Paglugpay sa Tion sang Trahedya

Si Dolores Gómez nga isa sang mga Saksi ni Jehova sa isa ka gamay nga banwa malapit sa Barcelona, sa Espanya, 44 anyos sang ginsugiran sia sang iya doktor nga may cerebral tumor sia. Ang doktor nagsiling nga mga walo ka bulan na lang ang iya kabuhi. Ginpakita gid sang iya mga masigka-Cristiano ang ila pagpalangga sa iya. Mga pila ka adlaw antes sia napatay, nag-abot ang iya indi Saksi nga mga himata gikan sa lainlain nga mga rehiyon sa Espanya.

Gintatap sila sang mga Saksi kag gin-amanan sing dalayunan, pagkaon, transportasyon kag iban pa nila nga mga kinahanglanon. Natandog gid ang tagipusuon sang iya pamilya sang di-malingkang nga pagtuo kag dignidad ni Dolores tubtob sa iya kamatayon, kag sang pagkamaabiabihon sang mga Saksi. Ang masunod nga sulat nagapabutyag sang ila balatyagon.

“Ini nga sulat para sa grupo sang mga lalaki kag mga babayi nga nagabantala indi lamang paagi sa pagpabutyag sing gugma sa ila isigkatawo kundi paagi man sa mga buhat nga nagapakita sang ila sinsero nga mga balatyagon gikan sa alibutod sang ila tagipusuon. Naeksperiensiahan namon ini sa isa ka pinasahi nga hitabo sa amon kabuhi sang magmasakit sing malubha ang amon manghod nga si Loli [Dolores].

“Busa, tanan kami (mga himata niya gikan sa lainlain nga mga bahin sang Espanya) nga nagakasubo gid bangod sang iya pagkadula, nagapabutyag sang amon tinagipusuon nga pagpasalamat kag gugma sa inyo tanan nga nag-unong sa iya kalipay kag kasubo, sa iya kadalag-an kag kasakit, tubtob sa hingapusan sang iya kabuhi diri sa duta.

“Subong man, luyag namon ipahibalo sa inyo nga naeksperiensiahan namon ang isa sa pinakatalalupangdon nga gugma kag paghiusa nga inyo ginpakita. Magapauli kami sa amon mga puluy-an kag sa amon mga pamilya kag mga obligasyon, apang lain na ang amon pagtamod kay naapektuhan kami sang daku nga gugma sang amon manghod nga si Loli kag ninyo man, kag nagapabakod ini sa amon nga magpadayon sa pagkabuhi.

“Magapaalam kami nga may mainit nga gugma kag tinagipusuon nga pagpasalamat. Tubtob sa pagkitaay naton liwat, mga abyan, kabay nga si Jehova magapahalipay sa inyo.”

Ginpirmahan sang pamilya kag sang mga utod ni Dolores Gómez

[Mga retrato sa pahina 31]

Ang pila sa lokal nga mga Saksi