‘Dapat Mo Ini Ipabugal’

NAHIBALUAN sang matuod nga mga alagad sang Dios ang importansia sang pagkabunayag. Ang gugma sa ila Manunuga amo ang nagpahulag sa ila nga mangin bunayag. Binagbinaga, halimbawa, ang eksperiensia ni Lázaro. Kasan-o lang, sang empleyado pa sia sa isa ka hotel sa Huatulco, sa Mexico, nakakita sia sing 70 dolyares nga nawigit sa lobby. Ginhatag niya gilayon ang kuarta sa manedyer nga nagatrabaho sa amo nga tion. Pagligad sang pila ka tion nakakita naman sia sing kahita sa kasilyas. Ginhatag niya ini sa reception desk, kag nakibot apang nalipay ang tawo nga nadulaan sini.

Nahibaluan sang manedyer-heneral ini nga mga buhat, kag ginpamangkot niya si Lázaro kon ano ang nagpahulag sa iya nga iuli ang kuarta kag ang kahita. Nagsabat si Lázaro nga tungod sa moral nga mga prinsipio nga natun-an niya sa Biblia, wala niya ginakuha ang mga butang nga indi iya. Sa isa ka sulat bilang apresasyon, ginsilingan sang manedyer si Lázaro: “Mabudlay makakita sing mga tawo karon nga nagasunod sang mataas nga mga prinsipio sa moral. Ginadayaw namon ang imo panimuot. Ginapakita mo nga isa ikaw ka maayo nga tawo, isa ka halimbawa sa imo mga katrabaho. Dapat ipabugal ninyo ini sang imo pamilya.” Ginpadunggan si Lázaro bilang maayo gid nga empleyado sa amo nga bulan.

Ang iban nga mga katrabaho ni Lázaro naghunahuna nga nagsayop sia sang gin-uli niya ang mga butang nga iya nakita. Apang sang nakita nila ang reaksion sang ila amo, ginpanginbulahan nila si Lázaro tungod sang iya pagsunod sa moral nga mga prinsipio.

Ang Biblia nagalaygay sa matutom nga mga sumulunod ni Jesus nga ‘magbuhat sing maayo sa tanan’ kag “maggawi sing bunayag sa tanan nga butang.” (Galacia 6:10; Hebreo 13:18) Wala sing duhaduha, ang pagkabunayag subong mga Cristiano nagahatag sing himaya sa “matarong kag matadlong” nga Dios sa Biblia, si Jehova.​—⁠Deuteronomio 32:4.