Ang Pagtamod sang Biblia

Ang Dios Bala Yara Bisan Diin?

NAGAKAIGO gid nga ginlaragway ang Dios subong ang labing gamhanan kag ang labing maalam. Apang, sa pagtinguha pa gid nga ilaragway ang pagkadaku sang Dios, ang iban nagasiling nga ang Dios yara man bisan diin.

Ang una nga duha ka paglaragway maathag nga ginasakdag sang mga panudlo sang Kasulatan. (Genesis 17:⁠1; Hebreo 4:​13; Bugna 11:17) Sa pagkamatuod ang Dios labing gamhanan, kag labing maalam sia sa kahulugan nga wala gid sing matago sa iya. Apang, ang Dios bala yara bisan diin, ukon sia bala isa ka persona nga may yara espesipiko nga puluy-an?

Diin ang Dios?

Sa pila ka bersikulo sa Biblia, “ang langit” ginsambit subong ang “malig-on nga puluy-an” sang Dios. (1 Hari 8:​39, 43, 49; 2 Cronica 6:​33, 39) Apang, isa ka kasaysayan sa Biblia ang nagalaragway sa kadakuon ni Jehova nga Dios sa masunod nga mga termino: “Matuod gid bala nga ang Dios magapuyo upod sa mga tawo sa duta? Yari karon! Sa langit, huo, sa langit sang mga langit, indi ka makaigo.”​​—⁠2 Cronica 6:⁠18.

“Ang Dios Espiritu,” siling sang Biblia. (Juan 4:24) Busa, nagapuyo sia sa isa ka espirituwal nga duog nga nahamulag sa pisikal nga uniberso. Kon ginapatuhuyan sang Biblia “ang langit” subong puluy-an sang Dios, ginapatuhuyan sini ang pagkahalangdon sang duog nga iya ginapuy-an bilang pagpatuhay sa pisikal nga palibot nga ginpuy-an naton. Sa pagkamatuod, sing labi ka importante, ang Biblia nagatudlo nga ang puluy-an sang Dios, maathag nga tuhay sangsa pisikal nga uniberso apang sa amo man nga tion isa gid ka espesipiko nga lokasyon.​​—⁠Job 2:​1-2.

Ang Dios Isa ka Persona

Si Jesus nagpamulong tuhoy sa puluy-an ni Jehova sang magsiling sia sa iya mga disipulo: “Sa balay sang akon Amay may madamong puluy-an. . . . Magalakat ako agod maghanda sing duog para sa inyo.” (Juan 14:2) Sa diin nagkadto si Jesus? Sang ulihi, sia “nagsulod . . . sa langit mismo, agod magpakita karon sa atubangan sang persona sang Dios para sa aton.” (Hebreo 9:24) Ini nga kasaysayan nagatudlo sa aton sing duha ka importante nga impormasyon tuhoy kay Jehova nga Dios. Una, may yara sia literal nga puluy-an, kag ikaduha, isa sia ka persona, indi lamang isa ka di-malaragway nga puersa nga nagapuyo bisan diin.

Amo kon ngaa gintudluan ni Jesus ang iya mga sumulunod nga mangamuyo sa sining paagi:  “Amay namon nga yara sa mga langit,” nga ginapatuhoy ang ila mga pangamuyo sa isa ka persona, si Jehova, nga yara sa isa ka duog, nga gintawag, espirituwal nga mga langit. (Mateo 6:⁠9; 12:50) Ini nga panudlo nagahisanto sa paagi kon paano gintudluan ang katawhan sang Dios sa pagpangamuyo sa kapin sa 1,500 ka tuig. Ang pinakadumaan nga mga sinulatan nga inspirado sang Dios nagaunod sining pangamuyo: “Magtamwa ka gikan sa imo balaan nga puluy-an, ang langit, kag pakamaayuha ang imo mga katawhan.”​​—⁠Deuteronomio 26:15.

Ang Balaan nga Espiritu sang Dios nga Nagalab-ot sa Tanan nga Tawo kag sa Tanan nga Duog

Bisan pa ang Biblia pirme nagapatuhoy sa Dios nga may espesipiko nga puluy-an, masunson ini nagahambal nga ang iya balaan nga espiritu yara bisan diin. “Sa diin bala ako makadto gikan sa imo espiritu, kag diin bala ako malagyo gikan sa imo atubangan?” pamangkot sang salmista nga si David. (Salmo 139:7) Ang iban naligban sa sini kag mahimo maghinakop nga ang Dios yara bisan diin. Apang, kon ginabinagbinag ang konteksto sini kag ang iban pa nga teksto, nangin maathag nga ang balaan nga espiritu ni Jehova​​—⁠ukon gahom nga nagapanghikot​​—⁠sarang makalab-ot gikan sa iya nahamtangan pakadto sa bisan diin nga duog sa materyal nga uniberso.

Kaangay sang kamot sang isa ka amay nga sarang mauntay agod malugpay kag masakdag ang iya mga kabataan, ang kamot ni Jehova​​—⁠ukon balaan nga espiritu​​—⁠sarang mauntay sa bisan diin nga bahin sang espirituwal nga duog ukon pisikal nga uniberso sa pagtuman sang katuyuan ni Jehova. Busa, ang salmista makasiling: “Kon kuhaon ko ang mga pakpak sang kaagahon, agod makapuyo sa pinakamalayo gid nga dagat, bisan pa didto tuytuyan ako sang imo kamot kag ang imo tuo nga kamot magakapot sa akon.”​​—⁠Salmo 139:​9, 10.

Mahimo Ka Mangin Abyan sang Dios

Mapainubuson kag mahigugmaon nga ginatugutan ni Jehova ang iya kaugalingon kag ang iya puluy-an nga malaragway sa tawhanon nga mga termino nga pinakamalapit gid nga kaanggid sa iya kahimtangan. Sa sini kag sa iban pa nga paagi, daw “nagaduko sia sa pagtan-aw sang kalangitan kag sang duta.” (Salmo 113:​6, Maayong Balita nga Biblia) Apang, sa pagkamatuod ang mga tawo indi gid makahangop sing bug-os sa kinaugali sang Dios.

Si Jehova tuman gid ka halangdon, tuman ka daku, kag tuman ka makatilingala agod ilaragway sing bug-os sa tawhanon nga mga termino. Amo nga bisan pa ang Kasulatan nagapamulong tuhoy sa iya langitnon nga puluy-an subong isa ka duog nga may espesipiko nga lokasyon, ang paghangop sining espirituwal nga dimensiyon sing bug-os imposible gid para sa mga tawo.​​—⁠Salmo 139:6.

Walay sapayan, may daku nga lugpay nga mahangpan sa makatarunganon nga kasangkaron ang matuod nga kinaugali ni Jehova, marealisar nga indi sia di-malaragway, di-persona nga puersa nga presente sa tanan nga butang sa uniberso. Sa baylo, sia isa ka indibiduwal, nga may espesipiko nga puluy-an kag may personalidad nga ginalaragway sang gugma kag pagkamapinalanggaon. Ini nga ihibalo nagabukas sa ganhaan padulong sa daku gid nga kahigayunan nga posible sa bisan sin-o nga tawo​​—⁠ang kahigayunan nga makatigayon sing tubtob buhi, personal nga pagpakig-abyan sa Labing Gamhanan nga Soberano sang bug-os nga uniberso.​​—⁠Santiago 4:8.