“Kon Nahibaluan Lamang Ini sang mga Tawo!”

PAGKAGRADWAR sa hayskul, ang tion nga determinado ang madamo nga pamatan-on nga magmanggaranon, tuhay ang ginhunahuna ni David. Sang Septiembre 2003, nagsaylo sila sang iya amigo halin sa Illinois, Estados Unidos, pakadto sa Dominican Republic.⁠ * Nagtuon sing Espanyol si Davey, ang hayo sa iya sang iya mga abyan kag pamilya, kag nagbuylog sa kongregasyon sang mga Saksi ni Jehova sa Navas sa ila pagpanudlo sing Biblia. Gin-abiabi gid sia sang kongregasyon. “Ginhimo ni Davey ang bisan ano nga ginpangabay sa iya,” siling ni Juan, ang nagaisahanon nga gulang sa sini nga kongregasyon. “Pirme sia nagaboluntaryo para sa iban, kag palangga sia sang kauturan.”

Naluyagan gid ni Davey ang iya asaynment. “Nalipay gid ako sa akon kabuhi diri,” sulat niya sa iya amigo sa Estados Unidos. “Makapapagsik gid ang ministeryo! May masugilanon kami sa tagsa ka balay sa sulod sang 20 minutos bangod gusto pamatian sang mga tawo ang tanan mo nga isiling sa ila. Nagahiwat na ako sing anom ka pagtuon sa Biblia, apang nagakinahanglan pa kami sing bulig. Sa isa ka miting sa amon kongregasyon nga may 30 ka manugbantala sang Ginharian, 103 ang nagtambong!”

Sing makapasubo, sang Abril 24, 2004, napatay sa aksidente si Davey kag ang isa pa ka pamatan-on nga kaupod niya sa kongregasyon. Tubtob sang mapatay si Davey, puno sia sing kapagsik sa iya hilikuton, kag ginpalig-on niya ang iban nga pamatan-on sa ila duog nga magbuylog sa iya. “Bag-uhon sini ang imo pagtamod,” siling niya sa isa ka pamatan-on nga Saksi.

Nagbag-o mismo ang pagtamod ni Davey sa materyal nga mga butang. “Sang nagpauli si Davey,” hinumdom sang iya amay, “gin-agda sia nga mag-ski. Namangkot sia kon pila ang gastuhon. Sang ginsugiran sia sang gasto, nagsiling si Davey nga indi gid sia maggasto sing amo sini para lang sa pag-ski bangod sa amo nga kantidad pila ka bulan na sia nga makatener sa Dominican Republic!”

Natandog ang iban sa kakugi ni Davey. “Sang nabalitaan ko ang ginhimo ni Davey kag kon daw ano sia kasadya,” siling sang isa ka pamatan-on, “nahunahuna ko nga mahimo ko man ini. Bangod sang kamatayon ni Davey, napensaran ko kon ano ayhan ang isiling sang mga tawo parte sa akon kon mapatay ako kag kon maimpluwensiahan ko man bala ang iban sing subong sini.”

Subong mga Saksi ni Jehova, nagasalig gid ang mga ginikanan kag mga utod ni Davey nga banhawon sia sang Dios sa maabot nga matarong nga bag-ong kalibutan. (Juan 5:​28, 29; Bugna 21:1-4) Samtang wala pa ini, ginalugpayan sila sang ihibalo nga gingamit ni Davey ang iya kabuhi sa pinakamaayo nga paagi​—⁠sa pag-alagad sa iya Manunuga. (Manugwali 12:1) Nagsiling anay si Davey tuhoy sa iya desisyon nga mag-alagad kon diin kapin pa ang kinahanglanon: “Kuntani amo man sini ang himuon sang tanan nga pamatan-on agod mabatyagan man nila ang akon kalipay. Wala na sing mas maayo pa sangsa alagdon si Jehova sing bug-os kalag. Kon nahibaluan lamang ini sang mga tawo!”

[Nota]