Pamangkot sang mga Pamatan-on . . .

Dapat Bala Kami Magpakasal sing Pormal?

“Ang akon nobya nga si Cindy amo ang una nga nagsiling nga magtabanay na lang kami kag magpakasal sing pribado, kag indi na namon pagpahibaluon ang tanan namon nga abyan kag mga paryente. Pagkatapos namon ini hambalan, nakita namon nga mas diutay nga tion kag kusog ang mahinguyang namon kag indi pa kami tanto mahul-an.”​​—⁠⁠Allen.⁠ *

KON yara ka na sa husto nga edad agod magminyo kag may nobya ukon nobyo na ikaw, ang ideya nga magtabanay kag magpakasal daw maayo. Sa pila ka kahimtangan mahimo matentar ang magnobyohanay nga himuon ini. Ano nga mga prinsipio ang makabulig sa imo sa pagdesisyon kon ano ang dapat himuon?

Importante Gid Bala ang Tradisyunal nga Kasal?

Bisan pa nga ang pagpakasal kinaandan sa kalabanan nga mga kultura, ang mga kustombre sa seremonya sini nanuhaytuhay gid. Para sa Cristiano nga magnobyohanay, ang pinakaimportante nga butang indi ang pagsunod sang tanan nga ginapaabot sang lokal nga kustombre. (Roma 12:2) Sa baylo, ang pinakaimportante sa ila amo nga ang ila pagnobyahanay kag pagpakasal nagapadungog kay Jehova nga Dios.​​—⁠1 Corinto 10:31.

Sanglit ang pag-asawahay isa ka dungganon nga kahimusan, isa ini ka butang nga indi dapat ilikom sang mga magnobyohanay. Sa madamo nga kadutaan sa Katundan, ang mga Saksi ni Jehova nga magnobyohanay kinaandan nga ginakasal sa ila lokal nga Kingdom Hall.⁠ * Pagkatapos sini, puede nila hiwaton ang punsion sa isa ka lugar diin makakaon sila kag mahimo makalingawlingaw upod sa ila pamilya kag mga abyan. Ining mga okasyon indi kinahanglan nga mangin engrande. Apang, batunon naton nga ang pag-organisar sang kasal kag punsion makapahuol kag mahimo nagakinahanglan sing daku nga gasto. Halimbawa, sa Estados Unidos, linibo ka dolyar ang masami nga ginagasto sa mga punsion sang kasal.

Agod mabuhinan ang kahuol kag gasto, ginpakamaayo sang pila ka magnobyohanay ang mas simple nga kasal. “Ginsilingan namon ang amon mga ginikanan nga indi na kami magpakasal sing  tradisyunal,” siling ni Cindy, “bangod luyag namon nga mangin simple lang ini kag indi magasto. Nahangpan sang akon mga ginikanan ang amon sitwasyon, sa amo nagpasugot sila. Mahinangpanon gid sila.” Sa pihak nga bahin, sang ginsugiran sang nobyo ni Cindy nga si Allen ang iya mga ginikanan tuhoy sa ila mga plano sa kasal, daw indi nila ini mahangpan. “Naghunahuna sila nga sila ang balasulon,” siling ni Allen, “nga nagdesisyon kami kuno sing subong sini bangod sang ginhimo nila. Apang indi gid amo sina ang matuod nga kahimtangan.”

Mahimo malugaw-an man ang imo mga ginikanan kon magdesisyon ka sing simple katama nga kasal, kay mahimo nga luyag nila nga madamo nga tawo ang makaambit sa ila kalipay sa sining pinasahi nga adlaw. Apang, ano abi kon nagahunahuna ka nga magpakasal nga indi na pagpahibaluon ang imo mga ginikanan bangod nakahibalo ka nga indi gid luyag sang imo pamilya nga magminyo ka?

Binagbinaga ang Balatyagon sang Imo Pamilya

Mahimo mamatok ang imo mga ginikanan bangod nagabatyag sila nga bata pa ikaw katama agod maghimo sining importante nga desisyon. Mahimo nahangawa sila nga ang imo mga luyag magabag-o samtang nagahamtong ka kag hinulsulan mo sa ulihi ang ginpili mo nga pakaslan. Sa pihak nga bahin, mahimo nga para sa ila yara ka na sa husto nga edad, apang may nakita sila nga diperensia sa imo naluyagan. Ukon mahimo indi sila magpasugot nga magpakasal ka bangod lain ang relihion sang ginpili mo nga pakaslan.

Kon ang imo mga ginikanan matuod nga mga Cristiano, mahimo may pasad sa Biblia sila nga mga rason agod magkabalaka. Husto lamang nga mahangawa sila. Sa pagkamatuod, tamdon sila ni Jehova nga mapatumbayaon kag di-mahigugmaon kon indi nila ina paghimuon. Kag para sa imo kaayuhan nga pamatian ang ila punto-de-vista.​​—⁠Hulubaton 13:​1, 24.

Sa pag-ilustrar: Kon magabakal ka sing bayo, mahimo mangabay ka sang opinyon sang iban kon bala ang bayo bagay sa imo. Mahimo indi ka mag-ugyon sa ila opinyon sa tanan nga tion, apang magahambal gid ang imo suod nga mga abyan kon ang bayo indi igo sa imo ukon indi ka angayan sini. Ginaapresyar mo ang ila mga komento, bangod makabulig ini sa imo nga indi makauyang sing kuarta. Nian, labi pa gid nga apresyahon mo ang opinyon sang imo pamilya tuhoy sa imo ginpili nga pakaslan. Ang bayo puede mo islan ukon ihaboy, apang ginapaabot ni Jehova nga unungan mo ang imo tiayon sa bug-os mo nga kabuhi. (Mateo 19:​5, 6) Kon pilion mo ang isa ka tiayon nga indi gid bagay sa imo personalidad kag espirituwalidad, mangin mas daku nga problema ang inyo pag-updanay sangsa isa ka bayo nga gutok. (Genesis 2:​18; Hulubaton 21:9) Kag subong resulta, mahimo mawasi mo ang tsansa nga makasapo sing matuod nga kalipay.​​—⁠Hulubaton 5:​18; 18:22.

Matuod, ang iban nga ginikanan mahimo may makagod nga mga rason sa pagpamatok sa isa ka pag-asawahay​—⁠halimbawa, agod sila gihapon ang may deber sa ila anak. Apang, antes mo kabigon ang imo mga ginikanan nga makagod kag magpakasal nga indi na maglisensia, ngaa indi anay analisaha ang ila pagpamatok?

Mga Rason sa Paghalong

Matuod nga ang imo mga luyag magabag-o samtang nagahamtong ka. “Sang bata pa ako,” sulat ni apostol Pablo, “nagahambal ako subong sang bata, nagahunahuna subong sang bata, nagapangatarungan subong sang bata; apang karon nga nangin hamtong nga tawo na ako, ginsikway ko [na] ang mga kinabatasan sang bata.” (1 Corinto 13:11) Sing kaanggid, ang mga kinaiya sang isa ka tawo nga makagalanyat sa imo sang tin-edyer ka pa mahimo nga indi na makagalanyat sa imo kon mas hamtong ka na. Busa, ang Biblia nagrekomendar nga maghulat ka anay tubtob “lampas [ka] na sa kapagsik sang pagkabatan-on”​—⁠ang mga tinuig nga nagasilabo ang imo seksuwal nga handum​—⁠antes ka maghimo sing serioso nga tikang sa pagpili sing tiayon.​—⁠1 Corinto 7:36.

Ano abi kon mulayon sang imo mga ginikanan ang imo luyag pakaslan? Bangod sang ila eksperiensia sa kabuhi, mahimo nga mas nahanas ang ikasarang sa paghantop sang imo mga ginikanan sa pagkilala sang maayo kag malain. (Hebreo 5:14) Mahimo nga may nakita sila nga serioso nga problema sa personalidad sang imo luyag pakaslan, nga wala mo makita. Binagbinaga ang prinsipio sa ginsulat sang maalam nga tawo nga  si Solomon: “Ang una sa iya legal nga kaso matarong; ang iya isigkatawo magaabot kag magausisa sa iya.” (Hulubaton 18:17) Sing kaanggid, mahimo kumbinsihon ka sang imo naluyagan nga sia gid ang bagay para sa imo. Apang, pagkatapos sia ‘mausisa’ sang imo mga ginikanan, mahimo mapatalupangod nila sa imo ang pila ka butang nga dapat mo anay binagbinagon.

Halimbawa, mahimo nila ipahanumdom sing malig-on sa imo ang sugo sang Biblia sa matuod nga mga Cristiano nga magminyo “lamang sa Ginuo.” (1 Corinto 7:39) Mahimo mangatarungan ka nga may kilala ka gani nga nagminyo sa indi masigkatumuluo, apang malipayon na sila karon nga nagaalagad kay Jehova. Huo, may mga kaso nga amo sina ang natabo. Apang, malaka ina katama. Kon magpakasal ka sa isa nga indi pareho sa imo ang pagtuluuhan, wala mo lamang ginasikway ang talaksan ni Jehova kundi ginabutang mo pa ang imo kaugalingon sa daku nga katalagman sa espirituwal.​​—⁠2 Corinto 6:⁠14.⁠ *

Isa ka Di-maalamon nga Rason sa Pagpakasal

Ang pila ka pamatan-on nagatabanay kag nagapakasal bangod nakahimo sila sing imoralidad kag nagahunahuna nga ang pagpakasal sa ila nobyo ukon nobya makapamag-an sang ila konsiensia. Ukon mahimo nagahunahuna sila nga mahinabunan sini ang mga resulta sang ila sala, subong sang wala gintuyo nga pagbusong.

Kon magpakasal ka agod tabunan ang isa ka sala, mahimo nga ginadugangan mo lamang ini. “Sia nga nagatabon sang iya mga kalapasan indi magmadinalag-on,” paandam ni Solomon, “apang sia nga nagatu-ad kag nagabiya sini pakitaan sing kaluoy.” (Hulubaton 28:13) Natun-an sang amay kag iloy ni Solomon, sanday David kag Bat-seba, ang kabuangan sang pagtinguha nga ihinago ang ila imoral nga paggawi. (2 Samuel 11:2⁠–​​12:25) Sa baylo nga taguon ang imo sala, isugid ini sa imo mga ginikanan kag sa mga gulang sang kongregasyon. Mahimo nagakinahanglan ini sing kaisog sa imo bahin, apang mapat-od mo nga patawaron ka ni Jehova kon mahinulsulon ikaw. (Isaias 1:18) Kon mapanumbalik mo na ang isa ka matinlo nga konsiensia, yara ka na sa mas maayo nga posisyon nga maghimo sing balanse nga desisyon tuhoy sa pag-asawahay.

Likawi ang mga Paghinulsol

Sa paghinumdom sang iya kasal, si Allen nagsiling: “Ang amon desisyon nga magpakasal sing simple nagresulta matuod sa di-mahuol nga okasyon. Ang ginahinulsulan ko lamang amo nga wala ko mabuligan ang akon pamilya nga mahangpan ang mga rason sang amon desisyon.”

Sa pagkamatuod, isa ka personal nga desisyon kon bala ang isa ka hamtong nga magnobyohanay magpakasal sing tradisyunal nga kasal ukon indi. Apang, kon nagahimo sing bisan ano nga desisyon tuhoy sa pag-asawahay, indi magpadasudaso, makigkomunikar sa imo pamilya, kag ‘binagbinaga ang imo mga tikang.’ Mabuhinan mo ang mga butang nga mahimo mo hinulsulan.​​—⁠Hulubaton 14:15.

[Mga nota]

[Retrato sa pahina 25]

Kon nagahimo sing mga desisyon tuhoy sa pagpakasal, makigkomunikar sa imo pamilya