Tapioca Crepe—Ang Paborito sang mga Taga-Brazil
Tapioca Crepe—Ang Paborito sang mga Taga-Brazil
Suno sa manunulat sang Magmata! sa Brazil
SA Brazil, ang tapioca amo ang nanuhaytuhay nga kalan-on halin sa balinghoy. Ang isa sini amo ang simple kag matapan nga tinapay. Ini nga tinapay daw mga pancake kag masami nga ginatawag nga tapioca crepe. Ginhimo ini halin sa tayubong sang balinghoy nga ginatawag nga polvilho doce ukon goma.
Pagkatapos lidgiron, kag pugaon, daw gatas ang duga sini. Palugdangon anay ini. Dayon ulaon ang duga, kag ibulad ang mapilitpilit nga linugdang.
Ang tapioca amo ang panguna nga pagkaon sang mga Indian. Sang ulihi, natuipan sang pangayaw nga mga Portuges nga ang tapioca maayo nga salili sa tinapay. Apang, nagligad pa ang pila ka tuig antes natalupangdan ini sang mahilig mag-uluimbento nga mga kusinero sa Brazil, nga namat-od nga himuon ini nga isa ka popular nga kalan-on sa ila restawran.
Agod pahamut-an ang mga pislian, ang mga kusinero naghimo sang ginpanamit pa gid nga crepe. Sa karon nangin makagalanyat pa gid ang mga pagkaon sa Brazil bangod sang pagkapopular sang tapioca crepe. Nangin bantog ang pila ka restawran bangod sini nga mga crepe.
Ngaa indi ini pagtilawan? Maganyat gid kag manamitan sini ang imo pamilya kag mga abyan.
[Kahon/Retrato sa pahina 24]
Paghimo Sing Tapioca Crepe
Mga panakot para makahimo sing walo ka crepe:
3 ka baso nga polvilho doce, 1 1⁄2 ka baso nga tubig, kag diutay nga asin.
Kon Paano Himuon: Sa isa ka yahong, tubigi kag asini ang polvilho doce, kag kutawa ini. Dugangdugangi sing tubig samtang ginamasa ini tubtob nga puede na mapatipulon kag wala na ini nagatapik sa imo kamot. Nian ibutang ini sa salaan kag pugaa. Karon handa na ini nga himuon nga crepe.
Inita ang gamay (20 sentimetros) nga kalaha sa tamatama lang nga siga. Ibutang ang ikawalo nga bahin sang misklada sa kalaha, kag tapana ini nga ginagamit ang likod sang kutsara. Lutua ini sing mga duha tubtob apat ka minuto, ukon hasta nga magkapot kag wala na nagapilit sa kalaha. Baliskara ini, kag lutua sing isa ka minuto. Amo man ang himua sa nabilin nga misklada. Tangkastangkasa ang naluto nga mga crepe.
Mapabag-o ang dagway sang tapioca crepe kon butangan ini sing lainlain nga mga pangpanamit. Para sa pamahaw, palhiti ini sing mantikilya kag butangi sing duha ka kutsara sang bag-o lang makagud nga lubi. Ukon butangi sing gatas nga kondensada ang mga crepe, butangi sing lubi, takupa ini, kag iserbe.
[Retrato sa pahina 24]
Balinghoy
[Retrato sa pahina 24]
Tapioca crepe nga may lubi kag may gatas nga kondensada