Magdiretso sa kaundan

Magdiretso sa listahan sang kaundan

Mga Balay nga May Tulad Balahibo nga Palitada

Mga Balay nga May Tulad Balahibo nga Palitada

Mga Balay nga May Tulad Balahibo nga Palitada

Suno sa manunulat sang Magmata! sa Ukraine

ANG mga balaligyaan, mga balay, kag opisina nga mga bilding sa bug-os nga Ukraine napalitadahan sang finishing nga ginatawag shuba, buot silingon “fur coat” ukon panapot nga human sa balahibo sang sapat. Ang shuba isa ka tradisyunal nga stucco finish para sa dingding sang bilding nga nagaanggid sa nasulod nga bahin sang isa ka panapot nga human sa balahibo sang karnero. Indi lamang mga tawo nga nagapuyo sa dalagku nga mga balay ang nagapabalor sa katahom sang shuba kay bisan gani ang kubos nga mga mangunguma nagagasto gid agod mapalitadahan sing shuba ang ila balay.

Ang mga teknik sa sini nga stucco finish masami nga matun-an sa sulod sang mga duha ka tuig. Diutay lang kag simple ang mga gamit sang shuba nga pintor. Nagalakip ini sang isa ka balde nga suludlan sing basa nga semento, isa ka malip-ot nga silhig, kag isa ka kahoy ukon metal nga baston. Apang, indi simple ang kalantip sa palitada nga shuba.

Ang shuba indi lamang isa ka stucco finish​—⁠nagalakip ini sing nanuhaytuhay nga mga padron, mga desinyo, mga duag, kag kadamulon. Ang kalantip sa pagpalitada sing shuba sa isa ka balay matigayon lamang kon eksperto ang pintor sa paghibalo kon ano nga desinyo ang bagay.

Ang nanuhaytuhay nga mga desinyo ukon geometriko nga mga padron nga pagagamiton mahimo ikrokis sa dingding antes ibutang ang semento. Ang pagkatuhay sa desinyo matigayon paagi sa paggamit sing madukot kag lasaw sing duag nga mga semento nga indi palareho ang kadamulon. Kon magmala na ang shuba, ginaespreyhan ini sing pintura para magdugang pa ang katahom kag pagkatuhay.

Ginatusmog sang pintor sa basa nga semento nga yara sa sulod sang balde ang silhig nga ginauyatan sang iya isa ka kamot. Pagkatapos ginahampak niya ang silhig sa baston, nga ginauyatan naman sang iya pihak nga kamot. Ang semento nagaasik sa dingding. Kon dalayon ang pagtrabaho, mga 20 tubtob 25 metros kuadrado sang dingding ang mapalitadahan sang isa ka pintor kada adlaw.

Bisan pa trabahuso ang shuba, diutay lang nga pagmentinar ang kinahanglan sa mga balay nga napalitadahan sini nga estilo. Ang lamang nga himuon sang tag-iya sang balay amo nga papiswitan sing tubig ang pader kada tuig agod madagnas ang yab-ok kag dayon pinturahan ang daw nagapug-is na nga mga bahin. Kon himuon ini, pat-od nga magadugay ang shuba. Sa katunayan, madamo nga shuba nga mga balay ang daw bag-o gihapon tulukon bisan 20 anyos na ini.

Nadala pa gani sang isa ka pintor ang iya kalantip sa iban nga pungsod. Sang nagduaw sia sa iya abyan sa Balingen, Alemanya, ginpangabay sia sang iya abyan nga palitadahan sing shuba ang iya balay. Bisan pa kinaandan na ang shuba sa Ukraine, indi pa ini kilala sa sini nga banwa.

Samtang ginapalitada sang pintor ang shuba nga estilo, natawag niya ang igtalupangod sang bug-os nga komunidad. Nagmurahag ang mga mata sang isa ka kontraktor nga daw indi makapati samtang ginatan-aw niya ang katahom nga natuga sang simple lamang nga mga kagamitan. Nagawaog ang liog sang mga drayber sa pagpasiplat samtang hinayhinay nga nagalabay sila kag ang isa ka dyurnalista nagkuha sing mga retrato para sa lokal nga pamantalaan. Sang matapos ang palitada, nakabaton sing premyo ang balay gikan sa siudad.

Mangin matahom ayhan ang shuba nga estilo sa inyo komunidad? Mahimo nga mangin matahom tulukon ang bag-o nga shuba nga tulad balahibo nga palitada para sa imo balay.

[Retrato sa pahina 21]

Ang ginpremyuhan nga shuba nga balay sa Balingen, sa Alemanya

[Retrato sa pahina 21]

Ang kagamitan sang shuba nga pintor nagalakip sang isa ka malip-ot nga silhig kag kahoy nga baston

[Retrato sa pahina 21]

Ang pagpalitada sing shuba sa isa ka balay nagakinahanglan sing daku nga kalantip