Ang Pagtamod sang Biblia

Diborsio Bala ang Solusyon?

SA Britanya, gin-abiabi sang isa ka ministro ang mga nagtambong sa isa ka sagrado nga seremonya. Nagatindog sa iya atubangan ang isa ka mag-asawa, kaupod ang suod nga mga abyan kag kabataan. Isa bala ini ka malipayon nga kasal? Indi! Seremonya ini nga magatapos sang ila pag-asawahay. Huo, nangin kinaandan na ang diborsio amo nga ginahiwat na sa pila ka simbahan ang mga seremonya sa diborsio!

Nagaplano bala kamo nga magdiborsio? Kon huo, mangin mas malipayon gid ayhan kamo kon magbulagay kamo? May mahimo bala kamo nga praktikal nga mga tikang agod magmalipayon kamo nga mag-asawa?

“Sila Mangin Isa ka Unod”

Sang ginkasal ang una nga mag-asawa, ginsiling sang Dios nga “magahiusa [ang lalaki] sa iya asawa kag sila mangin isa ka unod.” (Genesis 2:24) Gani, gintuyo nga mangin permanente ang pag-asawahay. Amo kon ngaa nagsiling si Jesus sang ulihi nga ang “rason nga pakighilawas” amo lamang ang ginapahanugutan sang Kasulatan nga kabangdanan sang diborsio nga posible ang pagminyo liwat.​—⁠Mateo 19:3-9.⁠ *

Ginapadaku sini nga dapat mag-unungay ang mag-asawa. Apang paano kon malubha na gid ang mga problema sa inyo pag-asawahay?

Maalamon Bala ang Pagdiborsio?

Naghatag si Jesus sing prinsipio nga mahimo naton binagbinagon sa pagdesisyon sang sia nagsiling: “Ang kaalam ginapamatud-an nga matarong  paagi sa mga buhat sini.” (Mateo 11:19) Ano ang ginapakita sang tuman kadamo nga diborsio karon nga wala sing makatarunganon nga basihan?

“Nangin sobra ang pagpabalor sa mga benepisyo sang diborsio,” siling sang sosyologo sa University of Chicago nga si Propesora Linda Waite, pangulo sang isa ka grupo sang mga eksperto nga nag-usisa sa di-malipayon nga mga mag-asawa. Sing kaanggid, sa tapos sang 11 ka tuig nga pagbinagbinag sa mga komento sang linibo ka tawo, natukiban ni Propesor Michael Argyle sa Oxford nga “ang pinakamasubo nga mga tawo amo ang nagdiborsio ukon nagbulagay.” Ngaa ayhan?

Mahimo madula sang diborsio ang pila ka problema, apang mahimo man ini tunaan sang sunodsunod nga mga problema nga indi mo makontrol. Sa pagkamatuod, ginapakita sang mga pagtuon nga sa masami ang diborsio wala nagabuhin sang depresyon ukon nagadugang sing pagtahod sa kaugalingon.

Bisan pa indi “pinakamaayo” ang inyo pag-asawahay, may kaayuhan ang pagpabilin nga mag-asawa. Madamo sang namat-od nga himuon ini ang nangin malipayon. Si Propesora Waite nagsiling: “Madamo nga problema ang malubad sa ulihi, kag mas malipayon ang mga mag-asawa.” Ang matuod, ginpakita sang isa ka pagtuon nga halos 8 sa 10 nga “indi gid malipayon” sa ila pag-asawahay apang wala magdiborsio ang nangin “malipayon nga mga mag-asawa” pagligad sang lima ka tuig. Gani, bisan pa may malubha nga mga problema, mas maayo nga indi magpadasudaso sa pagdiborsio ang mga mag-asawa.

Ang Praktikal nga mga Tikang

Ang mga nagaplano nga magdiborsio dapat mamangkot kon bala realistiko ang ila mga ginapaabot sa pag-asawahay. Ginapalig-on sa mga palaguaon ang laragway sang romantiko nga kaangtanan nga nagahingapos sa engrande nga kasal nga may malipayon nga katapusan. Sa tapos sang kasal, ang indi matuman nga mga ginapaabot mahimo bangdan sang pagsinuay. Samtang nagadaku ang tension, nagalala ang kahimtangan diin nagapangibabaw ang nasaklaw nga balatyagon. Amat-amat nga madula ang gugma kag, sa ulihi, ginabuslan ini sang kaakig kag dumot. Sa sini nga kahimtangan, ginabatyag sang iban nga diborsio na lang ang solusyon.​—⁠Hulubaton 13:12.

Sa baylo nga magpaimpluwensia sa negatibo nga mga balatyagon, makig-upod sa mga tawo nga malig-on sa ila panumpa sa pag-asawahay. Ginapalig-on ang mga Cristiano nga ‘padayon nga lugpayan kag palig-unon ang kada isa.’ (1 Tesalonica 5:11) Kinahanglan gid sang mga mag-asawa nga may mga problema ang pagpalig-on sang mga masigkatumuluo.

Ang Importansia sang Diosnon nga mga Kinaiya

“Panapti ang inyo kaugalingon sing mapinalanggaon nga gugma nga may kaawa, kaayo, nagapaubos nga panghunahuna, kalulo, kag pagkamainantuson,” laygay ni apostol Pablo. (Colosas 3:12) Ang diosnon nga mga kinaiya makatipig sa paghiusa sang mag-asawa sa tion sang mga problema.

Halimbawa, si Pablo nagsulat: “Padayon kamo nga magpinaumuray sa isa kag isa kag hilway nga magpinatawaray sa isa kag isa kon ang isa may inugsumbong batok sa isa.” (Colosas 3:13) Ang sikologo sa University of Michigan nga si Christopher Peterson nagsiling: “Ang pagpatawad amo ang kinaiya nga naangot gid sa kalipay.”

Ang kaayo, pagkamapinalanggaon, kag pagpatawad nagaresulta sa gugma, “ang himpit nga higot sang paghiusa.” (Colosas 3:14) Pat-od gid nga malipayon kamo nga nagahigugmaanay sang una. Mabalik bala ninyo inang gugma nga nabatyagan ninyo anay? Bisan ano man kabudlay sang inyo kahimtangan, magpakalig-on kamo. May paglaum pa. Sa pagkamatuod, ang pag-unungay kag ang pagsunod sa mga prinsipio sang Biblia mahimo nga magresulta sa daku nga kalipay nga wala ninyo mahunahuna. Ang inyo panikasog nga himuon ini magapahalipay gid kay Jehova nga Dios, ang Isa nga nagtukod sang pag-asawahay.⁠—Hulubaton 15:20.

[Nota]