Pagdala sang Kamatuoran sang Biblia sa mga Pygmy

Suno Sa Manunulat Sang Magmata! Sa Cameroon

Sa kapin sa 230 ka kadutaan sa bug-os nga kalibutan, ginatinguhaan sang mga Saksi ni Jehova nga madala sa “tanan nga sahi sang tawo” ang mensahe sang Ginharian sang Dios. (1 Timoteo 2:⁠4; Mateo 24:14) Lakip sa ila ang mga Pygmy sa Aprika, mga tawo nga nagataas lamang sing 1.2 tubtob 1.4 metros sa promedyo. Ang kalabanan sa ila nagapuyo sa mga kagulangan sang Central African Republic, rehiyon sang Congo, kag nabagatnan-sidlangan nga Cameroon.

Suno sa rekord, una nga nakita sang iban nga mga tawo ang mga Pygmy sang nagpadala sing grupo sang manuglakbay si Paraon Neferirkare sang Egipto agod pangitaon ang tuburan sang Suba Nilo. Nagreport ini nga grupo nga nasumalang nila ang manubo nga mga tawo sa kagulangan sang nasuok nga Aprika. Sang ulihi, ginsambit sang Griegong manunulat nga si Homer kag sang pilosopo nga si Aristotle ang mga Pygmy. Nakapakig-angot ang mga taga-Europa sa ila sang ika-16 kag ika-17 nga siglo.

Sa modernong tion, nagabantala ang mga Saksi ni Jehova sa mga kagulangan sang Aprika. Bisan pa nagpamati ang mga Pygmy sa mensahe sang Ginharian, daw wala nagmadinalag-on ang mga panikasog nga palambuon ang ila interes. Bangod ini sang pirme nga pagsaylosaylo sang mga Pygmy pagligad sang pila ka bulan.

Kilala ang mga Pygmy subong mahidaiton kag mahuluy-on nga mga tawo, nga mga 150,000 tubtob 300,000 ang kadamuon sa Aprika. Ang mga gobierno, internasyonal nga mga organisasyon, kag mga relihion nagpatindog sing mga eskwelahan para sa ila kag sing magagmay nga mga balay nga angay sa ila paagi sang pagkabuhi. Apang, daw wala nagmadinalag-on ang mga panikasog nga ganyaton sila nga magtener sa isa ka lugar.

Tuhay ang natabo kay Janvier Mbaki, ang una nga Pygmy nga nakilala nga nangin Saksi sa Cameroon. Ginbaton niya ang mensahe sang Biblia sa tapos mabasa ang madamo sing laragway nga libro nga Mahimu Ka Mabuhi Sing Dayon sa Paraiso sa Duta, kag ang iban pa nga mga publikasyon.⁠ * Sang 2002, nabawtismuhan si Janvier, kag nagaalagad sia karon subong payunir, nga amo ang pagtawag sang mga Saksi ni Jehova sa ila bug-os tion nga mga ebanghelisador. Ministeryal nga alagad man sia sa ginapakig-updan niya nga Cristianong kongregasyon sa Mbang, isa ka gamay nga banwa sa nabagatnan-sidlangan nga bahin sang pungsod. Mahibaluan na lang sa palaabuton kon dugang pa nga mga Pygmy sa Cameroon ang mamat-od nga magsimba kay Jehova, ang lamang matuod nga Dios, nga nagahigugma sa “tanan nga sahi sang tawo.”

[Nota]

[Retrato sa pahina 24]

Si Janvier Mbaki​—⁠ang una nga Pygmy sa Cameroon nga nakilala nga nangin Saksi​—⁠nagapakigbahin sa ministeryo