Pagbantay sa Kalibutan

Sayop nga Pagpati sa Pagtubo sang Buhok

“Ang pag-utod ukon pagkiskis sang imo buhok indi makaapektar sa pagtubo, texture ukon kadamulon sini,” siling sang artikulo sa The New York Times tuhoy sa maayong panglawas. Madugay na ginapatihan nga ang buhok nga gin-utdan ukon ginkiskisan nagatubo sing mas madasig kag mas madamol. Apang, ginpakita sang liwat-liwat nga pagtuon sugod sang katuigan 1920 nga “ang laba, texture kag kabahulon sang imo buhok epekto sang gene kag kadamuon sang hormone, indi sang kon daw ano kasunson ka nagapangiskis,” siling sang artikulo. Ngaa indi maduladula ang sayop nga pagpati? Ayhan bangod madamo nga tawo ang nagasugod sa pagkiskis sing buhok sang bata pa sila, sang wala pa malab-ot sang buhok ang bug-os nga ikasarang sini sa paglaba kag mas malus-aw pa ang duag sang buhok. Subong man, “ang buhok mas malagtom kag mas mabahol sa puno sini, gani daw mabahol tan-awon ang buhok kon ginautdan sing punta,” siling sang Times. “Ang nagatiskog nga tubo sang buhok pagkatapos sang pagkiskis mahimo nga mas madali matalupangdan sangsa pagtubo sang amo man kadamo sang malaba na nga buhok.”

Paglubad sang Problema sa mga Miting

Nakita sang madamo nga kompanya nga ang mga miting dapat palip-uton kag ikonsentrar lamang sa kinahanglanon nga mga butang kag ang di-kinahanglanon nga mga miting dapat na dulaon, report sang The New York Times. Gani agod malikawan ang pag-uyang sing tiempo sa mga miting, ang pila ka ehekutibo napilitan sa paggamit sing desperado nga mga tikang subong sang paggamit sing stopwatch, pito, kag indi komportable nga mga siya, subong man sang pagpatindog sa mga nagatambong sa baylo sang pagpapungko sa ila. Maathag nga wala nagaisahanon ang mga ehekutibo sa ila pagtamod. Sa isa ka surbe sa kapin sa 600 ka mamumugon, “ang tuman kalawig nga mga miting” amo ang numero uno sa listahan sang mga uyang-tiempo. Si Patti Hathaway, nga awtor sang isa ka libro nga nagahatag sing laygay sa paglubad sang mga problema sa trabaho, nagrekomendar nga usisaon anay sang mga ehekutibo ang katuyuan sang miting kag mamat-od kon bala kinahanglanon gid ini. Kon ang katuyuan sang ginabuko nga miting amo lamang ang paghatag sing impormasyon, nian ginapanugda nga i-e-mail na lang ini.

Palabuaran sing Tanom sa Idalom-Duta

“Ang mahun-og nga minahan isa ka maayo gid nga palabuaran sing kahoy. Una, may yara dalayon nga kahun-og kag kainit sang duta nga 25C [77 degrees Fahrenheit ] sa bug-os nga tuig,” siling sang Toronto Star nga pamantalaan. Sugod sang 1986, ang Inco Limited, nga isa ka minahan kag kompanya sang mga metal, mahipos nga nagapalakat sing palabuaran sing tanom sa idalom-duta. Sa 1,400 metros nga kadalumon sang ila Creighton nga minahan, nga nahamtang malapit sa Sudbury, Canada, ang palabuaran sing tanom nagapatubo sing 50,000 ka hunol kada panahon. Ang may timer nga tilipunan nga mga tangke nagabunyag sa mga hunol sing 2,000 litros nga abono kag tubig kada adlaw. Agod daw nasilakan sang adlaw, katluan ka 1,000-watt nga bombilya “ang ginapasiga sing 24 oras sa isa ka adlaw sa nahauna nga semana, nian ginapasiga sing 18 oras kag ginapatay sing 6 oras sa sulod sang tatlo ka semana kag nian ginapasiga sing 12 oras kag ginapatay sing 12 oras​​—⁠kaangay gid kon sa gua​​—⁠sa nabilin nga tion,” siling sang pamantalaan. Ang tion sa pagpatubo nagasugod sa talipuspusan sang Enero, kag sa talipuspusan sang Mayo ang mga hunol nga red pine kag jack pine handa na nga itanom sa sulod kag sa palibot nga propiedad sang minahan. Ang iban nga magagmay nga mga kahoy ginadonar man sa mga komunidad.