Ang Maayo nga Konsiensia Nagahimaya sa Dios

SUNO SA MANUNULAT SANG MAGMATA! SA UKRAINE

SAMTANG nagalakat pauli pagkatapos sang isa ka Cristianong miting ang pamilya Chibisov, nga mga Saksi ni Jehova sa Ukraine, nakakita sila sing isa ka kahita nga may mga papeles sa sulod, lakip ang lisensia sa pagmaneho, mga credit card, kag mga 350 euro ($500) nga kuarta. Ang bana lamang ang nagaobra sa sining pamilya nga may lima ka katapo. Mga $70 ang sueldo niya kada bulan. Gani ining kuarta daku gid kuntani nga bulig para sa ila. Ano ang ila ginhimo?

Ang iloy nag-asoy: “Nag-istoryahanay gilayon ang amon mga anak nga babayi kon paano mauli ang kahita sa tag-iya, nga suno sa lisensia isa gali ka babayi. Nalipay gid kami sang akon bana nga makita ang amon mga kabataan nga nagapasundayag sang ila nahanas sing maayo nga konsiensia paagi sa ila mga buhat. Sang masunod nga adlaw ginteleponohan ko ang babayi nga nadulaan sing kahita. Nagahibi sa kalipay, nagkadto sa amon balay si Olha kag ginsugiran kami nga sila sang iya bana may pila ka magamay nga mga balaligyaan sa amon banwa. Ang kuarta sa kahita inugsueldo gali sa ila mga empleyado sa sina nga bulan. Dugang pa, ang isa sa mga papeles nga yara sa kahita kinahanglanon gid katama para iya mga rekord sa negosyo.

“Namangkot si Olha kon diin namon nakita ang kahita. Ginsugiran namon sia kon diin namon ini nakita kag ginpaathag man namon nga naagyan namon ini sang nagapauli kami halin sa amon Cristianong miting. Sang gintanyagan sia namon sing pila ka literatura sa Biblia, matinahuron niya ini nga ginbaton.

“Mga pila ka semana sang ulihi, ang isa man ka Saksi nga utod sa amon kongregasyon nanugid sa amon nga samtang nagatanyag sia sing literatura sa Biblia sa isa ka nagalabay sa kalye, nagpaathag ang isa ka babayi nga sang una wala gid sia nagapamati sa mga Saksi ni Jehova. Apang karon, handa na sia indi lamang sa pagpamati kundi sa pagkuha man sang aton mga literatura. Ini bangod kay, siling niya, gin-uli sang mga Saksi ang kahita sang iya anak nga babayi.”

[Retrato sa pahina 15]

Ang pamilya Chibisov