Ang Pagtamod sang Biblia

Indi Bala Dapat Magpatahom ang mga Babayi?

“ANG mga babayi mahuyugon sa moda,” siling ni George Simonton, isa ka beterano nga fashion designer kag propesor sa New York’s Fashion Institute of Technology. Sia nagsiling: “Luyag ipakita sang mga babayi ang ila pagkapinasahi kag pagkaismarte agod labi pa sila nga magtahom . . . Sa banta ko ang paghimo sini nagapakita nga ginatahod mo ang imo kaugalingon kag ang mga tawo nga ginapakig-updan mo.” Huo, ang pagpamuni madugay na nga ginabaton subong isa ka paagi agod mapakita sang mga kababayin-an ang ila pagkababayi, agod labi pa nga mapatahom ang ila hitsura, kag agod matigayon ang pagsalig sa kaugalingon.

Apang, bangod sa relihion, ang pila wala nagaugyon sa pagpamuni sang mga babayi. “Ang balaan nga mga babayi . . . kon . . . matahom na nga daan, . . . indi na kinahanglan nga magpatahom pa gid,” siling ni Tertullian sang ikatlo nga siglo C.⁠E. Tuhoy sa kosmetiko, sia nagpadayon: “Makasala ang mga babayi sa Dios kon mamutang sila sing cream sa ila nawong, papulahon nila ang ila pisngi, ukon kuritan ang ila kilay.” Kag nagsiling sia nga ang “mga puni” nga bulawan kag pilak ginlaragway subong “pangganyat.”

Madamo gihapon sa karon ang wala nagaugyon sa pagpamuni sang mga babayi. Wala gani ginatugot sang iban nga mga relihion nga maggamit ang mga katapo sini sing bisan ano nga alahas, koloreti, ukon maduagon nga panapton. Indi na bala kinahanglan nga magpatahom pa ang isa ka Cristianong babayi?

Ang Pagtamod sang Dios

Ang Biblia wala nagabinagbinag sing detalyado nahanungod sa paggamit sing alahas kag mga kosmetiko. Apang, madamo kita sing pamatuod nga wala ginapakamalaut sang Dios ang paggamit sini ukon ang iban pa nga sahi sang pagpamuni.

 Halimbawa, sang ginlaragway niya kon paano niya ginpakamaayo ang Jerusalem, ginpatuhuyan sang Dios ina nga pungsod subong nga daw isa ka babayi, nga nagasiling: “Ginpunihan ko ikaw sing mga puni . . . , kag nangin tuman gid ikaw katahom.” (Ezequiel 16:11-​13) Ining mga puni, bisan pa simbuliko, nagalakip sa mga pulseras, kulintas, kag aritos. Ginpaanggid sang Kasulatan ang mga puni nga bulawan sa isa ka “maalamon nga manugsabdong” nga ang mga pulong ginabaton sang luyag mamati. (Hulubaton 25:​1, 12) Rasonable ihinakop nga kon ang Kasulatan naghimo sining positibo nga pagpaanggid, ang Dios wala nagapamatok kon ang mga babayi maggamit sing mga puni sa pagpatahom sang ila kaugalingon.

Ginapunihan sang Cristianong mga Babayi ang Ila Kaugalingon

Ang pila ka teksto sa Biblia direkta nga nagahinambit tuhoy sa pagpamuni sang mga babayi. Si apostol Pablo nagsulat: “Luyag ko nga ang mga babayi magpamuni sing panapton nga nagakaigo.” Kon ginahimo ini nga may “kaugdang kag kaligdong,” mapakita sang babayi ang iya pagtahod sa Dios. (1 Timoteo 2:​9, 10) Kag kon ang Cristianong mga babayi maugdang, makapadungog ini sa mga panudlo sang Dios kag sa kongregasyon.

Ang pila ka tawo nagapangatarungan nga ini man nga teksto nagasiling nga ang pagpamuni indi dapat nga “may sinalapid nga buhok kag bulawan ukon mga perlas ukon malahalon nga mga panapton, kundi sa paagi nga nagakabagay sa mga babayi nga matinahaon sa Dios, kon sayuron, paagi sa maayong mga buhat.” Nagakahulugan bala ini nga ang mga babayi indi na dapat magkopyur sang ila buhok ukon magsuksok sing alahas?

Indi, kay ang Biblia nagahinambit sing positibo tuhoy sa pagpamuni. Gani sa baylo nga dumilian ang pila ka mga puni, ginapalig-on ni Pablo ang mga babayi nga hatagan sing importansia ang pagpamuni sang Cristianong mga kinaiya kag maayong mga buhat.

Importante ang Motibo

Si apostol Pablo nagsiling: “Indi na kita maghinukmanay, kundi magpamat-od kamo nga indi gid magbutang sing kasandaran ukon kasablagan sa dalanon sang isa ka utod.” (Roma 14:13) Paano ini maaplikar kon nagapili kita sing mga puni?

Una, ginsilingan kita ni Pablo nga indi “maghinukmanay.” Mag-andam kita sa ‘pagbutang sing kasandaran sa isa ka utod.’ Ang tagsa ka lugar kag kultura may lainlain nga talaksan sa kon ano ang kalahamut-an. Ang kalahamut-an sa isa ka tion kag duog mahimo nga indi nagakaigo sa iban nga tion kag duog. Indi naton dapat sandaron ukon saklawon ang iban paagi sa pagsuksok sing mga puni nga ginakabig sang aton kultura nga di-nagakaigo. Dapat pamangkuton sang diosnon nga mga babayi ang ila kaugalingon: Ano ang masiling sang mga tawo sa amon lugar sa akon ginasuksok? Nasaw-ahan bala, naligban, ukon nahuya ang mga kauturan sa kongregasyon sa akon ginasuksok? Bisan pa may kinamatarong ang isa ka Cristianong babayi sa pagbiste ukon pagpamustura sa paagi nga luyag niya, indi niya pag-iinsister ang iya kinamatarong kon makapasandad ini.​—⁠1 Corinto 10:​23, 24.

Ang paghatag sang tuman nga igtalupangod sa panagway sang isa mahimo magdul-ong sa di-maayo nga panimuot. Sa madamong kadutaan sa karon, makiaton nga nagapamuni ang mga babayi agod matalupangdan sila sa di-maugdang nga paagi. Apang ginalikawan gid sang Cristianong mga babayi ining sayop nga paagi sang pagpamuni kag ginatinguhaan nila nga mangin maligdong sing panghunahuna kag putli sa ila personal nga pagkabuhi, “agod ang pulong sang Dios indi mapasipalahan.”​​—⁠Tito 2:​4, 5.

Nahangpan sang diosnon nga mga babayi nga bisan pa magpamuni sila, ang ila matuod nga katahom yara sa “tinago nga pagkatawo sang tagipusuon” kag makita ini sa ila panimuot kag paggawi. (1 Pedro 3:​3, 4) Ang babayi nga nagapili sing maalamon sang iya estilo sang pamayo, paggamit sing koloreti, kag alahas, makatigayon sang pagtahod sang iban kag makapadungog sa iya Manunuga.