Napaandaman Bangod sang Pagbasa sing Magmata!

GINAAPRESYAR sang regular nga bumalasa sang Magmata! ang kabilihanan sang mga artikulo sini. Apang para sa isa ka Aleman nga mag-asawa nga nagbakasyon sa Khao, Lak, Thailand sang nagligad nga Disiembre, ang artikulo nga natig-uluhan “Killer Waves​​—⁠Myths and Realities,” sa Ingles nga gua sang Pebrero 8, 2001, may tumalagsahon gid nga kabilihanan.

Ang Aleman nga pamantalaan nga Frankenpost (Selber Tagblatt) nagreport sang eksperiensia sang mag-asawa: “ ‘Madugay kami nga nagpaligo,’ hinumdom ni Roswitha Gesell. Pagkatapos makapaligo sa dagat, ang mag-asawa nga Gesell nagbalik sa ila hotel agod mag-ilis. Ginlaragway ni Reiner Gesell ang makakulugmat nga talan-awon nga nakita nila sa ila pagbalik: “Sang nagbalik kami sa baybay pagligad sang napulo ka minuto, ang dagat naalimunaw.” Ang lamang nga makita sa mga kabatuhan, nga mga pito ka kilometro [apat ka milya] ang kalayuon gikan sa baybayon, amo ang letso sang dagat. ‘Ang tanan nga nagapaligo pa sa dagat gindaldal palawod.’ Utang sang mag-asawa nga Gesell ang ila kabuhi sa isa ka artikulo sa Magmata! nga magasin.” Nabasa nila anay sa Magmata! nga ang di-kinaandan nga paghunas masami nga ginasundan sang mga tsunami.

“Sang nakita sang mag-asawa nga Gesell ang dalagku nga balod sa malayo, nagbalik sila kag nagdalagan. Nadumduman pa ni Reiner Gesell nga ang pader sang tubig daw mga 12 tubtob 15 metros [40 tubtob 50 pie] kataas. Ang isa sa iya labi gid ka makakulugmat nga nadumduman amo ang tuhoy sa iban nga mga turista sa baybay nga nagtindog kag nagtan-aw lang sa dagat sa daku nga katingala. ‘Wala sila maggiho. Nagsinggit ako nga magdalagan sila pakadto sa indi peligruso nga lugar, apang wala sila mamati.’ Halos wala sing nakalampuwas sa ila.”

Tuhoy sa mga Gesell, ang artikulo sang pamantalaan nagkomento man: “Subong mga Saksi ni Jehova, nakig-upod sila sa pinakamalapit nga kongregasyon, nga mga 140 kilometros [85 milyas] gikan sa Khao Lak, sa tion sang ila bakasyon. Sang mabalitaan sang ila mga masigkatumuluo ang natabo, ang bug-os nga kongregasyon nagkadto sa Khao Lak sa pagpangita sa ila.”

Nakapauli na sila karon sa Alemanya kag nagapasalamat gid ining mag-asawa sa mapuslanon nga impormasyon sa Magmata! Kag nagapasalamat gid sila sa mga taga-Thailand nga nagbulig sa ila, ilabi na sa ila espirituwal nga mga kauturan, nga nagpakita sing matuod nga Cristianong gugma!