo na sia karon. Subong mga Saksi ni Jehova, nabatyagan  nanday Mark kag Lori nga ang ila pagtuo sa Pulong sang Dios​—ilabi na sa ginasiling sini tuhoy sa mga balatian, kamatayon, kag ang paglaum nga pagkabanhaw sa palaabuton​—amo ang nagbulig sa ila nga makabatas. Amo man ini ang nakabulig kay India. “Mahapos lang pirme kay India nga makigsugilanon sing prangka tuhoy sa paglaum sang pagkabanhaw nga ginasiling sa Biblia,” siling ni Lori. “Matuodtuod gid ini sa iya.”

Isa ka bes sang yara si India sa isa ka hulot nga ginahampangan sang mga bata sa ospital, nasugilanon niya ang isa ka bata nga babayi nga ang manghod may leukemia. Ginsugid ni Lori ang masunod nga natabo: “Ginsugiran sang bata nga babayi si India nga nahadlok sia basi mapatay ang iya manghod. Nian ginsugiran sia ni India kon ano ang kamatayon suno sa Biblia kag nga wala sia nahadlok mapatay. Sang masunod nga adlaw nagpalapit sa akon ang nanay sang bata nga babayi kag madamo sia sing pamangkot. Natingala sia nga sarang makapakigsugilanon si India sing prangka kag sing walay kahadlok tuhoy sa sining mga butang.”

Nasapwan nanday Mark kag Lori nga ang mga pangamuyo sang ila masigkatumuluo isa ka daku nga bulig. “Sang una,” siling ni Mark, “kon sugiran ko ang mga tawo nga mangamuyo ako para sa ila ukon kon nagapangamuyo ako upod sa ila, nagahandum ako nga kuntani may dugang pa ako nga mahimo. Narealisar ko karon kon daw ano gali ka importante ang mga pangamuyo upod sa iban kag para sa iban. Ang pangamuyo lamang ang pinakaimportante nga butang nga mabulig sa amon sadtong mabudlay nga mga tion. Daw ano ka mahigugmaon nga paghiliutod ang natigayon naton!”

Nabatyagan man ni Mark nga ang balatian ni India nakabulig sa ila nga usisaon ang ila mga prioridad. “Nabag-o gid ang amon pagtamod sa materyal nga mga butang,” siling niya. “Daw wala gid ini sing pulos kon magmasakit ang imo bata! Ang mapuslanon nga butang sa kabuhi sadto​—kag karon⁠—amo ang amon kaangtanan kay Jehova nga Dios kag ang aton mahigugmaon nga paghiliutod.”

Si Mark kag si Lori subong man si India kag ang iya mga magulang nagapaabot sa tion nga gintagna ni propeta Isaias nga ang mga “pumuluyo indi [na] magsiling, ‘Nagamasakit ako.’ ”​—Isaias 33:24; Bugna 21:4.

[Retrato sa pahina 22]

Si India Erickson

[Retrato sa pahina 23]

Sa San Diego Children’s Hospital

[Retrato sa pahina 23]

Si India upod sa iya pamilya