Malapit Na​—⁠Ang katapusan sang Tanan nga Kalamidad

“Mga anak kag mga apo. Pamatii ninyo! . . . Sa indi madugay magadabdab ini nga bukid. Apang antes sini may matabo anay nga mga dinaguldol kag mga dinaguhob kag mga linog. Ang mga aso kag mga kalayo kag mga kirab magatimbuok, ang hangin magasagitsit kag magahagunos kag magapanihol. Palagyo kamo sa masarangan ninyo . . . Kon pabungulan ninyo ini, kon mas importante pa sa inyo ang inyo mga pagkabutang, silutan sini ang inyo pagpatumbaya kag kakagod. Indi pag-ulikdi ang inyo dabukan kag balay, kundi malagyo kamo gilayon.”

INA nga paandam, gikan sa libro nga Earth Shock, ni Andrew Robinson, gintigib sa isa ka handumanan nga tapitapi sa Portici​—⁠isa ka banwa sa tiilan sang Mount Vesuvius sa Italya​—⁠sa tapos maglupok ang bulkan sang 1631. Kapin sa 4,000 ka tawo ang napatay sa sini nga paglupok. “Sa isa ka wala ginapaabot nga hitabo,” siling ni Robinson, “ini nga paglupok sang 1631 . . . amo ang nagpabantog sa Vesuvius.” Ngaa? Ang pagtukod liwat sa Portici nagdul-ong sa pagkadiskobre sa Herculaneum kag Pompeii. Ining duha ka siudad nalubong sang maglupok ang Vesuvius sang 79 C.⁠E.

 Si Pliny the Younger, isa ka Romano nga nakalampuwas sa sadto nga kalamidad kag sang ulihi nangin isa ka gobernador, nagsulat tuhoy sa di-kinaandan nga mga pagtay-ug antes sang paglupok. Sila sang iya iloy kag ang iban pa nagpalayo sa bulkan kag naluwas.

Isa ka Nagapaandam nga Tanda sa Aton Tion

Malapit na kita karon sa katapusan sang ekonomiko, sosyal, kag politikal nga mga sistema sang kalibutan. Paano naton nahibaluan ina? Bangod gintagna ni Jesucristo ang mga hitabo sa kalibutan nga magapatimaan nga malapit na ang adlaw sang pagpanukot sang Dios. Kaangay sang bulkan nga nagadaguldol, nagaaso, kag nagabuga sing mga cinder, inang kabilugan nga tanda nagalakip sang dalagku nga mga inaway, mga linog, mga tiggulutom, kag mga peste​—⁠ini tanan naghalit sa kalibutan sa walay tupong nga kadakuon halin sang tuig 1914.⁠—⁠Mateo 24:3-8; Lucas 21:​10, 11; Bugna 6:1-8.

Apang may mensahe man sang paglaum ang nagapaandam nga tanda nga ginhatag ni Jesus. “Ining maayong balita sang ginharian,” siling niya, “ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Mateo 24:14) Talupangda nga gintawag ni Jesus ang mensahe sang Ginharian nga “maayong balita.” Maayo gid nga balita ini bangod dulaon sang Ginharian sang Dios, ang langitnon nga panguluhan nga ginadumalahan ni Cristo Jesus, ang tanan nga halit nga nahimo sang mga tawo. Dugang pa, madula man ang natural nga mga kalamidad.​—⁠Lucas 4:43; Bugna 21:​3, 4.

Sa pagkamatuod, sang si Jesus isa ka tawo sa duta, ginpasundayag niya ang iya gahom sa paniempo paagi sa pagpakalma sa makatalagam nga unos. Sa katingala, ang iya hinadlukan nga mga disipulo nagsiling: “Sin-o gid bala ini, kay ginamanduan niya bisan ang mga hangin kag ang tubig, kag nagatuman sila sa iya?” (Lucas 8:22-25) Sa karon, si Jesus indi na isa ka tawo lamang, kundi isa ka gamhanan nga espiritu. Busa, indi mangin problema sa iya ang pagkontrol sa natural nga mga elemento agod nga indi na ini manghalit sa iya mga sakop!​—⁠Salmo 2:6-9; Bugna 11:15.

Mahimo tamdon ini tanan sang iban subong dalamguhanon lamang. Apang dumduma nga ang tagna sang Biblia​—⁠indi kaangay sang mga panaad kag mga prediksion sang tawo​—⁠natuman tanan, lakip ang mga tagna nga nakita naton nga natuman halin sang 1914. (Isaias 46:10; 55:​10, 11) Huo, garantisado ang mahidaiton nga palaabuton sang duta. Amo man ang aton palaabuton kon batunon naton ang Pulong sang Dios kag pamatian ang mahigugmaon nga paandam sini tuhoy sa magatay-ug sang kalibutan nga mga hitabo nga malapit na matabo.​—⁠Mateo 24:​42, 44; Juan 17:3.

[Kahon/Retrato sa pahina 11]

ANO ANG PAGLAUM SANG ATON NAPATAY NGA MGA HINIGUGMA?

KON mamatyan kita sing hinigugma, mahimo nga daw indi naton maagwanta ang kalisod. Ang Biblia nagasugid sa aton nga naghibi si Jesus sang mapatay ang iya pinalangga nga abyan nga si Lazaro. Apang, pagligad lamang sang pila ka minuto ginhimo ni Jesus ang isa ka makatilingala nga milagro​—⁠ginbanhaw niya si Lazaro! (Juan 11:32-44) Sa paghimo sini, naghatag sia sa tanan nga katawhan sing malig-on nga basihan nga tuuhan ang dalayawon nga saad nga ginsambit niya anay sa tion sang iya ministeryo sang magsiling sia: “Ang oras magaabot nga ang tanan nga yara sa handumanan nga mga lulubngan makabati sang iya [ni Jesus] tingog kag magagua.” (Juan 5:​28, 29) Kabay nga ang hamili nga paglaum sa pagkabanhaw sa isa ka paraiso nga duta magalugpay sa tanan nga namatyan sing hinigugma.​—⁠Binuhatan 24:15.

[Mga retrato sa pahina 10]

Ginatalupangod mo bala ang paandam nga ang kalibutan karon yara sa katapusan nga mga adlaw sini?

[Picture Credit Line sa pahina 10]

USGS, David A. Johnston, Cascades Volcano Observatory