Ano ang Buot Silingon sang Mangin Ulo sang Panimalay?
Ang Pagtamod sang Biblia
Ano ang Buot Silingon sang Mangin Ulo sang Panimalay?
SUNO sa Biblia, ‘ang ulo sang babayi amo ang lalaki.’ (1 Corinto 11:3; Efeso 5:23) Apang para sa madamo nga nagapangangkon nga nagatahod sa Biblia, ining prinsipio sang pagkaulo sang bana indi lamang karaan na kundi makatalagam pa. “Ang doktrina nga ang mga babayi dapat ‘magpasakop sing tudok’ [sa ila mga bana], kon iaplikar sing labaw gid sa kinaandan, mahimo magdul-ong sa pag-abuso, sa pisikal kag sa emosyonal,” komento sang isa ka mag-asawa. Makapasubo nga ang pag-abuso sa pagkaulo lapnag gid. “Ang pagsakit sa asawa,” siling sang isa ka awtor, “ginakabig nga normal lamang sa madamo nga pungsod—ang kinamatarong sang mga lalaki nga ginahatagan sing komendasyon sa mga kanta, mga hulubaton, kag mga seremonya sa kasal.”
Ang iban nagapahangop nga ang prinsipio sang Biblia tuhoy sa pagkaulo nagdul-ong sa sining kapintas. Ang panudlo bala sang Biblia tuhoy sa pagkaulo nagapakanubo sa mga babayi kag nagapalig-on sang kasingki sa panimalay? Ano gid bala ang buot silingon sang mangin ulo sang panimalay? *
Ang Pagkaulo Indi Pagpamigos
Ang pagkaulo sa Biblia isa ka mahigugmaon nga kahimusan kag pat-od nga wala nagapahangop sing pagpamigos. Apang, ang masunson nga mapintas nga pagdominar sang lalaki sa babayi natabo lamang sang ginlalis sang tawo ang sugo sang Dios. (Genesis 3:16) Sugod sa hardin sang Eden, ang mga lalaki masunson nga nag-abuso sang ila gahom, masingki nga naghingalit sa iban, lakip sa mga babayi kag mga kabataan.
Apang, indi gid ini bahin sang katuyuan sang Dios. Si Jehova nagadumot sa mga nagaabuso sang ila awtoridad. Ginpakamalaut niya ang Israelinhon nga mga lalaki nga ‘nagluib’ sa ila mga asawa. (Malaquias 2:13-16) Dugang pa, ang Dios nagasiling nga “ang bisan sin-o nga nagahigugma sang kasingki pat-od nga dumtan sang Iya kalag.” (Salmo 11:5) Gani ang Biblia indi gid magamit sang mga nagasakit sang ila mga asawa kag sang iban pa nga mga abusado agod pakamatarunganon ang ila masingki nga mga buhat.
Ano ang Nalakip sa Nagakaigo nga Pagkaulo?
Ang pagkaulo isa ka sadsaran nga kahimusan nga ginagamit sang Dios agod huptan ang kahim-ong sa bug-os nga uniberso. Magluwas sa Dios, ang tanan dapat manabat sa iban. Ang mga lalaki dapat magpasakop kay Cristo, ang mga kabataan dapat magpasakop sa ila mga ginikanan, kag ang tanan nga mga Cristiano dapat magpasakop sa mga gobierno. Bisan si Jesus dapat magpasakop sa Dios.—Roma 13:1; 1 Corinto 11:3; 15:28; Efeso 6:1.
Ang pagpasakop sa pagkaulo kinahanglanon para sa isa ka mahim-ong kag malig-on nga katilingban. Subong man, ang pagpasakop sa ulo sang pamilya kinahanglanon sa pagtukod sing isa ka mabakod, malipayon, kag mahidaiton nga pamilya. Ini nga kamatuoran wala nagabag-o bisan pa nga wala sing bana ukon amay sa pamilya. Sa amo sini nga mga pamilya ang iloy amo ang mangin ulo. Kon ang duha ka ginikanan wala, ang kamagulangan nga anak ukon ang iban nga himata amo ang mangin ulo sang panimalay. Sa tanan nga kahimtangan, ang mga miembro sang pamilya nagabenepisyo kon magpakita sila sing nagakaigo nga pagtahod sa isa nga ginhatagan sing awtoridad sa pagpanguna.
Ang yabi, kon amo, indi ang pagsikway sa prinsipio sang pagkaulo kundi, sa baylo, ang pagtuon nga himuon kag tamdon ang pagkaulo sing nagakaigo. Si apostol Pablo naglaygay sa Cristianong mga bana nga mangin ulo sang ila panimalay “subong nga si Cristo man amo ang ulo sang kongregasyon.” (Efeso 5:21-23) Sa amo ginapatalupangod ni Pablo kon paano nakig-angot si Cristo sa kongregasyon subong ang himpit nga talaksan sang pagkaulo. Ano nga halimbawa ang ginpahamtang ni Cristo?
Walay sapayan nga si Jesus amo ang Mesias kag palaabuton nga Hari, ang iya awtoridad naggikan sa Dios mismo kag mas intelihente kag mas eksperiensiado sia sangsa iya mga disipulo, kag mahigugmaon sia, mahinuklugon, kag mainawaon. Indi sia matigdas, matig-a, ukon nagapangayo sing sobra. Indi sia dominante kag pirme ginapahanumdom ang tanan nga sia Anak sang Dios. Si Jesus mapainubuson. Subong resulta, ‘ang iya gota mahulas kag ang iya lulan mamag-an.’ (Mateo 11:28-30) Gani, mahapos sia sugilanunon kag rasonable. Sa katunayan, si Pablo nagsiling nga ginhigugma gid ni Jesus ang kongregasyon amo nga ‘gintugyan niya ang iya kaugalingon tungod sa sini.’—Efeso 5:25.
Paano Mailog sang Isa ang Pagkaulo ni Jesus?
Paano mailog sang mga ulo sang pamilya ang mga kinaiya ni Cristo? Ang isa ka responsable nga ulo nagaulikid sa pisikal kag espirituwal nga kaayuhan sang iya pamilya. Ginahatagan niya sing nagakaigo nga tion kag igtalupangod ang ila mga kinahanglanon subong indibiduwal kag grupo. Mas interesado sia sa mga kaayuhan sang iya tiayon kag mga anak sangsa iya kaugalingon nga mga kaayuhan. * (1 Corinto 10:24; Filipos 2:4) Paagi sa pag-aplikar sa mga prinsipio kag mga panudlo sang Biblia sa iya adlaw-adlaw nga kabuhi, matigayon sang bana ang pagtahod kag pagsuportar sang iya asawa kag mga anak. Sa idalom sang iya mahigugmaon nga pagkaulo, ang ila pagbuligay sa pag-atubang sa bisan ano nga mga problema magamadinalag-on. Busa paagi sa paghimo sang iya pagkaulo suno sa Kasulatan, ang bana nagatukod sing isa ka malipayon nga pamilya, isa nga nagapanghikot sa kahimayaan kag kadayawan sang Dios.
Ang maalamon nga ulo mapainubuson man. Kon kinahanglanon, maabtik sia sa pagpangayo sing pasaylo, bisan pa nga ayhan nabudlayan sia sa pagbaton nga nagsayop sia. Ang Biblia nagasiling nga may kaluwasan sa “kadam-an sang mga manuglaygay.” (Hulubaton 24:6) Huo, ang pagkamapainubuson magapahulag man sa isa ka ulo sang pamilya nga pamatian kag pangayuon ang opinyon sang iya asawa kag mga anak kon nagakaigo. Paagi sa pag-ilog kay Jesus, pat-uron sang isa ka Cristianong ulo nga ang iya pagkaulo wala lamang nagadala sing kalipay kag kalig-unan sa iya pamilya kundi nagapadungog kag nagahimaya man sa Ginhalinan sang mga pamilya, si Jehova nga Dios.—Efeso 3:14, 15.
[Mga nota]
^ par. 4 Bisan pa ini nga artikulo nagabinagbinag sang katungdanan sang isa ka bana kag amay sa pamilya, ang nagasolo nga mga iloy kag ang mga ilo nga dapat mag-atipan sang ila mga utod magabenepisyo man gikan sa mga prinsipio nga ginhatag sa mga ulo sang pamilya.
^ par. 14 Ang libro nga Ang Sekreto sang Kalipay sa Pamilya, nga ginbalhag sang mga Saksi ni Jehova, nagahatag sing praktikal nga mga panugda kon paano atipanon sing mahigugmaon ang pamilya.
[Retrato sa pahina 28]
Ang isa ka rasonable nga bana nagabinagbinag sang mga opinyon sang iya asawa kag mga anak