“Ining Video Nagaluwas sing Kabuhi!”

SANG 1999, ang mga Saksi ni Jehova naghimo sing isa ka video nga para gid sa mga pamatan-on nga natig-uluhan Young People Ask—How Can I Make Real Friends? Sa karon, ginpagua na ini sa kapin sa 30 ka lenguahe. “May epekto gid sa amon tanan ining video!” sulat sang isa ka manugtatap sang kongregasyon sa Ukraine. “May pila nga lima na ka beses nga nagtan-aw sini, ang iban naman mga pito ka beses pa gani! Pagkatapos, madamo sang pamatan-on ang nalipay sa pag-istoryahanay sa ila mga nanamian sa sini. Madamo sa ila ang naghibi. Nabatyagan namon tanan ang gugma kag pag-ulikid ni Jehova sa mga pamatan-on. Mas nahangpan ko na karon kon ano ang mga ginakinahanglan sang mga pamatan-on, kag luyag ko nga mabuligan pa gid sila, kag mangin suod nga abyan nila.”

Ang mga pamatan-on sa bug-os nga kalibutan napahulag gid sini nga video. Halimbawa, ang 17-anyos nga si Leticia gikan sa Uruguay (laragway sa wala) nagsulat: “Napahulag gid ako, indi lamang bangod sang ginpresentar nga impormasyon kundi bangod nakita ko man ang pag-ulikid ni Jehova kag sang iya organisasyon sa mga pamatan-on. Wala sing tinaga nga makalaragway sang akon pagpasalamat sa sining mapuslanon gid nga video. Ang masiling ko lang, madamo gid nga salamat!”

Ang isa ka hamtong nga babayi nga Saksi sa Estados Unidos madamong beses na nga nakatan-aw sining video kag paagi sa sini nabuligan niya ang isa ka dalagita nga may doble-kara nga pagkabuhi. Sia nagsulat: “Nagapahubog si Annette kag indi maayo ang iya mga kaupdanan, kag nagadroga pa gani sia. * Apang, natandog gid sia sang video. Wala magdugay, ginbiyaan niya ang iya malain nga kaupdanan kag mga bisyo. Anom ka bulan sang ulihi nabawtismuhan sia. Sa pagkamatuod, ining video nagaluwas sing kabuhi!”

▪ Sang 2004, ang mga Saksi ni Jehova nagpagua naman liwat sing isa ka video para sa mga pamatan-on. May tig-ulo ini nga Young People Ask—What Will I Do With My Life? Ginalauman nga paagi sini nga video sa DVD, mapalig-on ang madamo nga pamatan-on nga unahon sa ila kabuhi ang pagsimba kay Jehova nga Dios.—Mateo 6:33.

[Nota]