Mas Madamo nga Pililian, Mas Indi Maayawan?

ANG mga tawo sa Estados Unidos “mas madamo [karon] sing pililian sa mas madamo nga bahin sang kabuhi kon ipaanggid sang una,” siling sang isa ka artikulo sa magasin nga Scientific American. Madamo kita sing mapilian nga produkto, serbisyo, trabaho, kag bisan gani personal nga mga kaangtanan. Daw paabuton naton kuntani nga ang mas madamo nga kahilwayan sa pagpili magadul-ong sa labi nga kaayawan sa kabuhi. Apang, sing makapakibot, masami ini nagaresulta sa kapung-aw. Paano?

Natalupangdan sang artikulo nga ang mga panimuot tuhoy sa mga pililian nagaapektar sa kalipay. Halimbawa, ang iban nagahinguyang sing daku nga tion kag panikasog sa pagpangita sing pinakamaayo nga produkto paagi sa pagbasa sing maayo sa mga etiketa kag pag-usisa sa bag-ong mga produkto, kag nian ipaanggid ang ila ginabakal sa kon ano ang ginabakal sang iban. Ang iban nga manugbakal nagapangita pa sing “mas maayo,” bisan pa may maayo naman nga puede matigayon. Nagauntat lamang sa pagpangita ining mga indibiduwal kon masapwan na nila ang produkto nga nagakabagay sa ila mga kinahanglanon.

Maathag nga para sa mga nagapangita pirme sing pinakamaayo, labi nga nagabudlay ang pagdesisyon samtang labi nga nagadamo ang mga pililian. Nian, kon makapili na sila, siling sang Scientific American, “nabalaka sila nga basi may mas maayo pa sila nga nakita kon naghinguyang sila sing kapin nga tion sa pagpangita.” Busa, “mas wala [sila] nagabatyag sing kaayawan sa kabuhi kag mas di-malipayon, mas di-malaumon, kag mas napung-awan.” Ang konklusion? “May maayo nga mga rason nga magpati,” siling sang artikulo, “nga ang madamo katama nga pililian nagaresulta sa paglapnag sang pagkadimalipayon sa modernong katilingban.”

Apang, natalupangdan sang mga awtor sang pagtuon nga ang kahuol sa pagpili sarang mabuhinan. Paano?

● Indi naton pagpabudlayan ang aton kaugalingon sa pagpili kon indi man gid importante katama ang aton ginapangita. Halimbawa, himua nga batasan nga indi magkadto sa kapin sa duha ka balaligyaan kon nagabakal sing panapton.

● Mangin kontento sa pagpili sang butang nga nagakabagay sa imo importante nga mga kinahanglanon sa baylo nga pangitaon ang mabudlay makita nga ‘pinakamaayo.’ Pagkatapos sini, indi na mamensar sang iban pa.

● Indi na paghunahunaa ang daw maayo nga mga kinaiya sang mga butang nga wala mo ginpili. Tudlui ang imo kaugalingon nga isentro ang igtalupangod sa positibo nga mga bahin sang butang nga imo ginpili.

● Ang laygay nga, “Indi magpaabot sing sobra, agod indi ka malugaw-an” daw pirme na lang naton mabatian. Apang maayo ini nga laygay kon luyag mo sing mas labi nga kaayawan sa kabuhi.

[Credit Line sa pahina 31]

Reperensia: Scientific American