“Ang mga Bilanggo Bala Mahimo Mabag-o?”

Amo sini ang pamangkot sa panghapin sang Mayo 8, 2001, nga gua sang “Magmata!” Madamo nga bumalasa ang nagpabutyag sing apresasyon sa sining mga serye sang mga artikulo nga may isa ka report tuhoy sa programa sang edukasyon sa Biblia sang mga Saksi ni Jehova sa pederal nga bilangguan sa Atlanta, Georgia, E.⁠U.⁠A. Ang masunod amo ang pila ka bahin gikan sa madamong sulat nga nabaton.

▪ “Sanglit nabilanggo na ako sing walo ka tuig, natalupangdan ko nga ang hilikuton sang pagtudlo sa Biblia sang mga Saksi ni Jehova sa mga bilangguan amo gid ang nagmadinalag-on. Samtang yara ako sa bilangguan sa Atlanta, nakapribilehiyo ako nga makapanghikot upod sa lima nga ginsambit sa inyo artikulo. Nagapasalamat gid ako bangod sang ila gugma kag suporta. Nagapasalamat man ako sa mga kauturan nga may amo sini nga mga kinaiya, nga nagapakita sing gugma sa amon nga mga nakahimo sing sayop apang nagatinguha nga tadlungon ini kag mangin mas maayo nga mga tawo.”​​—⁠R. J.

▪ “Yari ako subong sa bilangguan, kag ang mga kauturan gikan sa lokal nga Kingdom Hall naghimo sing kahimusan diri para sa isa ka makadalayaw nga programa sa pagtudlo. Subong resulta, ang kaupod ko nga bilanggo nabawtismuhan, kag ako, bisan pa ginsikway anay sa Cristianong kongregasyon, nakapanumbalik na karon. Madamong iban pa ang nagtuon sa Biblia. Makapalig-on gid nga mahibaluan nga bahin kita sang bug-os globo nga hilikuton sa pagpanudlo. Makalilipay gid nga alagaron si Jehova, bisan diin man kita!”​​—⁠J. M.

▪ “Sang 1970, nabilanggo ako bangod sa krimen nga wala ko mahimo. Ginsentensiahan ako sing 14 ka tuig. Samtang sa prisuhan, nagtuon ako sa Biblia upod sa mga Saksi ni Jehova. Nagdayaw gid ako sa ila pagkabunayag kag pag-ulikid. Pagkatapos nga ginhilway ako, nagpadayon ako sa pagtuon kag nabawtismuhan gilayon. Kon kaisa, nagabatyag ako gihapon sing kalugaw-an kag kaakig sa mga inhustisya nga gin-antos ko. Apang ginapahanumdom ko ang akon kaugalingon nga sa dili madugay, dulaon ni Jehova ang tanan nga inhustisya kag pag-antos. Sarang mabag-o ang mga bilanggo kon sundon lamang nila ang mga instruksion nga masapwan sa Biblia. Mapinasalamaton man sila bangod sa maukod nga mga panikasog sang aton mga kauturan agod buligan sila. Amo gid sini ang ginabatyag ko!”​​—⁠R. S.

▪ “Sang nabilanggo ako, nagapanigarilyo ako, nagadroga, nagapamuyayaw, kag wala sing pagtahod sa awtoridad. Katapo man ako sang isa ka gang. Dugang pa sa sini tanan, ginsikway ako gikan sa Cristianong kongregasyon. Nakapanumbalik na ako karon, kag nagauswag sing maayo. Salamat sa kamatuoran, nabatyagan ko nga hilway na ako karon!”​​—⁠I. G.