Natun-an Niya Ini sa Magmata!

SI Perla, nga otso anyos, yara sa ikaduha nga grado sa estado sang Mexico nga Veracruz. Isa ka adlaw, namangkot ang iya maestra kon sin-o ang nakahibalo sang kalabaon sang isa ka balyena. Sang primero wala sing nagsabat. Nagbayaw si Perla kag nagsiling: “Ang abuabuhon nga balyena nagalaba sing 14 metros kag nagabug-at sing 16 toneladas.”

Nakibot nga namangkot ang manunudlo, “Diin mo ini nahibaluan?”

“Sa magasin nga Magmata!,” sabat niya. “Kon tugutan mo, ipakita ko ini sa imo.” Pirme ginadala ni Perla ang bag-o nga mga gua sang Magmata! sa iya bag agod ipaambit sa iban. Natabuan nga may gua sang Septiembre 8, 2003, nga nagaunod sang artikulo nga “Makawiwili nga Pagkasumalang sa Abuabuhon nga mga Balyena.”

Nalipay ang maestra ni Perla nga makatigayon sing kopya sang magasin. Wala lamang niya ginbasa ini kundi iya pa ini gintipigan. Luyag man sang iban nga estudyante nga makatigayon sing kopya, gani siam sa ila ang ginhatagan ni Perla. Gindayaw gid si Perla sang iya maestra nga iya ginadalhan sang Magmata! kada duha ka semana.

Wala madugay nga natabo ini nga eksperiensia, nagtambong si Perla sa isa ka distrito nga kombension sang mga Saksi ni Jehova. Antes naghalin si Perla, ginsilingan sia sang iya maestra nga malipay sia kon makabaton sing isa ka regalo halin sa kombension. Gani gindalhan sia ni Perla sing libro nga Magtuon Gikan sa Daku nga Manunudlo, nga ginpagua sina nga tingadlaw.

Ginsilingan sang ulihi sang maestra ang pila niya ka estudyante, “Isa ka maayo nga halimbawa si Perla, kay indi lamang sia interesado sa iya mga tulun-an sa eskwelahan kundi nagatuon man sia sang iban pa nga mapuslanon nga impormasyon kag ginapaambit pa gani ini sa aton.”