Bilanggo, Apang Hilway!

Suno sa manunulat sang Magmata! sa Mexico

NOBENTA kilometros ang kalayuon gikan sa natunga nga bahin sang nakatundan nga baybayon sang Mexico ang Islas Marías.⁠⁠ * Ang isa sa sining mga isla sa Pasipiko, ang María Madre, amo ang nangin prisuhan sang Mexico sugod sang 1905. May panahon anay nga ang mapriso didto isa ka ginakahadlukan gid nga silot, apang karon ang maayo sing rekord nga mga bilanggo mahimo magpangabay pa gani nga dalhon didto!

Ang isa ka rason sini amo nga ang pila ka bilanggo ginatugutan sa pagdala sang ila pamilya kag magpuyo upod sa ila. Sa baylo nga ginahunong sa mga selda, ang mga priso nagapuyo sa magagmay nga mga balay. Ang duog madamo sing publiko nga mga pasilidad nga masapwan mo sa diutay nga mga banwa. Ang telepono, telegrapo, telebisyon, kag koreo amo ang ginagamit sang mga priso sa pagkomunikar sa iban nga duog. Sarang makaeskwela ang kabataan didto sa elementarya, bisan pa nga dapat sila magbalik sa mainland kon maghayskul na sila. Kag bisan pa nga kontrolado gid ang pagkadto sa mga isla, ang barko sang navy nagadungka sa isla kada semana agod magdul-ong sang mga suplay kag mga bisita.

Kamusta naman ang pagpabag-o? Ang mga bilanggo​​—⁠⁠nga nagatawag sang ila kaugalingon nga mga colono, ukon dumuluong nga mga pumuluyo⁠—​ginapatrabaho sing pila ka oras kada adlaw. Wala lamang ini nagabulig sa ila nga makapasibu sa ulihi kon mahilway na sila kundi nagabulig man ini sa ila nga makabayad sa ila mga kinahanglanon. Ang mga colono sarang man makahimo sang ila personal nga mga palangabuhian, subong sang pagpananom kag pagbuhat sing mga handicraft. Indi sini buot silingon nga wala sing mga regulasyon kag mga pagdumili sa mga priso. Ang mga bilanggo dapat magreport kada aga kag magtuman sa curfew nga alas 9:00 sang gab-i.

Nag-abot sa Marías ang Espirituwal nga Kahilwayan

Sang 1985 nangayo sing bulig sa espirituwal ang isa ka colono, nga ang pamilya mga Saksi ni Jehova. Ginsugdan ang pagtuon sa Biblia paagi sa sulat. Sang ulihi, isa ka grupo sang mga estudyante sang Biblia ang naporma, kag nagsugod sila sa paghiwat sang Cristianong mga miting. Pagkatapos matigayon ang pahanugot sang gobierno, regular nga nagaduaw sa isla ang mga Saksi ni Jehova​​—⁠⁠13 ka oras nga paglakbay sa gab-i halin sa Mazatlán, sa mainland. Sa sulod sang mga tinuig mga 40 ka bilanggo ang nakatuon sang kamatuoran sang Pulong sang Dios, nabawtismuhan, kag pagkatapos sang ila sentensia, ginbuy-an. Sa tion sining pagsulat, 6 ka bawtismado nga Saksi ang yara gihapon sa isla, kag 25 ka tawo ang  promedyo nga nagatambong sa Cristianong mga miting.

Ginadayaw sang mga awtoridad ang mga Saksi ni Jehova bangod sang ila mga panikasog, kag ang mga bilanggo nga nangin mga Saksi ginatahod sang tanan. Nagkomento sining karon lang ang kabulig nga direktor sang bilangguan sa isa ka nagduaw nga Saksi: “Maayo gid nga pareho kamo sing tuyo sa amon nga talupangdon ang kaayuhan sang mga bilanggo sa pisikal kag moral, kag nga nagakabalaka kamo sa ila! Sakdagon namon kamo sa bisan ano nga paagi.” Nagtanyag sia nga kay-uhon ang tinukod nga ginatipunan sang mga kauturan.

Ang isa ka bawtismado nga Saksi​​—⁠⁠isa ka bilanggo nga napriso na sing napulo ka tuig​​—⁠⁠nagsiling: “Sang ginpamangkot ako sang mga kauturan nga nagaduaw kon luyag ko magbiya, ginsilingan ko sila nga luyag ko magpadayon sa pag-alagad diri; ginakabig ko ini nga teritoryo nga gin-asayn sa akon, bangod daku ang kinahanglanon diri. Siempre, luyag ko man nga magtambong sa mga asambleya kag makilala ang iban nga mga Cristiano.” Manuggua na sia sa masunod nga tuig bangod sang iya maayo nga paggawi.

Ang bilangguan sa Islas Marías ginreport nga madinalag-on sa pagpabag-o sa mga bilanggo. Apang, ang mensahe sang Ginharian amo ang nagdala sing matuod nga kahilwayan sa espirituwal kag pagpabag-o, isa ka “kahilwayan sa mga bihag” kag ‘pagpamuklat sang mga mata sang mga bilanggo.’​​—⁠⁠Lucas 4:​18; Isaias 61:⁠1.

[Nota]

[Kahon/Mga retrato sa pahina 29]

Halin sa Pagkagiyan sa Droga Pakadto sa Pagka-Cristianong Gulang

Si Guillermo nabilanggo bangod sa pagbaligya kag paggamit sing droga. Giyan gihapon sia sa droga bisan sa Islas Marías na sia. Apang natalupangdan niya nga ang pila ka bilanggo nga may malawig nga sentensia bangod sa pagbaligya sang droga nagapanapot na sing maayo, malipayon, kag nangin huwaran nga mga bilanggo. Sang nahibaluan niya nga ginatun-an sila sang mga Saksi ni Jehova sa Biblia, ginbaton niya ang pangagda nga magtambong sa ila mga miting. Sang ulihi ginsugdan ang pormal nga pagtuon sa Biblia upod sa iya.

Daku gid ang ginbag-o ni Guillermo kag wala madugay ginbuy-an sia. Ginpangita niya dayon ang mga Saksi ni Jehova agod mapadayon ang iya pagtuon. Isa na sia karon ka gulang sa Cristianong kongregasyon, kag karon 17 ka katapo sang iya pamilya mga Saksi ni Jehova na. Sia nagsiling: “Nalipay gid ako nga nakilala ko si Jehova kag nauntatan ko ang tanan ko nga bisyo. Madamo sang akon mga abyan anay ang patay na bangod sang droga. Naapektuhan sang droga ang akon utok, amo nga nangin malipaton ako. Apang ang paagi sa pagtuon sang mga Saksi nakabulig sa akon memorya. Natingala gid ang mga doktor kay abi nila indi na gid ako mag-ayo. Makatilingala gid ang nahimo sa akon kag sa akon pamilya sang kamatuoran sa Biblia. Wala gid namon mapakita ang gugma sa isa kag isa sadto, apang karon nahiusa na kami.”

[Mga mapa sa pahina 28]

(Para sa aktual nga pormat, tan-awa ang publikasyon)

Mazatlán

Islas Marías

María Madre

[Retrato sa pahina 28]

Ang mga “colono” kag ang ila mga pamilya nga nagatambong sa Kingdom Hall sa María Madre