Ano ang Nagagua Karon?

ANO ang luyag mo himuon kon tig-ilinit na? Mahimo maganyat ka nga maggua ­bangod mainit ang tiempo—ayhan agod maligo sa baybay ukon mamasyar sa parke.

Apang, para sa industriya sang pelikula, ginahunahuna nila ang minilyon ka tawo nga makadto sa sinehan. Sa Estados Unidos lamang, may yara sa di-magkubos 35,000 ka sinehan, kag sang nagligad nga mga tinuig mga 40 porsiento sang kinitaan sa nagklik ukon box office nga mga pelikula sa sina nga pungsod ang natigayon sa tion sang tig-ilinit. * “Daw pareho ini sa tion sang Krismas,” siling ni ­Heidi ­Parker sang Movieline nga magasin.

Indi amo sini anay. Diutay lang anay kon tig-ilinit ang nagatan-aw sing sine sa Estados Unidos, amo kon ngaa napilitan ang madamo nga sinehan nga limitehan ang ila oras sang pagpasalida ukon magsira anay. Apang sang tungatunga sang katuigan 1970, ang erkon nga mga sinehan nagganyat sa minilyon agod malikawan ang mainit nga tiempo. Wala man sing klase ang mga kabataan, gani nangin isa ini ka potensial nga wala makalampas sa igtalupangod sang mga nagahimo sing pelikula. Wala magdugay, nagtuhaw ang ­blockbuster nga mga pelikula kon tig-ilinit. * Ginbag-o sini kon paano ginahimo kag ginabaligya ang mga pelikula, nga maathagan pa naton.

[Mga nota]