Ang Pagtamod sang Biblia

Mas Ginapaboran Bala sang Dios ang Pila ka Pungsod Sangsa Iban?

MADAMO ang nagabatyag nga mas ginapaboran sang Dios ang ila pungsod sangsa iban. Apang kon mangayo ka sing prueba, ano ang mahatag nila? Mahimo hinambitan sang pila ang nagligad nga mga hinimuan sang ila pungsod​—⁠subong sang mga kadalag-an sang militar ukon pagtin-ad sang ekonomiya. Ukon mahimo ipatalupangod pa gani nila ang madinalag-on nga mga programa para sa pagpakaon sa mga gutom, sa pagpangapin sa mga kubos, ukon sa pagpauswag sa hustisya kag alangay nga pagpakig-angot. Naghinakop ang iban nga ginapaboran sang Dios ang ila pungsod bangod sang duna nga katahom sini.

Ining pagpabugal sa pungsod lapnag bisan diin. Apang, ginasuportahan bala sang Biblia ang ideya nga mas ginapaboran sang Dios ang isa ka pungsod sangsa iban?

Isa ka Talalupangdon nga Kinaiya sang Dios

Maathag ang sabat kon nahangpan naton ang talalupangdon nga kinaiya sang Labing Gamhanan nga Dios nga ginalaragway sang Biblia sing positibo gid. Ang Dios wala sing pagpasulabi. Halimbawa, ang Binuhatan 10:34 maathag nga nagasiling: “Ang Dios wala sing ginapasulabi.” Nagsiling man ang Biblia nga si Jehova nga Dios “walay pinilian” kag “kay Jehova nga aton Dios wala sing pagkadimatarong ukon pagpasulabi.” (Deuteronomio 10:17; 2 Cronica 19:7) Ginadumtan ni Jehova ang pagpasulabi; ginapaanggid pa gani niya ini sa pagkadimatarong.

Apang, mahimo mamangkot ka: ‘Indi bala nga mas ginpaboran sang Dios ang dumaan nga pungsod sang Israel sangsa iban nga mga pungsod? Indi bala pamatuod ina sang pagpasulabi?’ Matuod nga ginpili sang Dios ang pungsod sang Israel sang panahon sang Biblia, kag gin-amligan niya ang mga Israelinhon sa pila nila ka pagpakig-away batok sa iban nga mga pungsod. Dugang pa, ang Biblia nagsiling tuhoy sa Dios: “Ginahambal niya ang iya pulong kay Jacob, ang iya mga palatukuran kag ang iya hudisyal nga mga desisyon sa Israel. Wala niya ini ginhimo sa iban nga pungsod.” (Salmo 147:​19, 20) Apang nagapahangop bala ini nga ang Dios may pagpasulabi? Wala gid. Binagbinaga ang tatlo ka rason.

Una, ginpili sang Dios ang Israel agod makabenepisyo ang tanan nga pungsod. Nakigkatipan sia sa amay sinang pungsod, si Abraham, nga nagasiling: “Paagi sa imo binhi ang tanan nga pungsod sang duta pat-od nga magapakamaayo sang ila kaugalingon.” (Genesis 22:​17, 18) Huo, ginpili sang Dios ang Israel agod magpatubas sang “binhi” nga magadala sing daku nga mga pagpakamaayo, indi lamang sa katawhan sang isa ka pungsod kundi sa katawhan sang “tanan nga pungsod sang duta.”

Ikaduha, indi lamang ang mga Israelinhon ang ginpakamaayo sang Dios. Wala sing pagpasulabi nga ginbuksan niya ang dalan agod ang mga indibiduwal sang iban nga mga pungsod makabuylog sa iya pinili nga katawhan sa pagsimba sa iya. (2 Cronica 6:​32, 33) Madamo ang nagbaton sa sini nga pangagda kag bilang resulta, ginpakamaayo sila. Ang Moabita nga si Rut isa lamang sang kilala nga halimbawa.​​—⁠Rut 1:​3, 16.

Ikatlo, ang pinasahi nga kaangtanan sang Dios sa dutan-on nga Israel temporaryo lamang. Sang 29 C.⁠E., ginpatubas sang Israel ang gintagna nga “binhi,” ang Mesias nga amo si Jesucristo. (Galacia 3:16) Apang wala ginbaton si Jesus sang iya mga kasimanwa subong ang Mesias. Sia nagsiling sa ila: “Yari karon! Ini nga templo ginpabay-an sa inyo.” (Mateo 23:38) Kutob sadto wala na nagapasilabot ang Dios sa indibiduwal nga sekular nga mga pungsod kag sa ila mga sinuay. Sa baylo, walay pagpasulabi nga ginhatagan niya sing kahigayunan ang tanan nga katawhan nga makatigayon  sang iya mga pagpakamaayo. Binagbinaga ang pila ka halimbawa.

Dulot sang Dios Para sa Tanan

Ang halad gawad ni Jesucristo amo ang pinakadaku nga dulot sang Dios sa tawo. (Roma 6:23) Paagi sa sini, mahilway kita sa sala kag kamatayon, kag nagahatag sa tagsa sa aton sing kahigayunan nga mabuhi sing dayon. Para ini sa mga indibiduwal “gikan sa tagsa ka tribo kag hambal kag katawhan kag pungsod.” (Bugna 5:9) Huo, luyag sang Dios “nga ang bisan sin-o nga magtuo” kay Jesus makatigayon sing “kabuhi nga walay katapusan.”​—⁠Juan 3:16.

Ang maayong balita tuhoy sa Ginharian sang Dios nagadala sing madamo nga pagpakamaayo sa yadtong mga nagapamati. (Bugna 14:​6, 7) Nagahatag ini sing paglaum para sa palaabuton kag sing maalamon nga laygay nga nagadul-ong sa mas malipayon nga pagkabuhi karon. Walay pagpasulabi nga nagsugo si Jehova nga “ining maayong balita sang ginharian ibantala sa bug-os napuy-an nga duta subong panaksi sa tanan nga pungsod.” (Mateo 24:14; 28:​19, 20; Binuhatan 16:10) Ining maayong balita masapwan sa Biblia, ang libro nga mabasa sa kabug-usan ukon sing bahin sa kapin sa 2,300 ka lenguahe. Subong isa ka mahigugmaon nga Amay, ginpaposible ni Jehova nga matigayon sang halos tanan nga tawo sa duta ang “mga pulong sang kabuhi nga walay katapusan.”​—⁠Juan 6:68; Josue 1:8.

Ini kag ang iban pa nga mga dulot sang Dios matigayon sang tanan​—⁠huo, sang mga tawo sang tanan nga pungsod, rasa, kag lenguahe. Gani, ang pagpakamaayo sang Dios wala nagadepende sa kon diin kita natawo ukon sa kon ano ang aton etniko nga ginhalinan.

Sin-o ang Ginkahamut-an sang Dios?

Gani, ano ang himuon naton agod kahamut-an kita sang Dios? Ginsabat ini ni apostol Pedro paagi sa pagsiling: “Sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.” (Binuhatan 10:​34, 35) Maathag gid nga indi bastante nga magpakita lamang sing interes sa Dios. Kinahanglan palambuon naton ang hanuot nga gugma sa Dios, kag ang kahadlok nga mapaakig sia. Dapat man kita ‘maghimo sing matarong,’ ukon aktibo nga manikasog sa paghimo sang kon ano ang maayo sa pagtamod sang Dios.

Sa pagilustrar: Sa madamo nga mga pungsod, ang pangpubliko nga mga eskwelahan bukas para sa tanan, apang yadto lamang ang nagaeskwela kag nagaukod sa sini ang magabenepisyo. Sing kanggid, ang kahamuot sang Dios puede matigayon sang tanan, apang kinahanglan naton manikasog. Ini nga panikasog nagalakip sang regular nga pagbasa sang Biblia, pagtuo sa halad gawad ni Cristo, kag pagkabuhi nahisanto sa mga prinsipio sang Biblia. Kon ‘pangitaon gid naton si Jehova,’ kahamut-an niya kita.​—⁠Salmo 105:​3, 4; Hulubaton 2:​2-9.

[Retrato sa pahina 17]

Ginpaposible sang Dios nga matigayon sang katawhan sang tanan nga pungsod ang “mga pulong sang kabuhi nga walay katapusan”