Nabatyagan Namon ang Nagapabakod nga Bulig sang Dios

PANUGIRON NI ESTHER GAITÁN

“Ginkidnap namon ang inyo iloy. Indi gid kamo magtawag sing pulis. Hulata lang ang amon tawag buas sa kaagahon.”

NABATON sang akon manghod nga babayi ini nga tawag tuhoy sa amon iloy nga si Esther, sang isa ka Martes sang nagligad nga tuig. Bag-o lang gid kami makapauli sang akon bana nga si Alfredo halin sa isa ka miting sa Kingdom Hall sang mga Saksi ni Jehova sang mabalitaan ko ang tuhoy sa tawag. Pag-abot namon sa balay sang akon mga ginikanan sa Mexico City, nag-alabot na ang amon mga paryente. Masubo gid ang akon mga manghod nga babayi kag lalaki, kag nagahinibi ang mga utod nga babayi ni Nanay.

Ang akon amay kag magulang nga utod nga lalaki may transaksion sa negosyo nga gin-asikaso. Sa tapos sila mahambal sa telepono, nagsugtanay kami tanan nga labing maayo nga pahibaluon ang pulisiya. Sadtong makalilisang nga gab-i, nangayo kami sing bulig paagi sa pangamuyo. Nabatyagan gid namon nga ginhatagan kami sang Dios sing “gahom nga labaw sa kinaandan.”​—⁠2 Corinto 4:7.

Pagkaaga, ako ang nagsabat sa tawag sang mga kidnaper. Bisan pa tuman ang nerbios ko, kalmado nga nakighambal ako. Luyag makahambal sang kidnaper ang akon amay, apang ginsugiran ko sia nga may ginlaktan sia. Nian, nagsiling ang kidnaper nga hulaton na lang nila si Tatay antes sugdan ang negosasyon. Namahog sia nga kon indi kami magbayad sing daku nga kantidad, patyon nila si Nanay.

Pagkadason nga adlaw ako liwat ang nagsabat sa telepono. Sanglit kalmado lang ako walay sapayan sang iya mga pamahog, namangkot ang kidnaper: “Wala mo bala marealisar ang pagkaserioso sang kahimtangan?”

 “Siempre,” sabat ko. “Ginkidnap ninyo ang amon iloy. Apang mga Saksi ni Jehova kami, kag nagasalig gid kami nga buligan kami sang amon Dios. Kag ginabuligan kami sang Biblia sa paghanda nga batason ining mabudlay nga mga tion nga aton ginakabuhian.”

“Huo. Huo. Nahibaluan ko ina tanan,” sabat niya. “Amo man sina ang ginasiling sang inyo iloy. Nagasalig gid sia sa iya Dios kag sa inyo.” Gani nahibaluan namon nga si Nanay nagapabilin nga malig-on sa iya pagtuo, kag nagpabakod ini sa amon.

Bulig sa Pagbatas

Sa pagligad sang mga inadlaw, ang amon mga masigka-Cristiano nagtelepono kag nagpadala sing mga kard kag elektroniko nga mga mensahe. Padayon kami nga nagtambong sa amon mga miting kag nagpakigbahin sa pagbantala nga hilikuton. Nalugpayan man kami sang adlaw-adlaw nga pagbasa sing Biblia kag sing pasad sa Biblia nga mga balasahon. Labaw sa tanan, ang pangamuyo naghatag sa amon sing “paghidait sang Dios.”​—⁠Filipos 4:​6, 7.

Ang isa ka pulis nagkomento: “Sa siam ka tuig ko sa departamento, nasaksihan ko ang pagsalangisag sang madamo nga pamilya, apang tuhay kamo. Kalmado lang kamo. Napat-od ko nga bangod ini sa Dios nga inyo ginasimba.”

Ginpakita namon sa iya ang Disiembre 22, 1999, nga gua sang Awake! nga magasin, nga may panghapin nga “Kidnapping​—⁠Why a Global Threat,” nga amon ginrepaso. Ginbasa niya ini kag nangayo sing dugang pa nga mga kopya, kay luyag niya kuno makilala sing dugang pa ang mga Saksi ni Jehova.

Sang ulihi, pagligad sang 15 ka adlaw nga negosasyon, ginbuy-an sang mga kidnaper ang amon iloy. Maayo ang iya kahimtangan, bisan pa ginhunong sia nga isahanon lamang sa isa ka gamay nga hulot, nga nakadenahan ang iya tiil. Apang, matinahuron nga gintratar sia kag ginhatagan sing bulong nga iya regular nga ginainom para sa diabetes kag alta presyon.

Gin-asoy ni Nanay kon paano sia nakalampuwas. “Sang primero,” baton niya, “hinadlukan gid ako, apang nangamuyo ako kay Jehova, kag ginbuligan niya ako nga indi madulaan sing paglaum. Wala ko gid ginbatyag nga isahanon ako sa sulod sadtong gamay nga hulot. Napamatud-an ko kon daw ano gid ka matuod si Jehova sa akon; wala gid niya ako ginbayaan. Nangabay ako sa iya nga buligan ako sa pagpakita sang mga bunga sang iya espiritu​—⁠ilabi na sang pagpailob.

“Sa bulig sang Dios, wala gid ako maghibi ukon magsalangisag. Ginhinguyang ko ang mga inadlaw sa pagdumdom sang tanan nga bersikulo sa Biblia nga nahibaluan ko, kag sa pagkanta man sang aton mga ambahanon sa Ginharian. Kon kaisa, ginahanduraw ko nga kuno abi yara ako sa Cristianong mga miting, kag nagapakigbahin sa sini. Ginhanduraw ko man nga nagabantala ako sa mga tawo kag nagadumala sing mga pagtuon sa Biblia. Masako gid ang akon hunahuna sa sining mga butang amo kon ngaa daw madasig lang nga nagligad yadto nga tion.

“Nakahigayon pa gani ako nga magpanaksi tuhoy sa akon pagtuo sa mga kidnaper. Sa kada tion nga ginadalhan ako sing pagkaon sang isa sa ila, ginabantalaan ko sia, bisan pa may buta ang akon mga mata. Halimbawa, isa ka bes ginsugiran ko ang kidnaper nga gintagna sang Biblia ang mabudlay nga mga tion nga aton ginakabuhian kag nahangpan ko kon ngaa mahimo kinahanglan gid nila ang kuarta. Nagsiling ako nga si Jehova nga Dios labing gamhanan apang wala gid niya ginagamit ini sa sayop nga paagi. Pagkatapos nangabay ako nga kon mahimo indi nila paggamiton ang ila gahom sa pagsakit sa akon kundi magpasunaid sila sa akon.

“Namati sa akon ang kidnaper kag ginsingganan ako nga indi magkabalaka, kay indi nila ako paghalitan. Nagapasalamat gid ako kay Jehova nga ginpabaskog niya ako sa sadtong mabudlay nga mga tinion, kag kapin pa nga determinado ako karon nga magpadayon sa pag-alagad sa iya subong isa ka regular payunir tubtob masarangan ko.”

Wala sing duhaduha nga bangod sini nga pagtilaw labi pa nga nangin suod si Nanay kay Jehova, subong amo man ang nangin epekto sa amon. Daw indi namon mahibal-an kon paano ipabutyag ang amon pasalamat nga si Nanay nakapauli na. Makalugpay ang mahibaluan nga sa idalom sang Ginharian sang Dios wala na ini nga mga krimen. Samtang ginahulat naton ini, makapamatuod kami sang akon pamilya nga matuod gid ang ginasiling sang salmista sa Biblia: “Madamo ang mga kapahamakan sang matarong, apang gikan sa sini tanan ginaluwas sia ni Jehova.”​—⁠Salmo 34:19.