Ang Pagtamod sang Biblia

Masugid Bala sang Astrolohiya ang Imo Palaabuton?

PAANO mo mapauswag ang imo kabuhi kag magmadinalag-on sa paghigugma kag magmanggaranon? Madamo nga tawo ang nagadangop sa astrolohiya para sa sabat. Kada adlaw minilyon ang nagabasa sing horoscope sa pamantalaan sa pagpaabot nga mapauswag ang ila palaabuton. Bisan ang mga lider sa kalibutan kilala sa pagpagiya sa mga bituon sa ila mga desisyon.

Masaligan bala ang astrolohiya? Paano nagahimo sing mga prediksion ang mga astrologo? Dapat bala tugutan sang mga Cristiano ang mga bituon kag mga planeta nga amo ang magpat-od kon paano sila magkabuhi?

Ano ang Astrolohiya?

Suno sa The World Book Encyclopedia, ang astrolohiya “napasad sa pagpati nga ang mga bituon kag mga planeta may mga pormasyon nga nagasugid sang kinaiya kag palaabuton sang isa ka tawo.” Nagapangangkon ang mga astrologo nga ang sibu nga posisyon sang mga planeta kag sang mga zodiac sign sa tion sang pagkabun-ag sang isa makaimpluwensia sa iya dalanon sang pagkabuhi.⁠ * Ang posisyon sining mga bituon kag mga planeta sa bisan anong espesipiko nga tion ginatawag nga horoscope.

Madugay na ang pagpati sa astrolohiya. Mga apat ka libo ka tuig na ang nagligad, ginsugdan nga pakton sang mga Babilonianhon ang palaabuton suno sa posisyon sang adlaw, bulan, kag lima ka kitaon nga mga planeta. Suno sa ila, ining mga butang sa langit may yara puersa nga makaimpluwensia sa batasan sang mga tawo. Sang ulihi ginlakip nila ang mga zodiac sign sa ila mga prediksion.

Kasaysayan sang Kapaslawan

Ginapatalupangod sang Biblia ang kaangtanan sang Babilonia kag sang astrolohiya, kag pila ka beses nga ginasambit sini ang mga astrologo sang Babilonia. (Daniel 4:⁠7; 5:​7, 11) Sang mga adlaw ni manalagna Daniel, tuman gid ka lapnag ang astrolohiya sa Caldea (Babilonia) nga ang termino nga mga “Caldeanhon” nagapatuhoy man sa mga astrologo.

Nakita ni Daniel indi lamang ang impluwensia sang astrolohiya sa Babilonia kundi ang kapaslawan man sang mga astrologo sini nga pakton ang pagkapukan  sang siudad. (Daniel 2:27) Talupangda ang sibu nga gintagna ni manalagna Isaias duha ka siglo sa wala pa. “Ipaatubang ang inyo mga astrologo kag luwason kamo​—⁠ang mga tawo nga nagatuon sang mga bituon, nga nagamapa sang mga sona sang langit kag nagasugid sa inyo kada bulan kon ano ang mahanabo sa inyo,” mayagutaon nga sulat ni Isaias. “Indi gani nila maluwas ang ila kaugalingon.”​—⁠Isaias 47:​13, 14, Today’s English Version.

Maathag nga wala sing ikasarang ang mga astrologo sang Babilonia nga hibaluon ang pagkapukan sang ila siudad bisan sing pila ka oras na lang sing abanse. Kag sang ginpahayag sang Dios ang iya paghukom sa dingding sang palasyo ni Hari Belsasar, indi mapatpat sang mga astrologo ang makatalanhaga nga sinulatan.​—⁠Daniel 5:​7, 8.

Indi man mapaktan karon sang mga astrologo ang importante nga mga hitabo. Pagkatapos mausisa ang kapin sa 3,000 ka prediksion sang mga astrologo, ang sientipiko nga mga imbestigador nga sanday R. Culver kag Philip Ianna nakahinakop nga 10 porsiento lamang sini ang sibu. Labi pa sini ang mahimo sang bisan sin-o nga maayo nga analista.

Nagasumpakil sa mga Panudlo sang Biblia

Apang, wala ginsikway sang Hebreong mga manalagna ang astrolohiya bangod lamang sang kapaslawan sini nga mapakot sing sibu ang palaabuton. Ang Kasuguan nga ginhatag sang Dios kay Moises espesipiko nga nagpaandam sa mga Israelinhon batok sa pagpangita sing mga tanda. “Indi dapat masapwan sa imo . . . ang bisan sin-o nga nagagamit sing pagpamakot . . . ukon ang bisan sin-o nga nagapangita sing tanda,” siling sang Kasuguan. “Ang tanan nga nagahimo sining mga butang kalangil-aran kay Jehova.”​—⁠Deuteronomio 18:​10, 12.

Bisan pa wala ginsambit ang astrolohiya sa sini nga teksto, maathag nga nalakip ini nga buhat sa ginadumilian. Ang Encyclopædia Britannica nagasiling nga ang astrolohiya isa ka “sahi sang pagpamakot nga nagapakot sang mga hitabo sa duta kag sa tawo paagi sa pagpanilag kag pag-interpretar sa mga bituon, Adlaw, Bulan, kag mga planeta.” Ang tanan nga porma sang pagpamakot​—⁠napasad man sa mga bituon ukon sa iban nga mga butang​—⁠nagalapas sa mga giya sang Dios. Ngaa? May nagakaigo nga rason.

Sa baylo nga ipahanungod ang aton mga kadalag-an ukon mga kapaslawan sa mga bituon, ang Biblia maathag nga nagsiling nga “bisan ano man ang ginasab-ug sang tawo, ini man ang iya anihon.” (Galacia 6:7) Bangod may kahilwayan kita sa pagbuot, naghimo ang Dios sing kondisyon nga manabat ang tagsatagsa sa aton sa kon ano ang himuon naton. (Deuteronomio 30:​19, 20; Roma 14:12) Matuod, mahimo kita maaksidente ukon magbalatian bangod sa mga hitabo nga indi naton kontrolado. Apang, ginapaathag sang Kasulatan nga ining mga kalamidad nagakahanabo bangod sa “tion kag wala ginapaabot nga hitabo,” indi sang aton horoscope.​—⁠Manugwali 9:11.

Kon tuhoy sa tawhanon nga mga kaangtanan, ginapalig-on kita sang Biblia nga panaptan naton ang aton kaugalingon sing mga kinaiya subong sang kaawa, kaayo, mapainubuson nga panghunahuna, kalulo, pagkamainantuson, kag gugma. (Colosas 3:12-14) Ini nga mga kinaiya makabulig agod matipigan ang pag-inabyanay kag mapabakod ang pag-asawahay. Ang “astrolohiko nga pagkabagay” indi masaligan nga giya sa pagpili sing isa ka tiayon. Gin-analisar sang sikologo nga si Bernard Silverman ang horoscope sang mga 3,500 ka mag-asawa, nga 17 porsiento sini nagdiborsio. Napamatud-an niya nga indi mas manubo ang kadamuon sang diborsio sa tunga sang mga mag-asawa nga may “astrolohiko nga pagkabagay.”

Maathag nga ang astrolohiya indi gid masaligan kag makapatalang. Mahimo nga bangod sini, basulon naton ang mga bituon sa baylo nga ang aton kaugalingon kon magsayop kita. Labaw sa tanan, maathag gid nga ginapakamalaut ini sang Pulong sang Dios.

[Nota]