Mga Pamatan-on nga Nagapangita sing mga Sabat

Sang ginhiwat sa Toronto, Canada, sang 2002, ang ika-17 nga Catholic World Youth Day, ginatos ka libo ka tawo ang nag-abot gikan sa bug-os nga kalibutan. Bisan pa wala nagapakigbahin sa sini ang mga Saksi ni Jehova, ginapaabot na nila ang hinali nga pag-abot sang madamo nga pamatan-on sa siudad. Paano nila ini ginhandaan? May panimuot kaangay sang unang siglo nga mga Cristiano, ginhimuslan nila ang kahigayunan nga makigsugilanon sa ila tuhoy sa Kasulatan.​—Binuhatan 16:12, 13.

Gindayaw sang mga Saksi ining mga pamatan-on bangod sang ila interes sa espirituwal nga mga butang. Nagresulta ini sa madamong mainabyanon nga paghambalanay tuhoy sa Kasulatan. Sang ginpamangkot sang isa ka Saksi ang isa ka babayi kon natuman ang iya mga ginapaabot sa World Youth Day, sia nagsabat: “Bueno, tubtob karon may musika kag pagsinaot, apang wala sing nakapalig-on sang akon pagtuo.”

Nian gintanyagan sang Saksi ang babayi sing brosyur nga ginatig-uluhan Isa ka Libro Para sa Tanan nga Tawo, nga nagapaathag nga ginasabat sini ang madamo nga pamangkot sang mga tawo tuhoy sa Biblia, subong sang, “Amo gid bala ini ang Pulong sang Dios?” kag “Paano naton mahibaluan nga wala ini nagbag-o sugod sang orihinal ini nga ginsulat?”

Ang babayi nagsabat: “Amo ini ang mga pamangkot nga ginapalibugan ko karon. Kinahanglan nga masabat ang akon mga pamangkot. Luyag ko basahon ini gilayon. Mahimo nga amo ini ang labing importante nga butang nga matigayon ko sa sining paglakbay.”

Isa lamang ini sa madamong pagpakighambal sang mga Saksi sa mga delegado sang Catholic World Youth Day. Kon luyag mo mabaton ang 32 ka pahina nga brosyur nga Isa ka Libro Para sa Tanan nga Tawo, sulati lamang ang kaupod nga kupon kag ipadala sa direksion nga makita sa kupon ukon sa nagakaigo nga direksion nga nalista sa pahina 5 sining magasin.

□ Interesado ako nga makabaton sang kopya sing brosyur nga Isa ka Libro Para sa Tanan nga Tawo.

□ Palihug kontaka ako tuhoy sa walay bayad nga pagtuon sa Biblia sa puluy-an.