Bag-o nga Puluy-an Para sa Isa ka Nasamad nga Maya
Bag-o nga Puluy-an Para sa Isa ka Nasamad nga Maya
“WALA na gid bala kita sing iban nga ulubrahon?” Amo ini ang akon una nga reaksion sang gindala sang akon asawa sa amon balay ang isa ka gamay nga maya nga nahulog gikan sa iya pugad. Hinali ako nga nagbatyag sing kaluoy sang mahimutaran ko ang nagapalangurog nga pispis. Nagpalibog ako kon mabuhi pa ining maluya na nga pispis. *
Sang primero, ginatingal pa namon ang amon bisita sing mahumok nga pagkaon. Apang, pagkadason nga adlaw, pirme na ini nagapangayo sing pagkaon. Ang iya pagsiyak bation tubtob sa hagdan, lapos sa doble nga ganhaan sang amon apartment!
Bal-anon sa bulbol sang amon maya nga bayi ini. Sang ulihi, nagbaskog na ini kag makalupad na. Apang wala namon ini mapabalik sa iya kinaugali nga puluy-an! ‘Ayhan nahadlok lang ini nga maghalin sa amon balay,’ amo ang ginhunahuna namon. Gani ginbaklan namon ang amon maya sing hawla kag ginhuptan ini. Gintawag namon ini nga “Spatzi,” isa ka mainanggaon nga tinaga sa Aleman nga nagakahulugan “maya.”
Isa ka adlaw nagtig-ang kami sing bugas, nga daw isa sa paborito nga mga kalan-on ni Spatzi. Bangod mainit pa ini, ginpahigad ini sang akon asawa kag ginbuburan anay si Spatzi sing pila ka liso. Ano ang ginhimo sang amon gamay nga pispis? Daw nagduko sia kag paagi sa iya tuktok ginduso niya ang mga liso sa ibabaw sang lamesa amo nga nahulog ini! Sa kakibot, nagtulukay kami sang akon asawa kag nagkadlaw. Sa gilayon, ginbutang namon ang diutay lang nga nagbugnaw na nga kan-on sa atubang ni Spatzi, nga daw nakontento gid sa sini!
Ang pag-atipan sa sining makalilipay nga gamay nga pispis nagapahanumdom sa amon sang ginsiling ni Jesus sa iya mga disipulo: “Wala bala ginabaligya ang duha ka maya sa isa ka sensilyo nga diutay sing balor? Apang wala sing isa sa ila nga mahulog sa duta nga indi mahibaluan sang inyo Amay.” Nian nagsiling si Jesus sa ila: “Dili kamo mahadlok: mahal pa kamo sa madamo nga maya.”—Mateo 10:29-31.
Makapalugpay gid ang mahibaluan nga makita ni Jehova ang aton mga kalisdanan kag ginadumdom niya ang aton pagbatas. (Isaias 63:9; Hebreo 6:10) Huo, ang kaawa nga nabatyagan namon sa isa ka gamay nga pispis diutay lamang kon ipaanggid sa gugma nga ginapakita ni Jehova nga Dios para sa mga nagaalagad sa iya!—Gin-amot.
[Nota]
^ par. 2 Sa pila ka kaso ang pag-atipan sa nagamasakit ukon nasamad nga pispis mahimo nga mangin peligruso sa ikaayong lawas ukon mahimo nga mangin paglalis sa lokal nga mga ordinansa.
