Pamangkot sang mga Pamatan-on . . .

Paano Ko Malandas ang Kapaslawan?

“Bag-o ko lang nabaton ang akon kard, kag nalagbong na naman ako sa apat nakon ka klase. Nagatinguha gid ako, apang lagbong gihapon.”​—⁠Lauren, 15 anyos.

“Mabudlay gid atubangon ang kapaslawan. Kahapos lang abi mamensar sing negatibo.”​—⁠Jessica, 19 anyos.

KAPASLAWAN. Wala mo gid naluyagan ini nga tinaga. Apang kon kaisa, tanan kita makaatubang sini. Ang kapaslawan paagi sa pagkalagbong sa isa ka pasinawan sa eskwelahan, kahuy-anan sa publiko, pagsaklaw sa balatyagon sang aton pinalangga, ukon paghimo sing sala, masakit gid.

Sa pagkamatuod, ang tanan nga tawo nagasayop. “Ang tanan nagpakasala kag nakulangan sing himaya sang Dios,” siling sang Biblia. (Roma 3:23) Apang, ang pila sa aton nabudlayan magtindog kon madasma. Amo sini ang siling sang pamatan-on nga si Jason: “Sobra ako ka kritiko sa akon kaugalingon. Kon magsayop ako, mahimo makadlaw ang mga tawo​—⁠apang sa masami malipatan nila ini. Ako indi gid malipat, kag padayon ko nga ginahunahuna ang akon sayop.”

Indi man gid malain ang pagpamalandong sa imo sayop​—⁠ilabi na kon magatinguha ka sa pag-uswag bangod sini. Apang, ang nagadugay kag nagapadayon nga pagmulay sa kaugalingon makahalalit kag wala sing mahatag nga kaayuhan. Ang Hulubaton 12:25 nagasiling: “Ang kabalaka sa tagipusuon sang isa ka tawo magapakuko sini.”

Binagbinaga ang isa ka tawo sa Biblia nga si Epafrodito. Ginpadala sia sa Roma agod magbulig kay apostol Pablo. Apang, nagmasakit si Epafrodito kag wala niya nahimo ang iya buluhaton. Sa katunayan, si Pablo pa gani ang nag-atipan sa iya! Gintinguhaan ni Pablo nga papaulion si Epafrodito, nga ginapahibalo ang lokal nga kongregasyon nga napung-awan man ining matutom nga tawo. Ano ang rason? “Nabatian ninyo nga nagmasakit sia,” paathag ni Pablo. (Filipos 2:​25, 26) Sang narealisar ni Epafrodito nga nahibaluan sang iban nga nagmasakit sia kag wala nahimo ang iya mga katungdanan, pat-od nga nakabatyag gid sia sing kapaslawan. Indi katingalahan kon ngaa napung-awan sia!

May paagi bala nga malikawan ang masakit nga balatyagon sang kapaslawan?

Hibalua ang Imo mga Limitasyon

Ang isa ka paagi agod mabuhinan ang tsansa nga mapaslawan amo ang pagpahamtang sing makatarunganon, maugdang nga mga tulumuron para sa imo kaugalingon. “Ang kaalam yara sa mga maugdang,” siling sang Biblia. (Hulubaton 11:⁠2; 16:18) Kag ang maugdang nga tawo nakahibalo sang iya mga limitasyon. Huo, maayo man kon kaisa nga tilawan mo ang imo kaugalingon kon bala nag-uswag na ang imo abilidad kag ikasarang. Apang mangin realistiko. Basi indi ka man gid eksperto sa matematika ukon wala sing abilidad para mangin isa ka panguna nga atleta. Ang pamatan-on nga  si Michael nag-ako: “Nakahibalo ako nga indi ako maayo sa isport. Gani nagahampang ako, apang wala ako nagalab-ot sang indi ko masarangan.” Ginpaathag niya: “Dapat ka magpahamtang sing mga tulumuron nga masarangan mo.”

Binagbinaga ang panimuot sang isa ka 14-anyos nga si Yvonne, nga may balatian nga spina bifida kag cerebral palsy. “Indi ako makalakat ukon makasaot, ukon makadalagan kaangay sang iban,” siling ni Yvonne. “Naugot ako nga indi ko mahimo ang ginahimo sang iban. Ang kalabanan indi makaintiende sa akon nabatyagan. Apang maatubang ko ini.” Ang iya laygay? “Indi mag-untat. Padayon lang sa pagtinguha. Kon mapaslawan ka ukon wala nakahimo sing maayo, indi magkataka. Padayon lang nga himua ang imo labing masarangan.”

Sa amo man nga tion, indi pagpabudlayi ang imo kaugalingon paagi sa indi nagakaigo nga pagpaanggid sang imo kaugalingon sa iban. Ang 15 anyos nga si Andrew, nagsiling, “Gintinguhaan ko nga likawan ang pagpaanggid sang akon kaugalingon sa iban bangod magkatuhay ang aton tanan mga ikasarang kag mga abilidad.” Mabanaag sa komento ni Andrew ang mga pulong sang Galacia 6:4: “Pamatud-an sang kada isa kon ano ang iya kaugalingon nga binuhatan, kag nian ang rason niya sa pagpabugal mangin sa iya kaugalingon lamang kag indi sa pagpaanggid sa iban.”

Daku nga Pagpaabot sang Iban

Apang, kon kaisa, daku ang ginapaabot sa imo​—⁠sang imo ginikanan, manunudlo, kag iban pa. Kag marealisar mo nga bisan ano pa ang himuon mo, indi mo gihapon sila mapahamut-an. Mas malain pa, mahimo nila ihambal sa imo ang ila kalugaw-an amo nga mainit ka ukon ayhan maluyahan gid sing buot. (Job 19:2) Mahimo nga narealisar mo nga wala man gid sing tuyo ang imo mga ginikanan ukon ang iban nga saklawon ikaw. Subong sa pagpanilag ni Jessica, “sa masami wala gid sila kahibalo nga naapektuhan gali ikaw. Kon kaisa isa lang ini ka dipaghangpanay.”

Sa pihak nga bahin, posible ayhan nga nakita nila ang butang nga indi mo makita? Halimbawa, basi ginapakadiutay mo lang ang imo abilidad kag ginapakanubo ang imo kaugalingon. Sa baylo nga indi pagsapakon ang ila mga panugda, maalamon nga ‘pamatian mo ang disiplina.’ (Hulubaton 8:33) Ginpaathag ni Michael: “Para ina sa imo kaayuhan. Luyag nila nga maghimo ka sing maayo agod mapauswag mo pa ang imo kaugalingon. Kabiga ini subong isa ka hangkat.”

Apang, ano abi kon ang ginapangita sang imo mga ginikanan kag sang iban indi makatarunganon​—⁠nga mapaslawan ka lamang? Nian maalamon nga makigsugilanon sa ila​—⁠sing matinahuron, apang sing prangka​—⁠kag pahibalua sila kon ano ang ginabatyag mo. Nian upod kamo nga magpahamtang sing pila ka mas realistiko nga tulumuron.

“Mga Kapaslawan” sa Imo Espirituwal nga Kabuhi

Ang nabudlayan gid sang mga pamatan-on nga mga Saksi ni Jehova amo ang pagtuman sa ila buluhaton subong mga ministro sang Dios. (2 Timoteo 4:5) Kon isa ikaw ka pamatan-on nga Cristiano, mahimo nga kon kaisa daw nagabatyag ka nga indi sangkol. Mahimo nagabatyag ka nga indi maayo ang mga komento mo sa mga miting. Ukon ayhan nabudlayan ka magpaathag sang mensahe sang Biblia sa iban. Halimbawa, si Jessica nagtuon sing Biblia upod sa isa pa ka tin-edyer nga babayi. Sa primero maayo ang pag-uswag sang iya estudyante sa Biblia. Apang, gulpi lamang namat-od ang babayi nga indi na niya luyag mag-alagad sa Dios. Hinumdom ni Jessica, “pamatyag ko napaslawan ako subong isa ka manunudlo.”

 Paano nalandas ni Jessica ini nga balatyagon? Una, dapat niya dumdumon nga ang ginsikway sang iya estudyante, indi sia, kundi ang Dios. Nakabulig man sa iya ang pagpamalandong sa halimbawa ni Pedro sa Biblia, isa ka mahinadlukon sa Dios nga tawo nga madamo sing nahimo nga sayop. Nagpaathag sia, “Ginapakita sang Biblia nga nadaug ni Pedro ang iya mga kaluyahon, kag gingamit sia ni Jehova sa madamong paagi sa pagpasanyog sang mga intereses sang Ginharian.” (Lucas 22:31-​34, 60-​62) Sa pagkamatuod, kon ang imo ikasarang subong manunudlo dapat pauswagon, ngaa indi mo ukuran nga pauswagon pa ini? (1 Timoteo 4:13) Mangayo sing bulig sa mga hamtong sa kongregasyon nga puede magtudlo kag maghanas sa imo.

Apang, basi ang nabudlayan mo gid himuon amo ang pamalaybalay nga ministeryo. Gin-ako ni Jason, “Nagabatyag ako sing diutay nga kapaslawan kada may magsirado sang puertahan sa akon.” Paano sia nakalandas? “Dapat ko dumdumon nga wala man gid ako napaslawan.” Huo, nagmadinalag-on sia sa pagtuman sa ginapahimo sang Dios sa iya​—⁠ang magbantala! Kag bisan pa ang pagsikway daw mabudlay batunon, indi tanan nga tawo magasikway sa mensahe sang Biblia. “Kon makasapo ako sing isa ka tawo nga nagapamati,” siling ni Jason, “nahibaluan ko nga takus gid ini sang tanan nga panikasog.”

Serioso nga mga Kasaypanan

Ano abi kon makahimo ka sing isa ka serioso nga sayop​—⁠ukon makahimo pa gani sing mabug-at nga sala? Si Ana, nga 19 anyos, nakabuhat sining sayop. * Gin-ako niya, “ginpaslaw ko ang kongregasyon, ang akon pamilya, kag ilabi na gid si Jehova nga Dios.” Agod makapanumbalik, dapat ka maghinulsol kag mangayo sing bulig sa espirituwal nga mga gulang sa kongregasyon. (Santiago 5:​14-​16) Nadumduman ni Ana ang mabuligon nga mga pinamulong sang isa ka gulang: “Nagsiling sia nga bisan pa madamo sing sayop nga nahimo si Hari David, handa gihapon si Jehova sa pagpatawad sa iya, nian nakapanumbalik si David. Nakabulig ini sa akon.” (2 Samuel 12:​9, 13; Salmo 32:5) Dapat tinguhaan mo man nga pabakuron ang imo espirituwalidad. “Sulitsulit ko nga ginabasa ang tulun-an nga Salmo,” siling ni Ana, “kag may personal ako nga sululatan nga ginasulatan ko sang makapalig-on nga mga teksto.” Sa ulihi, makapanumbalik ang isa bisan pa nakahimo sing mabug-at nga sala. Ang Hulubaton 24:16 nagasiling: “Ang matarong mahimo mapukan bisan sing makapito, kag pat-od nga magabangon sia.”

Pagpadayon Pagkatapos sang Kapaslawan

Sa pagkamatuod, bisan ang magagmay nga mga kapaslawan masakit gihapon batyagon. Ano ang makabulig sa imo agod makapadayon pagkatapos mapaslawan? Una sa tanan, atubanga ang imo mga kasaypanan sing realistiko. Si Michael nagrekomendar: “Sa baylo nga kabigon ang imo kaugalingon nga wala na sing tsansa nga magbag-o, hibalua kon diin ka napaslawan kag kon ano ang kabangdanan sini. Sa amo malikawan mo na ini sa masunod nga tion.”

Indi ka man dapat mangin tuman ka serioso sa imo kaugalingon. May “tion sa pagkadlaw”​—⁠kag mahimo nalakip sa sini ang pagkadlaw sa imo kaugalingon nga mga sayop! (Manugwali 3:4) Kon naluyahan ka sing buot, iliso ang imo atension sa mga butang nga maayo ikaw, subong sang isa ka kalingawan ukon isa ka isport. Ang “mangin manggaranon sa maayong mga buhat”​—⁠subong sang pagpaambit sang imo pagtuo sa iban​—⁠makabulig sa imo nga mas mahamuot sa imo kaugalingon.​—⁠1 Timoteo 6:18.

Sa katapusan, dumduma nga “si Jehova maluluy-on kag mainayuhon . . . Indi sia magpangita sing sayop sa tanan nga tion.” (Salmo 103:​8, 9) Si Jessica nagsiling, “Nabatyagan ko nga samtang nagasuod ako kay Jehova nga Dios, mas nagadaku ang akon pagsalig nga suportahan niya ako kag buligan sa bisan ano nga akon maagihan.” Huo, makapalig-on mahibaluan nga bisan nagakapaslawan ka, ginapabaloran ka sang imo langitnon nga Amay.

[Nota]

[Retrato sa pahina 20]

Kon nabug-atan ka sa mga ginapaabot sa imo, mangita sing paagi nga ipakigsugilanon ini sing matinahuron