Rehabilitasyon sa mga Bilangguan sa Mexico

Suno sa manunulat sang Magmata! sa Mexico

ANG pagrehabilitar ukon pagbulig sa mga bilanggo nga magbag-o amo kon kaisa ang ginahatag nga rason kon ngaa ginabilanggo ang mga kriminal. Apang, ang isa indi mahimo magbag-o paagi sa pagbilanggo lamang sa iya. Ang pangpahulag nga magbag-o dapat maghalin mismo sa hunahuna kag tagipusuon sang isa ka tawo, ginasundan sang hanuot nga paghinulsol sa nahimo nga sala kag sang handum nga magpakabuot. Sa madamo nga bilangguan sa bug-os nga kalibutan, ang madinalag-on nga rehabilitasyon natigayon paagi sa pagtudlo sa Biblia nga ginahimo sang mga Saksi ni Jehova. Tan-awon naton ang ila programa sa ­Mexico.

Ang mga Saksi ni Jehova nagaduaw sa 150 ka bilangguan sa Mexico, kag nagatanyag sila sing isa ka programa sang pagbasa sa Biblia kag pagtudlo sing maayo nga pamatasan kag mga doktrina sa Biblia. Halimbawa, ang mga ministro sang mga Saksi ni Jehova regular nga nagabantala sa mga 1,200 ka bilanggo sa bilangguan sa Ciu­dad ­Juárez, ­Chihuahua. Ginatahod gid sila sang mga bilanggo kag ginaamligan pa gani gikan sa makatalagam nga mga kahimtangan. Isa ka bes, sang magkinagamo sa sina nga bilangguan, ginpauntat sang pila sa labing mabangis nga mga bilanggo ang nagkinagubot nga grupo agod makahalin ang mga Saksi nga indi mahalitan.

Ang Mayo 8, 2001, nga gua sang Magmata! nga may panghapin nga serye nga “Ang mga Bilanggo Bala Mahimo Magbag-o?” nagganyat sang igtalupangod sang mga bilanggo kag sang mga awtoridad sa bilangguan. Sa bilangguan sa San Luis Río Co­lo­ra­do, Sonora, 12 ka Saksi ang nakapanagtag sing 2,149 ka kopya sang mga magasin.

Kon may interesado gid sa Biblia, ang mga Saksi ni Jehova nagabalik kada semana sa pagtudlo sing Biblia kag sa pagdumala sing relihioso nga mga miting. Sa anong kasangkaron epektibo nga nabag-o sining programa nga pagtudlo sing Biblia ang kabuhi sang mga bilanggo?

Ang mga Bilanggo Nangin Cristiano nga mga Ministro

Si Jorge isa na ka kriminal antes pa sia mag-20 anyos. Pagkatapos sang 13-ka-tuig nga pagkabilanggo sa bilangguan sa Is­las Ma­rí­as, ginpagua sia. Apang, pagkatapos sini, naghimo sia liwat sing krimen paagi sa pagbaligya sing droga. Ginasuhulan sia sa pagpatay kag nakapatay sia sing 32 ka tawo. Sang nabilanggo liwat, ginsugiran sia sang iya mga abogado nga ang iya anay mga boss handa sa pagbayad sing daku nga kantidad agod makagua sia. Luyag sang iya mga boss nga makagua sia sa bilangguan bangod may ipapatay sila sa iya. Apang sini nga tion, si Jor­ge nagatuon na sing Biblia sa mga Saksi ni Jehova. Nag-uswag sia sa espirituwal tubtob nga nagpabawtismo sia kag nangin bug-os tion nga manugbantala, ukon payunir nga ministro, sa bilangguan. Batunon bala niya ang kahilwayan kag magtrabaho liwat para sa mga drug lord ukon magpabilin sa bilangguan kag mag-alagad kay Jehova? “Nagdesisyon ako nga magpabilin sa bilangguan kag bayaran ang sala nga ginhimo ko,” sabat ni Jor­ge. “Nagaalagad na ako karon kay Jehova nga Dios, ang Soberanong Ginuo.” Si Jor­ge nagpabilin nga matutom sa Dios kag napatay nga may paglaum nga pagkabanhaw. Siling sang iya espirituwal nga mga kaupdanan tuhoy sa  iya, “Iya ‘nahibaluan ang kamatuoran kag ang kamatuoran naghilway sa iya.’ ”​​—⁠Juan 8:32.

Si David, nga ginpamatbatan nga mabilanggo sing 110 ka tuig bangod sang sala nga homisidyo, pagkidnap, kag pagpangawat, yara sa guardiado nga seksion para sa makatalagam nga mga kriminal. Apang, bangod sang tumalagsahon nga mga pagbag-o sa iya paggawi kutob sang nagtuon sia sing Biblia sa mga Saksi ni Jehova, ginhatagan sia sing pinasahi nga permiso nga makatambong nga may upod nga guardia sa miting sa gua sini nga seksion. Napahisanto niya ang iya kabuhi sa mga ginapatuman sang Biblia, gani nagapakigbahin sia karon sa pagbantala nga hilikuton kag nagadumala sing walo ka pagtuon sa Biblia upod sa iban pa nga mga bilanggo sa ila seksion. Natandog man ang iya pamilya sa iya pagbag-o amo nga nagaduaw sila sa iya agod magpatudlo sa Biblia. Si David nagsiling, “Wala gid ako natak-an sa pagpasalamat kay Jehova tungod ginhatagan niya ako sing espirituwal nga kahilwayan.”

Bangod sang programa nga pagtudlo sing Biblia nga ginahimo sang mga Saksi ni Jehova, 175 ka narehabilitar nga bilanggo sa 79 ka bilangguan sa ­Mexico ang gin-aprobahan nga magpakigbahin sa pagbantala nga hilikuton kag 80 sa ila ang bawtismado. Nagadumala sila sing kabug-usan nga 703 ka pagtuon sa Biblia upod sa iban nga mga bilanggo. Dugang pa, mga 900 ka bilanggo ang nagatambong sa Cristianong mga miting nga ginahiwat sa mga bilangguan.

Pagdayaw Gikan sa mga Awtoridad

Ginakilala sang mga awtoridad sa bilangguan ang ginahimo sang mga Saksi ni Jehova. Halimbawa, ang mga opisyales sa bilangguan sa Te­kax, Yucatán, naghatag sa ila sing isa ka sertipiko sang pagkilala tungod sa ila “bilidhon nga bulig kag suporta” sa mga bilanggo sang tuig 2002.

Sang una nga ginsugdan sang mga Saksi ang programa sa pagtudlo sing Biblia sa sini nga bilangguan, ang ila mga miting ginabantayan sang pila ka guardia. Apang, sa pagligad sang tion, bangod sang pagbag-o sang mga bilanggo, naangkon sang grupo ang pagtahod sang mga guardia, tubtob nga isa na lamang ka guardia ang nagabantay sa ila.

Ang bilangguan sa Ciu­dad ­Juárez may kaugalingon nga Kingdom Hall. Ginhatagan sila sing permiso sa pagpasulod sing mga materyales agod himuon ang isa ka wala ginagamit nga salsalon nga tinukod nga isa ka duog sa pagsimba. Ang tanan nga trabaho ginhimo sang 13 ka bawtismado nga mga bilanggo kag sang ila mga ginatun-an sa Biblia, nga mga bilanggo man. Ang tilipunan may sound system, kasilyas, pulungkuan kaangay sa sinehan, kag makapalingkod sing 100 ka tawo. Mga 50 ka tawo ang regular nga nagatambong sa lima ka miting kada semana.

Huo, posible nga marehabilitar ukon magbag-o paagi sa pagtuon sa Biblia. Kaangay sang karakter sa Biblia nga si Manases​—⁠ang hari sa Judea nga nakahimo sing daku nga kalainan kag nangin bilanggo sa Babilonia​—⁠nga naghinulsol kag nangayo sing patawad paagi sa pangamuyo, ang mga bilanggo karon mahimo man magbag-o sang ila personalidad kag mangin mahinadlukon-sa-Dios nga mga indibiduwal.​—⁠2 Cronica 33:​12, 13.

[Retrato sa pahina 20, 21]

Bawtismo sa sulod sang bilangguan

[Retrato sa pahina 20, 21]

Ang bug-os tion nga mga ministro kag ang ila mga instruktor sa Pioneer Service School sa sulod sang bilangguan