Ngaa Kinahanglan Ko Himuon ang Pisikal nga Trabaho?
Pamangkot sang mga Pamatan-on . . .
Ngaa Kinahanglan Ko Himuon ang Pisikal nga Trabaho?
“Indi ko gid mahunahuna nga makahimo ako sing pisikal nga trabaho. Mas nasadyahan ako magkompyuter.”—Nathan.
“Manubo ang pagtamod sang pila ka kabataan sa amon nga nagahimo sing pisikal nga trabaho, daw subong bala nga wala kami sing kaalam sa paghimo sing iban pa nga trabaho.”—Sarah.
PISIKAL NGA TRABAHO—ginatamod ini sang madamo nga makatalaka, mahigko, kag indi gid halandumon. Isa ka propesor sang ekonomiya ang nagsiling tuhoy sa pisikal kag de-mano nga mga trabaho: “Inang mga trabaho daw wala gid sang dungog sa sining mabinalak-on sa kadungganan nga kalibutan.” Indi makatilingala kon amo, nga madamo nga pamatan-on ang nahikay sa pisikal nga trabaho.
Apang, ang Biblia nagapalig-on sing tuhay nga pagtamod sa lakas nga pagpangabudlay. Si Hari Solomon nagsiling: “Wala na sing maayo pa sa tawo sangsa magkaon sia kag mag-inom kag magkalipay ang iya kalag sa kaayuhan sang iya kinabudlayan.” (Manugwali 2:24) Sa panahon sang Biblia, ang Israel isa ka katilingban nga panguma ang palangabuhian. Ang pag-arado, pagpangani, kag ang paglinas nagakinahanglan tanan sing lakas nga pagpangabudlay. Apang, ginsiling ni Solomon nga ang lakas nga pagpangabudlay makapaladya.
Mga siniglo sang ulihi, si apostol Pablo nagsiling: “Ang kawatan dili na magpangawat, kundi sa baylo magpangabudlay sia sing lakas, nga nagabuhat paagi sa iya mga kamot sing maayo nga buhat.” (Efeso 4:28) Si Pablo mismo anad sa lakas nga pagpangabudlay. Walay sapayan nga may mataas sia nga tinun-an, ginsakdag niya ang iya kaugalingon kon kaisa paagi sa paghimo sing mga tolda.—Binuhatan 18:1-3.
Paano mo ginatamod ang pisikal nga trabaho? Nahunahuna mo man ukon wala, mapuslanon ang pisikal nga trabaho sa madamo nga paagi.
Paghanas Para sa Pagpangabuhi
Ang paghimo sing pisikal nga trabaho—bisan ang pagpamukpok sing martilyo ukon ang pagpanghagbas
sa ugsaran—makapapagros. Ang kapuslanan sini labi pa sangsa paghupot sang imo maayo nga panglawas. Makahibalo ka bala magkay-o sang nagkupos nga ruweda ukon mag-ilis sing langis sang salakyan? Imo bala makay-o ang naguba nga bintana ukon ang nagsupon nga linya sang tubig? Makaluto ka bala? Makatinlo ka bala sing maayo sang kasilyas? Ini nga mga kalantip dapat matun-an sang mga pamatan-on nga lalaki kag babayi, mga kalantip nga makabulig sa imo nga mangin madinalag-on sa imo pagpangabuhi sa ulihi.Talalupangdon nga si Jesus mismo nangin lantip sa pila ka de-mano nga obra sang yari pa sia sa duta. Natun-an niya ang pagpamanday—walay duhaduha sa iya amay-amay nga si Jose—amo nga sang ulihi gintawag sia nga panday. (Mateo 13:55; Marcos 6:3) Makatuon ka man sang nanarisari nga mapuslanon nga kalantip paagi sa pagpangabudlay sa imo mga kamot.
Pagpauswag sang Maayo nga mga Kinaiya
Ang lakas nga pagpangabudlay may epekto man sa imo pagtamod sa imo kaugalingon. Nagasulat para sa U.S. National Mental Health and Education Center, si Dr. Fred Provenzano nagsiling nga ang pagtuon sing pisikal nga mga buluhaton sarang makadugang sang imo “pagbatyag sang pagsalig kag kompiansa sa imo kaugalingon ” kag “makapalambo man ini sing disiplina sa kaugalingon kag pagkaorganisado, nga mga sadsaran sang madinalag-on nga trabaho.” Ang pamatan-on nga si John nagsiling: “Ang pisikal nga trabaho nagabulig sa imo nga matun-an ang pagpailob. Matun-an mo kon paano lubaron ang mga problema.”
Si Sarah, nga ginkutlo kaina, nagpaathag: “Ang pisikal nga trabaho nagtudlo sa akon nga mangin mapisan. Natun-an ko nga mangin disiplinado sa mental kag sa pisikal.” Kinahanglan bala nga mangin makatalaka ang lakas nga pagpangabudlay? Si Nathan nagsiling: “Natun-an ko nga magkalipay sa pag-obra paagi sa akon mga kamot. Samtang nagalantip ako, nakit-an ko nga nagadugang man ang kalidad sang akon obra. Nagpadugang man ini sang akon pagtahod sa kaugalingon.”
Ang pisikal nga trabaho magatudlo man sa imo sa pagkalipay sa kon ano ang imo nahimuan. Ang isa ka pamatan-on nga si James nagsiling: “Nalingaw gid ako sa akon pagpamanday. Bisan pa makapalapyo ini kon kaisa, pirme ko mapamalandungan ang akon nahimo na kag magbatyag nga may nahimuan. Makaalayaw gid ini.” Amo man ang ginbatyag ni Brian. “Nalipay gid ako sa pagkay-o sa mga salakyan. Ang paghibalo nga masarangan ko ang pagkay-o sang pila ka guba kag himuon ini nga daw bag-o nagapabatyag sa akon sang pagsalig kag kaayawan.”
Sagrado nga Pag-alagad
Para sa mga pamatan-on nga Cristiano, ang ikasarang sa pagpangabudlay sing lakas sarang makabulig sa ila pag-alagad sa Dios. Sang ginhatagan si Hari Solomon sang tulumanon nga tukuron ang isa ka matahom nga templo para kay Jehova, iya nabinagbinag nga ini isa ka buluhaton nga nagakinahanglan sing lakas gid nga panikasog kag kalantip. Ang Biblia nagsiling: “Nagsugo si Hari Solomon kag ginpasugat si Hiram sa Tiro. Anak sia sang balo nga babayi gikan sa tribo ni Neptali, ang iya amay taga-Tiro, isa ka magbubuhat sang saway; kag puno sia sing kaalam kag paghangop kag ihibalo sa bisan ano nga buluhaton sa saway. Nagkadto sia kay Hari Solomon kag nagsugod sa pag-obra sang tanan niya nga hilikuton.”—1 Hari 7:13, 14.
Daw ano nga dungog ni Hiram nga magamit ang iya kalantip sa pagpasanyog sang pagsimba kay Jehova! Ginpadaku sang eksperiensia ni Hiram ang pagkamaminatud-on sang ginsiling sang Biblia sa Hulubaton 22:29: “Nakakita ka na bala sang tawo nga sampaton sa iya buluhaton? Magatindog sia sa atubangan sang mga hari; indi sia magatindog sa atubangan sang kinaandan nga mga tawo.”
Sa karon, bisan ang mga pamatan-on nga may diutay ukon wala sing kalantip sa pagpanukod nagapakigbahin sa pagpatindog sang mga Kingdom Hall. Bangod sang ila pagpakigbahin sa sini, nakatuon ang pila sang mapuslanon nga mga trabaho, kaangay sang pagpanakod sang linya sang koryente, tubero, pagpangantero, kag pamanday. Mahimo ka makapakigsugilanon sa inyo mga gulang tuhoy sa posibilidad nga ikaw man makapakigbahin sa pagtukod sang Kingdom Hall.
Si James, nga nakatrabaho na sa pila ka Kingdom Hall, nagsiling: “Madamo sa kongregasyon
ang wala sing panahon ukon ikasarang sa pagbulig. Gani paagi sa imo pagbulig, nagabulig ka sa bug-os nga kongregasyon.” Si Nathan, nga nakatuon mangantero, nakasapo nga ini nga ikasarang nagbukas sang isa pa kahigayunan sa pag-alagad sa Dios. Ginhinumdom niya: “Nakapa-Zimbabwe ako kag nagamit ko ang akon kalantip sa pagbulig sa pagtukod sang sanga talatapan sang mga Saksi ni Jehova didto. Nagtrabaho ako didto sa sulod sang tatlo ka bulan, kag isa yadto ka eksperiensia nga indi ko gid malipatan sa akon kabuhi.” Para sa iban nga mga pamatan-on, ang ila handum sa pagpangabudlay sing lakas nagpahulag sa ila nga mag-aplay sa pag-alagad subong mga boluntaryo sa sanga talatapan sang mga Saksi ni Jehova sa ila lugar.Ang kalantip sa pisikal nga pagpangabudlay magapabatyag man sa imo sang “pagkanaayawan sa kaugalingon.” (1 Timoteo 6:6) Madamo nga mga pamatan-on sa tunga sang mga Saksi ni Jehova ang nag-alagad subong mga payunir, ukon bug-os tion nga mga manugbantala. Ang pagtuon sang isa ka obra nakabulig sa pila nga masakdag ang ila kaugalingon sa pinansial nga wala nagahugod sang madamo nga tion kag kuarta sa sekular nga pag-eskwela.
Kon Paano Makatuon
Sing maathag, interesado ka man sa pagpangita sang palangabuhian subong isa ka trabahador ukon para lang mapuslan sa sulod sang balay, makabenepisyo ka sa pagtuon sang pisikal nga trabaho. Mahimo nga ang eskwelahan sa inyo lugar nagatanyag sing pila ka kurso sa pila ka obra. Mahimo man nga mahanas ka sa inyo puluy-an mismo. Paano? Paagi sa pagtuon sa paghimo sing mga buluhaton sa sulod sang balay. Sulat ni Dr. Provenzano, nga ginkutlo kaina: “Ang mga hilikuton labi na nga importante para sa mga tin-edyer bangod nagatudlo ini sang sadsaran nga ‘ikasarang agod makalampuwas’ nga makabulig sa mga tin-edyer nga mangin madinalag-on kag sangkol sa pagkabuhi malayo sa ila mga ginikanan kon mag-abot na ang tion.” Gani dapat mangin alisto kon ano ang hilikuton sa sulod sang balay. May ugsaran bala nga nagakinahanglan hagbasan ukon may bulutangan bala nga nagakinahanglan nga kay-uhon?
Sa baylo nga makapanubo, makabenepisyo ka sa madamo nga paagi sa pisikal nga pagpangabudlay. Indi pag-likawi ang pisikal nga pagpangabudlay! Sa baylo, magtinguha nga “makakita sing kaayuhan” sa imo lakas nga pagpangabudlay, kay subong sang ginsiling sa Manugwali 3:13, “dulot ini sang Dios.”
[Blurb sa pahina 29]
Ang pagtuon sang isa ka obra nagbulig sa madamo nga pamatan-on nga mapasangkad ang ila pag-alagad sa Dios
[Mga Retrato sa pahina 30]
Sa masami ang imo mga ginikanan makatudlo sa imo sing sadsaran nga mga kalantip