“San-o Mo Basahon Ini Tanan?”

Sang Hulyo 2001, isa ka tawo sa Khabarovsk sa Nasidlangan sang Rusya ang nakasapo sang 34 ka gua sang Magmata! sa isa ka librarya sang siudad. Ginhulam niya ini, kag sang nag-abot ang gintalana nga petsa sa pag-uli sang Agosto, indi niya luyag nga iuli ini. Gani ginhulam niya ini liwat tubtob Septiembre. Naluyagan gid niya ang mga magasin amo nga ginhulam niya ini liwat tubtob Nobiembre, upod sa anom pa ka bag-o nga mga gua.

Antes sini, pirme ginalikawan sining tawo ang relihioso nga mga publikasyon. Ngaa ginsugdan niya basa ang Magmata!? “Bangod ang kalabanan nga artikulo sa sini nga magasin makawiwili nga nagahinun-anon sang mga problema sang katawhan kag nagadalahig sa tanan,” sulat niya.

“Sa masami, may makawiwili nga mga ‘paglakbay’ sa moderno nga mga siudad kag mga pungsod, lakip ang impormasyon tuhoy sa mga tradisyon sang mga tawo,” padayon sang tawo. Naluyagan man niya ang mga artikulo tuhoy sa mga tawo nga nangin madinalag-on sa kabuhi, naghupot sang ila espirituwal nga mga prinsipio, kag nagbulig sa iban nga mabatas ang trahedya kag mga kasisit-an. Ang iya pagtamod sa magasin? “Sarang gid masiling nga ang Magmata! amo ang gintingob nga Time, Popular Science, kag National Geographic!”

Ang tawo nangabay sang nagliligad nga mga gua sang Magmata! sa Ruso halin pa sang 1995. Magluwas sa Magmata! nangabay pa sia sang iban nga mga libro kag mga brosyur nga ginbalhag sang mga Saksi ni Jehova. “Mahimo mamangkot kamo,” sulat niya, “ ‘San-o mo basahon ini tanan?’ ” Ginsabat niya ang iya pamangkot paagi sa pagsiling nga may tion sia sa pagbasa sing mapuslanon nga materyal bangod wala sia nagapadugay tan-aw sang telebisyon kag nagalagulad sa Internet.

May bugana nga impormasyon ang Magmata! tuhoy sa mga hitabo karon kag nagahatag sing paghangop sa solusyon sang mga problema karon. Ngaa indi mangabay sa mga Saksi ni Jehova nga dalhan ka sang bag-o nga mga gua sang Magmata! kada bulan?

[Retrato sa pahina 31]

Mga Kabataan—⁠Kon Ano ang Ila Ginakinahanglan sa Ila mga Ginikanan

[Retrato sa pahina 31]

Paghangop sa mga Problema sa Emosyon

[Retrato sa pahina 31]

Kilala Mo Bala ang Dios sa Ngalan?

[Retrato sa pahina 31]

Ang Peligro nga Mag-inaway Nuklear​—⁠Daw Ano ka Matuod Ini?

[Retrato sa pahina 31]

Paglaum​—⁠Diin Mo Ini Masapwan?

[Picture Credit Line sa pahina 31]

Nuclear explosion: U.⁠S. Department of Energy photograph