Ang Imo Makatilingala nga Pula nga mga Selula sang Dugo

SUNO SA MANUNULAT SANG MAGMATA! SA SOUTH AFRICA

Ang pinakadamo nga selula sa imo kaugatan amo ang nagapapula sang imo dugo kag busa ginatawag nga pula nga selula sang dugo. Ang isa lamang ka tulo sang imo dugo, ginatos ka milyon na sinang mga selula. Kon tan-awon sa mikroskopyo daw mga doughnut ini, apang sa baylo nga may buho nagalupyak ini sa tunga. Ang tagsa ka selula may ginatos ka milyon nga molekula sang hemoglobin. Ang tagsa naman ka molekula sang hemoglobin, isa ka matahom nga tipulon nga ginahuman sing mga 10,000 ka hidroheno, karbon, nitroheno, oksiheno, kag mga atomo sang asupre, kag apat ka mas mabug-at nga atomo sang iron, nga amo ang nagabulig agod makadala sing oksiheno ang dugo. Ang hemoglobin nagabulig sa pagdala sa carbon dioxide gikan sa mga basad ukon tisyu padulong sa baga, kag ang baga naman amo ang nagapagua sa lawas sang carbon dioxide.

Ang isa pa ka importante nga bahin sang imo pula nga mga selula sang dugo amo ang putos sini, nga ginatawag nga membrane. Bangod sining dalayawon nga putos ang selula mahimo maunat kag mapagamay agod makaagi sa imo pinakagamay nga mga kaugatan kag busa makasakdag sa tagsa ka bahin sang imo lawas.

Ang imo pula nga mga selula sang dugo ginapatubas sa imo utok sang tul-an. Kon makasulod na ang isa ka bag-o nga selula sa imo kaugatan, mahimo ini magsirkular sa imo tagipusuon kag lawas sing kapin sa 100,000 ka beses. Indi kaangay sa iban nga mga selula, wala sing pinakaubod ang pula nga selula sang dugo. Nagapamag-an kag nagahatag ini sing dugang nga espasyo para sa oksiheno, nga nagabulig sa imo tagipusuon nga magbomba sang trinilyon ka pula nga mga selula sang dugo sa imo bug-os nga lawas. Apang, bangod wala ini sing pinakaubod, indi ini makailis sang nasulod nga mga bahin sini. Amo nga pagkatapos sang mga 120 ka adlaw, ang imo pula nga mga selula sang dugo amat-amat nga nagaluya kag indi na ini maunat-unat. Ginakaon sang dalagku nga puti nga mga selula sang dugo nga ginatawag nga mga phagocyte ining usado na nga pula nga mga selula kag ginapagua ang mga atomo nga iron. Ang mga atomo nga iron nagatabid sa mga molekula nga magadala sa sini sa imo utok sang tul-an agod gamiton naman sa pagpatubas sing bag-o nga pula nga mga selula. Kada segundo, ang imo utok sang tul-an nagapagua sing duha tubtob tatlo ka milyon ka bag-o nga pula nga mga selula sa imo kaugatan!

Kon ang imo trinilyon ka pula nga mga selula sang dugo hinali nga mag-untat sa pagpanghikot, mapatay ka sa pila lamang ka minutos. Mapinasalamaton gid kita kay Jehova nga Dios sa sining makatilingala nga bahin sang iya tinuga agod nga mabuhi kita kag magkalipay sa pagkabuhi! Walay duhaduha nga magaugyon ka sa salmista nga nagsiling: “O Jehova, gin-usisa mo ako, kag nakilala mo ako. Magadayaw ako sa imo bangod sa makahalangawa nga paagi ginhimo ako sing makatilingala. Ang imo mga binuhatan makatilingala, subong nahibaluan sing maayo sang akon kalag.”​—⁠Salmo 139:​1, 14.

[Diagram sa pahina 24]

(Para sa aktual nga pormat, tan-awa ang publikasyon)

Pula nga selula sang dugo

Membrane

Hemoglobin (ginpadakuan)

Oksiheno