Handa Ka na Bala sa Pagtambong?

▪Handa ka na bala sa pagtambong sa “Diosnon nga Pagkamatinumanon” Distrito nga Kombension sang mga Saksi ni Jehova? Ining tatlo-ka-adlaw nga mga kombension, pagahiwaton sa Nobiembre, Disiembre kag temprano nga bahin sang Enero 2006, sa kapin sa 50 ka siudad sa bug-os nga Pilipinas. Mahimo gid nga ang isa sining mga kombension pagahiwaton sa siudad malapit sa inyo.

Sa kalabanan nga duog ang mga sesyon kada aga magasugod sa alas 8:30 paagi sa musika. Ang tema sa Biernes amo ang “Tumana ang Akon Tingog, kag Ako ang Mangin Dios Ninyo.” (Jeremias 7:23) Pagkatapos sang mga pamulongpulong sa aga nga ‘Ginhimo Kita Sing Makatilingala’ kag “Pagkabanhaw​—⁠Kon Ngaa Ining Paglaum Dapat Mangin Matuod Gid sa Imo,” ang sesyon magahinakop sa keynote address, nga “Sunda ang Huwaran sa Inyo Pagkamatinumanon sa Dios.”

Ang sesyon sa Biernes sang hapon magalakip sang mga pamulongpulong nga “Padayon nga ‘Hunahunaa ang Espiritu,’ Agod Mabuhi,” “Mag-andam Batok sa Tanan nga Sahi Sang Pagkamahamkunon,” kag “Indi Magsunod sa ‘Di-matuod nga mga Sugilanon nga Ginhimo Sing Malalangon.’ ” Pagasundan ini sang duha-ka-bahin nga simposium nga nagapadaku sang talalupangdon nga mga punto sa mga tulun-an sa Biblia nga Hageo kag Zacarias. Ang sesyon sa Biernes magatakop sa pamulongpulong nga “Malapit Na Madula ang Tanan nga Pag-antos!”

Ang programa sa Sabado may tema nga ‘Pagtuman Gikan sa Tagipusuon’ “sa Tanan nga Butang,” pasad sa Roma 6:17 kag 2 Corinto 2:9. Ang sesyon sa Sabado sang aga magalakip sang tatlo-ka-bahin nga simposium nga may tig-ulo nga “Malipayon ang mga Pamilya nga Nagatuman sa Diosnon nga mga Prinsipio.” May mga demonstrasyon ini kag mga interbyu kon paano ang mga miembro sang pamilya​—⁠bana, asawa, kag mga kabataan​—⁠makaamot sa kalipay sang pamilya. Ang sesyon sa aga magahinakop sa pamulongpulong nga “Himua nga ang Imo Huo Magakahulugan Sing Huo,” kag pagkatapos sini pagabawtismuhan ang mga kalipikado para sa bawtismo.

Ang sesyon sa Sabado sang hapon magalakip sang ‘Magpalayo sa Pagtan-aw sa Butang nga Wala Sing Pulos’ kag ‘Magbalik sa Manugbantay Sang Inyo mga Kalag.’ Pagasundan ini sang duha-ka-bahin nga simposium nga may tig-ulo nga “Mangin Matinumanon sa mga Nagapanguna.” Ang nagahinakop nga pamulongpulong sa hapon, nga may tig-ulo nga “Ano Gid ang Ginatudlo Sang Biblia?” amo ang talalupangdon nga bahin sang kombension.

Ang programa sa Domingo sang aga nagapadaku sang tema ‘Tumana Ini Tanan nga Pulong . . . Agod Mangin Maayo Ini sa Imo,’ pasad sa Deuteronomio 12:28. Ang tatlo-ka-bahin nga simposium nga may tig-ulo nga “Buligi ang Iban sa Pagtuman sa Kon Ano ang Ginatudlo Sang Biblia” nagahatag sing praktikal nga bulig agod makasugod kag makadumala sing mainuswagon nga mga pagtuon sa Biblia.

Ang sesyon sa aga magatakop sa de-kostyum nga drama nga natig-uluhan “Panikasugi ang mga Tulumuron nga Nagapadungog sa Dios.” Magasunod ini sa pamulongpulong nga “Mga Pamatan-on​—⁠Buligan Bala Kamo Sang Inyo mga Tulumuron nga Magmadinalag-on?” Ini nga pamulongpulong magahatag sing ideya sa drama sa Biblia tuhoy kay Timoteo, nga nagpakita sing isa ka maayo nga halimbawa sang masinakripisyuhon nga pag-alagad nga maayo ilugon sang mga pamatan-on karon. Ang katapusan nga sesyon sa Domingo sang hapon may pamulongpulong publiko nga “Sin-o ang Dapat Naton Tumanon?”

Planuha na karon ang pagtambong. Agod mahibaluan ang mga lugar nga pagahiwatan malapit sa inyo ginaistaran, pakig-anguti ang mga Kingdom Hall sang mga Saksi ni Jehova sa inyo duog ukon magsulat sa Watch Tower, P.O. Box 2044, 1060 Manila.