Ang Pagtamod sang Biblia

Isa Bala ka Tanda sang Kaluyahon ang Mangin Malulo?

“Ang ulipon sang Ginuo indi dapat makig-away, kundi dapat magmalulo sa tanan.”​—⁠2 TIMOTEO 2:24.

ANTES pa kita mabun-ag, ang aton nagatubo nga panit may igbalatyag na. Kutob sa pagkabun-ag ginahandum gid naton ang mapinalanggaon nga paghapulas sang aton iloy. Sa tion sang pagkabata ang pagpalangga sang aton mga ginikanan may daku gid nga epekto sa aton pagyuhum, sa aton balatyagon, kag bisan sa aton ikasarang sa pagpakigsugilanon.

Apang, ang Biblia nagtagna nga sa katapusan nga mga adlaw, ang mga tawo mangin “di-matinumanon sa mga ginikanan, di-mapinasalamaton, di-mainunungon, wala sing kinaugali nga gugma.” Ang malulo nga mga kinaiya subong sang kaayo kag kaluoy indi gid makita bangod ang mga tawo mangin “mahigugmaon sa kaugalingon” kag “mabangis, wala sing gugma sa kaayo.”​​—⁠2 Timoteo 3:1-3.

Madamo karon ang nagabatyag nga kinahanglan ang katigdas kag katig-a  sing balatyagon. Nagasiling sila nga ang kalulo isa ka tanda sang kaluyahon. Apang amo gid bala?

Malulo, Apang Gamhanan

Si Jehova nga Dios ginalaragway subong “isa ka isganan nga mangangaway.” (Exodo 15:3) Sia ang labing daku nga Ginhalinan sang tanan nga gahom. (Salmo 62:11; Roma 1:20) Apang, ang kusog ni Jehova wala magpugong sa iya nga mangin “mapinalanggaon gid kag maluluy-on” sang ginpadyaan niya ang matutom nga si Job. (Santiago 5:11) Sa iya pagpakig-angot sa Israel, ginlaragway ni Jehova ang iya malulo gid nga kaangtanan sa ila paagi sa pagpaanggid sang iya balatyagon sa iya sang nagabatiti nga iloy nga nagakaluoy sa “anak sang iya tiyan.”​​—⁠Isaias 49:15.

Si Jesus makusog kag malulo man. Matigdas nga ginpakamalaut niya ang salimpapaw nga mga lider sang relihion sang panahon niya. (Mateo 23:​1-​33) Gintabog man niya ang makagod nga mga manugbaylo-kuarta sa templo. (Mateo 21:​12, 13) Apang nangin walay balatyagon bala si Jesus bangod sang pagdumot niya sa kagarukan kag kakagod? Indi gid! Si Jesus nakilal-an nga malulo sa iban. Ginpaanggid pa gani niya ang iya kaugalingon sa isa ka munga nga ‘nagatipon sang iya mga piso sa idalom sang iya mga pakpak.’​​—⁠Lucas 13:34.

Nagua nga Katig-a Ukon Nasulod nga Kabakod?

Ang matuod nga mga Cristiano ginapalig-on nga ilugon si Cristo paagi sa pagsuklob sing “bag-o nga personalidad nga gintuga suno sa kabubut-on sang Dios.” (Efeso 4:​20-​24) Kaangay sang isa ka kasag nga nagahiluno agod magdaku ini, ginasugo kita nga ‘ubahon ang daan nga personalidad upod ang mga buhat sini.’ (Colosas 3:9) Apang, indi kaangay sang kasag nga liwat nga nagatig-a ang lawas pagkatapos maghiluno, ginasugo kita nga permanente nga panaptan ang aton kaugalingon sing “mapinalanggaon nga gugma nga may kaawa, kaayo, . . . kag pagkamainantuson.” (Colosas 3:12) Kon amo, ang kalulo dapat isa sa talalupangdon nga mga kinaiya naton.

Ang pagpanapot sing malulo nga mga kinaiya indi tanda sang kaluyahon. Sa baylo, nagakinahanglan ini nga mangin ‘mabaskog kita sa aton pagkatawo sa sulod paagi sa gahom sang espiritu ni Jehova.’ (Efeso 3:16) Halimbawa, ang isa ka lalaki nga si Lee nagsiling: “Mapintas kag malain anay ako nga tawo. Makahaladlok pa gani ang akon hitsura, kay gintuhog ko sing alahas ang pila ka bahin sang akon lawas. Determinado gid ako nga makakuarta kag maabtik ako mamuyayaw kag magsingki agod makuha ang akon gusto. Wala ako sing kaluoy.” Walay sapayan sini, si Lee nagtuon sing Biblia upod sa iya katrabaho kag nakilala kag ginhigugma niya si Jehova nga Dios. Gin-uba niya ang iya daan nga personalidad kag nakatuon sa pagpugong sa iya kaugalingon. Ginapabutyag niya karon ang iya gugma sa mga tawo paagi sa pagboluntaryo sang iya tion agod buligan sila sa pagtuon sa Biblia.

Si apostol Pablo isa man anay ka “tawo nga manugtampalas” nga naggamit sing kasingki agod makuha ang gusto niya. (1 Timoteo 1:13; Binuhatan 9:​1, 2) Apang, sang naapresyar ni Pablo ang kaluoy kag gugma nga ginpakita sa iya ni Jehova nga Dios kag ni Jesucristo, nagpanikasog sia nga ilugon ini nga mga kinaiya. (1 Corinto 11:1) Bisan pa nanindugan si Pablo sa Cristianong mga prinsipio, natun-an niya nga mangin malulo sa pagpakig-angot sa iban. Sa pagkamatuod, ginpabutyag ni Pablo ang iya mapinalanggaon nga gugma sa iya mga utod.​​—⁠Binuhatan 20:​31, 36-​38; Filemon 12.

Kon Paano Maagom ang Kabakod nga Mangin Malulo

Subong ginapakita sang eksperiensia ni Lee kag ni apostol Pablo, ang pagtuon nga mangin malulo sa iban wala nagakinahanglan nga ang isa mangin maluya sing kinaiya. Ang matuod, kabaliskaran ini. Ang kalulo nagakinahanglan gid sing kabakod agod bag-uhon ang panghunahuna kag binuhatan kag agod batuan ang undanon nga huyog nga “magbalos sing malaut sa malaut.”​​—⁠Roma 12:​2, 17.

Matun-an man naton nga mangin malulo kag maluluy-on paagi sa regular nga pagbasa sang Pulong sang Dios kag pagpamalandong sa gugma kag kaluoy nga ginpakita na sa aton ni Jehova nga Dios kag sang iya Anak, nga si Jesucristo. Paagi sa paghimo sini, ginatugutan naton ang gahom sang Pulong sang Dios sa pagpahumok sang aton tagipusuon. (2 Cronica 34:​26, 27; Hebreo 4:12) Bisan ano man ang aton gindak-an ukon daw ano man kapait ang aton mga inagihan sa kabuhi, matun-an naton nga ‘mangin malulo sa tanan.’​​—⁠2 Timoteo 2:24.

[Retrato sa pahina 20]

Ang maayo nga amay malulo sa iya mga anak