Ginasalakay sang Kahuol!

“NUMERO Uno nga Problema sa Panglawas sa Amerika.” Amo ini ang ulong-dinalan sang isa ka artikulo nga ginbalhag sang American Institute of Stress nga nagasiling nga indi kanser ukon AIDS ang numero uno nga katalagman sa panglawas karon. Siling sang report: “Ginabanabana nga 75-90 porsiento sang tanan nga nagapakonsulta sa mga doktor ang may problema may kaangtanan sa kahuol.”

Indi pagpasobra ang magsiling nga ang mga tawo ginasalakay karon sang kahuol. Suno sa National Consumers League, “ang trabaho amo ang numero uno nga kabangdanan sang kahuol sa mga adulto nga may mga problema kag kahuol sa ila kabuhi (39%), masunod amo ang pamilya (30%). Ang iban pa nga mga kabangdanan sang kahuol amo ang panglawas (10%), kabalaka sa ekonomiya (9%) kag kabalaka sa internasyonal nga inaway kag terorismo (4%).”

Apang, indi lamang Estados Unidos ang may problema sa kahuol. Ginabanabana sang isa ka surbe sa Britanya sang 2002 nga “kapin sa tunga sa milyon ka indibiduwal sa Britanya sang 2001/2 ang nagpati nga nakaeksperiensia sila sang may kaangtanan sa trabaho nga kahuol tubtob sa punto nga nagmasakit sila .” Subong resulta sang “may kaangtanan sa trabaho nga kahuol, depresyon ukon kabalaka,” “ang mga mamumugon sa Britanya ginareport nga nagapalya sa trabaho sing mga napulog tatlo kag tunga ka milyon ka adlaw kada tuig.”

Amo man sini ang kahimtangan sa Europa. Suno sa European Agency for Safety and Health at Work, “minilyon ka mamumugon sa Europa nga may lainlain nga sahi sang trabaho ang napamatud-an nga naapektuhan sang may kaangtanan sa trabaho nga kahuol.” Ginpakita sang isa ka surbe nga “mga 41 milyones ka mamumugon [sa European Union] ang naapektuhan sang may kaangtanan sa trabaho nga kahuol kada tuig.”

Kamusta naman sa Asia? Ang isa ka report nga ginpagua sa isa ka komperensia sa Tokyo naghinakop: “Ang kahuol sa trabaho amo ang kinaandan nga ginakabalak-an sang madamo nga pungsod sa kalibutan, lunsay sang imol kag industriyalisado nga mga pungsod.” Ang report nagsiling nga “ang pila ka pungsod sa Sidlangan nga Asia, lakip ang Korea Taiwan, kag Tsina, madasig nga nangin industriyalisado kag nagtin-ad sa ekonomiya. Ini nga mga pungsod nabalaka gid karon sa kahuol sa trabaho kag sa malain nga epekto sini sa panglawas sang mga mamumugon.”

Apang, indi na kinahanglan nga magpanalawsaw ka pa agod mahibaluan mo nga ang mga tawo nagabatyag sing kahuol. Mahimo nga ikaw man naapektuhan sang kahuol! Ano ang makahalalit nga epekto sang kahuol sa imo kag sa imo mga hinigugma? Paano ini malandas sang mga pamilya? Ini nga mga pamangkot binagbinagon sa masunod nga mga artikulo.

[Retrato sa pahina 3]

Para sa madamo, ang ila trabaho amo ang numero uno nga kabangdanan sang kahuol