Pamangkot sang mga Pamatan-on . . .

Paano Kon Mangindi ang Isa ka Lalaki?

PARA sa imo, isa sia ka abyan. Apang nahulog ang imo buot sa iya. Ayhan bangod ini sang iya maayong pamatasan ukon sang iya pagyuhum sa imo kon nagahambal sia. Ano man ang rason, nagligad ang tion, apang wala gid sia nagpakita sing romantiko nga interes sa imo. Gani ginpamangkot mo sia kon may tuyo sia nga mangaluyag. Nalugaw-an gid ikaw sang mainayuhon apang malig-on sia nga nagsiling nga wala.⁠ *

Magalain gid man ang imo buot. Apang indi magkasubo sing tuman; tamda sing nagakaigo ang kahimtangan. Huo, nangindi ang isa ka lalaki nga mangaluyag sa imo. Dumduma nga ang iya desisyon wala nagabuhin sang imo pagkatawo, kag indi sini madula ang pagpalangga kag pagtahod sang iban sa imo. Ang matuod, mahimo nga wala sing labot ang iya desisyon sa iya pagtamod sa imo, kundi bangod may lain sia nga mga tulumuron kag prioridad.

Kon ikaw isa ka Cristiano, dumduma man nga “ang Dios indi di-matarong nga malipat sa [imo] binuhatan kag sa gugma nga ginpakita [mo] tungod sa iya ngalan.” (Hebreo 6:10) Si Sonja⁠ * nagsiling: “Hamili ka gihapon. Importante ka kay Jehova subong di-minyo.” Bangod importante gid ikaw sa Labing Gamhanan kag sa iban, ngaa madulaan ka sing pagtahod sa kaugalingon?

Mahimo ka gihapon magbatyag nga napaslawan ukon mahangawa nga indi ka na gid makapamana. Apang indi buot silingon nga kon wala ka “maluyagan” sang isa ka lalaki sa sini nga tion, indi ka na “maluyagan” sang iban. (Hukom 14:3) Gani sa baylo nga tamdon nga napaslawan ka sa pagpangita sing nagakaigo nga palamanhon, hunahunaa nga may isa ka mapuslanon nga resulta ang imo panikasog: Nahibaluan mo nga indi para sa imo ini nga lalaki. Ngaa masiling naton ini?

 Nagakabagay Bala Sia sa Imo?

Ginsugo sang Biblia ang mga bana nga “maghigugma sang ila mga asawa subong sang ila kaugalingon nga mga lawas.” (Efeso 5:28) Ginsugo man sini ang mga bana nga ‘hatagan sing dungog’ ang ila asawa. (1 Pedro 3:7) Sa sini nga kahimtangan, mahimo gid nga ginapabaloran ka sini nga lalaki subong isa ka abyan. Apang sang nangindi sia, daw ginpakita niya nga indi pa sia handa sa paghigugma kag sa pagpadungog sa imo subong iya asawa. Kinamatarong niya ini. Hunahunaa ini: Kon amo sini ang iya ginabatyag, mangin maayo ayhan sia nga bana para sa imo? Handurawa lamang ang imo kasubo kon napamana mo ang isa nga wala naghigugma kag nagpakabahandi sa imo subong sang ginsiling sa Kasulatan!

Makabulig man kon binagbinagon mo liwat ang paggawi sini nga lalaki, karon nga wala na sing tsansa nga mangin nobyo mo sia. Kon kaisa bangod sang pagsalimuang sa isa, indi mo makita ang iya personal kag espirituwal nga mga kaluyahon nga makita sang iban. Halimbawa, wala bala sia makahibalo nga nagakahulog ang buot mo sa iya, ukon ginahungod niya nga mahulog ang imo buot paagi sa padayon nga pagpakig-upod sa imo? Kon ginahungod niya ini, wala bala sini ginapakita nga indi sia handa nga mangin mapatugsilingon kag mahinuklugon nga Cristianong bana? Gani, mas maayo nga mahibaluan mo ini, bisan pa masakit ini.

Napukaw ang balatyagon ni Marcia sa isa ka lalaki nga nagpakita sa iya sing pinasahi nga atension. Sang ginpamangkot niya ang intensyon sang lalaki, nagsiling ang lalaki nga wala sia sing tuyo nga mangaluyag. Ano ang nagbulig kay Marcia nga malandas ini nga kahimtangan? Nagsiling sia, “Ang paggamit sang akon hunahuna, sa baylo sang akon tagipusuon, ang nagbulig sa akon nga makontrol ang akon balatyagon.” Paagi sa pagdumdom sa mga ginapatuman sang Biblia sa mga bana, narealisar niya nga wala ini malab-ot sang lalaki. Nakabulig ini sa iya nga malandas ang iya kasubo.

Naeksperiensiahan man ini ni Andrea. Narealisar niya sang ulihi nga indi hamtong ang isa ka lalaki bangod sang iya ginahimo. Nahantop niya nga ang lalaki indi pa handa sa pag-asawahay, kag nagapasalamat sia nga ginpakita ini sa iya ni Jehova. Nagsiling sia, “Nagapati ako nga mapahilayo ka ni Jehova sa masakit nga mga kahimtangan, apang dapat ka magsalig sa Iya.” Siempre pa, masami nga maayo ang paggawi sang isa ka lalaki kag nagapangindi sia bangod sang dungganon nga mga rason. Ano man ang kahimtangan, paano mo malandas ang imo balatyagon?

Paglandas sa Imo Balatyagon

Mahimo magkinahanglan sing tion agod mabaton mo sing hugot ang iya pagpangindi. Nagtubo ang imo balatyagon sa iya sa pagligad sang tion, kag ang pagdula sini nagakinahanglan man sing tion. Ang pagbatyag sing kaluyag indi pareho sa suga nga madali lang patyon. May mga tion nga daw indi gid ini masarangan! Magpailob. Madula ini nga balatyagon sa pagligad sang tion. Apang kon luyag mo nga madali ini madula, likawi ang mga butang nga nagapabaskog sa sini.

Halimbawa, likawi nga pamensaron liwat ang tanan mo nga ginhambal kag ginhimo sang ginsugiran mo sia sang imo balatyagon. Kon indi mo ini pagpunggan, basi maghinakop ka nga wala gid man sia nagapangindi sa imo ukon basi magmadinalag-on ang lain nga pamaagi. Batuna ang kamatuoran nga indi mo mabag-o ang iya balatyagon. Mahimo gid nga bisan ano pa ang imo himuon, amo gihapon ang iya sabat.

Isa man ka siod ang pagdalamguhanon. Ginahanduraw mo nga nagdayunay kamo kag malipayon. Daw makapaumpaw ini nga mga dalamguhanon, apang indi ini matuod. Kon matapos ini, yara gihapon ang imo kasubo. Ining pabalikbalik nga kalipay nga ginasundan sang indi maagwanta nga kasakit mahimo magdugay kon indi mo ini pag-untaton.

Tinguhai nga indi magdalamguhanon. Kon magsulod ini sa imo hunahuna, magtindog kag magdayandayan. Maghimo sing isa ka hilikuton agod mabalhin ang imo atension. Magkonsentrar sa mga butang nga makapalig-on, indi sa mga butang nga makapasubo sa imo. (Filipos 4:8) Mabudlay ini sa primero, apang sa ulihi, magamadinalag-on ka kag indi ka na mabalaka.

Makabulig ang imo suod nga mga abyan. (Hulubaton 17:17) Apang, nagpaandam si Sonja: “Indi maayo kon di-minyo tanan ang imo mga abyan, palareho sing edad, kag luyag magpamana. Kinahanglan mo man ang mga abyan nga  mas may edad na, nga makabulig agod matigayon mo ang husto nga pagtamod.” Kag dumduma, may isa nga makabulig sing kapin agod malandas ang imo kasakit.

Si Jehova​—⁠Abyan kag Manugbulig

Sang napaslawan ang isa ka matutom nga tawo sang una, nangamuyo sia kay Jehova nga buligan sia. Ano ang resulta? Nagsulat sia: “Kon ako indi mapahamtang kag nagapalibog, ikaw nagalipay kag nagapasadya sa akon.” (Salmo 94:​19, Maayong Balita nga Biblia) Lipayon ka man kag buligan ni Jehova kon mangamuyo kag magtuo ka sa iya. Amo sini ang ginhimo ni Andrea. Nagsiling sia, “Kinahanglan gid ang pangamuyo agod malandas ang kasakit kag makapadayon.” Tuhoy sa pangamuyo, si Sonja nagsiling man, “Nagahatag ini sa imo sing pagsalig sa kaugalingon naluyagan ka man sang iban ukon wala.”

Wala sing makahangop sa imo balatyagon sing bug-os magluwas kay Jehova. Gintuga niya ang mga tawo nga may handum nga maghigugmaanay subong mag-asawa. Nahibaluan niya ang kabaskugon sang romantiko nga balatyagon, kag nahibaluan niya kon paano ini kontrolon. Mabuligan ka niya nga malandas ang daku nga kasakit sang balatyagon, kay ang 1 Juan 3:20 nagsiling: “Ang Dios daku pa sa aton tagipusuon kag nakahibalo sang tanan nga butang.”

Mangin Balanse

Mahimo maghatag sing daku nga kalipay ang pag-asawahay, apang indi lamang ini ang makahatag sing kalipay. Maeksperiensiahan sang tanan nga nagaalagad kay Jehova ang kalipay, indi lamang sang mga mag-asawa. Sa pila ka paagi, may bentaha ang mga di-minyo. Wala sila sing “kapipit-an sa ila unod” nga ginsambit sa 1 Corinto 7:28. Ini nga kapipit-an amo ang mga kahuol kag mga kabudlayan nga naeksperiensiahan sang tanan nga mag-asawa. Mas hilway man ang mga di-minyo kag mas mahapos nila magamit ang ila kabuhi sa pag-alagad kay Jehova. Gani, ang Biblia nagatudlo: “Sia nga nagahatag sang iya pagkaulay sa pag-asawahay nagahimo sing maayo, apang ang wala nagahatag sini sa pag-asawahay nagahimo sing maayo pa.” (1 Corinto 7:38) Bisan pa luyag mo gid magpamana, ang pagpamalandong sa sini nga mga panudlo sang Biblia makabulig sa imo nga mangin balanse kag malipay sa imo kahimtangan karon.

Mahimo magsiling ang imo mga abyan, “Indi magkabalaka, pila ka adlaw, makakita ka gid sing maayo para sa imo.” Kag indi matuod nga kon ginpangindian ka kis-a, magaisahanon ka na gid lang. Apang, nangatarungan ang lamharon nga Cristianong babayi nga si Candace: “Nagasalig ako kay Jehova. Wala gid man ako nagapaabot nga hatagan niya ako sing bana agod mangin malipayon. Apang nahibaluan ko nga ihatag niya sa akon ang akon kinahanglanon.” Nagbulig sa iya ang positibo nga panghunahuna agod malandas ang iya kapaslawan sa paghigugma.

Masami nga nagakapaslawan sa sini nga kalibutan ang mga nagatilaw sa pagpangaluyag, apang amo man ang madamo nga pag-asawahay. Kon magsalig ka kay Jehova kag magsunod sa iya laygay, buligan ka niya nga mangin malipayon walay sapayan sang kapaslawan. Mangin kaanggid kay Hari David ang imo maeksperiensiahan sang nagsulat sia: “O Jehova, yara sa atubangan mo ang tanan ko nga handum, kag ang akon panghayhay wala malipdi sa imo. Kay sa imo, O Jehova, nagahulat ako; nagsabat ka, O Jehova nga akon Dios.”​—⁠Salmo 38:​9, 15.

[Mga nota]

[Mga retrato sa pahina 28]

Batuna ang bulig nga ginahatag sang Dios